Það er enginn að neita því að þekking í einni fræðigrein nýtist utan hennar. En þótt þekking úr einni fræðigrein nýtist í annarri fræðigrein er ekki þar með sagt að það séu einhver merkileg tengsl á milli þeirra sem fræðigreina. Alveg eins og það eru engin tengsl á milli stærðfræði sem fræðigreinar og þess að hella upp á kaffi, þótt það komi sér vitaskuld vel að geta reiknað út hversu margar kaffibaunir maður þarf að mala til að geta lagað kaffi handa fjórum :)

Það vakir alls ekki fyrir mér að taka heimspeki í guðatölu. Öðru nær. Ég er að segja að tengslin á milli frumspeki og eðlisfræði sem fræðigreina eru lítil og óáhugaverð. Aftur á móti lítur út fyrir að þú viljir gera frumspeki að undirstöðu eðlisfræðinnar; en hún er það ekki. Þótt frumspeki rannsaki og fáist við að skilgreina m.a. ýmis hugtök sem eðlisfræðin gengur að sem vísum taka eðlisfræðingar lítið sem ekkert tillit til niðurstaðna heimspekinganna um frumspeki (ólíkt t.d. jarfræðingum sem byggja raunverulega á niðurstöðum efnafræðinga þegar þeir rannsaka sýrustig í bergi). Eðlisfræðingarnir stunda sín fræði að mestu leyti án þess að leiða hugann að því hvað einhver frumsekingur er að segja. Eðlisfræðin sem fræðigrein veltur ekki á frumspeki og kemst vel af án hennar. Enda reyndu margir merkustu heimspekingar 20. aldar að losa heimspekina við alla frumspeki og það var ekki að sjá að það hefði nein áhrif á eðlisfræði sem fræðigrein eða hreyfði við eðlisfræðingum.

Hvað tauga- og hugfræði varðar máttu ekki skilja mig svo að ég hafi verið að reyna að gera lítið úr þeim fræðum. Og ég átti ekki við - og sagði ekki - að vísindamenn sem fást við taugafræði og hugfræði hafi ætlað sér að uppgötva sannleikann á einu bretti. Ég sagði að þeir hafi eitt sinn verið bjartsýnir um að þeim tækist að vinna sitt verk með aðferðum raunvísindanna einum saman. En það er staðreynd að bjartsýnin sem eitt sinn ríkti þar á bæ er ekki eins mikil núna. Þessir vísindamenn hafa sýnt áhuga á að vinna meira með heimspekingum upp á síðkastið.

Fínt að þú bentir mér á þessa síðu, ég ætla að skoða hana. Stanford á að vera mjög framarlega, allavega í sálfræði, en kynningin á heimasíðunni þeirra er ekki nógu ítarleg. Berkeley og New York University eru eflaust líka góðir, þótt það sé að því er mér skilst hræðilega dýrt að vera í NY.

Annars er bara tiltölulega stutt síðan ég ákvað að fara frekar í neuroscience en sálfræði, svo ég er einhvern veginn ekki búin að kynna mér skólana nógu vel með tilliti til þess.