Veðrið undanfarna daga hefur verið með eindæmum í maí. Hitinn á sunnudaginn og í dag þegar best lét voru tæplega 18 gráður í Reykjavík sem er mesti hiti sem mælst hefur síðan 1988 í maí.

Á Þingvöllum náði hitinn 22 gráðum bæði í gær þegar hann fór uppí 22,3 og í dag, 22,1 gráða. Það er ótrúlegur hiti í maí og það sem er ennþá óvenjulegra er að bæði í nótt og fyrrinótt var næturfrost á Þingvöllum. Þá er hitasveifla dagsins yfir 20 gráðum!

Loftið sem veldur þessum hlýindum er að mestu ættað frá suður Póllandi. Það útskýrir mistrið sem hefuyr verið í loftinu undanfarna daga. Mistrið er nefnilega að megninu til kolaryk.

Þeir sem kíktu út um gluggann í gærkvöldi eins og Iwahara gerði og sagði frá hér hafa væntanlega séð hversu rauð sólin var. Það stafaði af mistrinu. Þegar geislar sólarinnar rákust á mistrið þá síuðust allir litir nema rauður út vegna þess að agnir mistursins dreifa hinum litunum.

Heimildir: Heimasíða Einars Sveinbjörnssonar og Heimasíða Veðurstofu Íslands

Myndin er tekin af vef Veðurstofunar og sýnir hún uppruna loftsins sem hefur verið yfir okkur undanfarna daga.