Hér kemur grein frá uppáhalds stjórnmálamanninum mínum, hún Ásta þingmaður sem er hjúkrunarkona með djúpa réttlætiskennd. Hér kemur það sem ástin hún Ásta hefur kynnst um fátækt tekið af heimasíðu hennar. Maður er ekki samur eftir að lesa þessa grein og liggur við að ég hafi farið að gráta. Þetta kemur öllum Íslendingum við, hér ætti enginn að svelta og við getum gert eitthvað með að krossa við D í stað hræsnara. Lesið hvað Ingibjörg og R-listinn gerðu fátækum Reykvíkingum eftir öðlinginn hana Ástu þingmanninn okkar:


“4. maí 2003
Flótti frá fátæktarumræðunni

Flótti Samfylkingarfólks frá fátæktarumræðunni síðustu daga hefur verið áberandi.

Í byrjun kosningabaráttunnar áttu fullyrðingar Samfylkingarinnar um aukna fátækt á Íslandi að vera eitt megintrompið í málflutningi þeirra og merki um hve ríkisstjórnin hefði haldið illa á málum gagnvart þeim sem minna mega sín í þessu landi. Stórsókn Samfylkingarinnar átti m.a. að byggjast á rannsóknum Stefáns Ólafssonar og fleiri fræðimanna þessa efnis. Nýtt rit um rannsóknir Hörpu Njáls um fátækt á Íslandi, sem kom út í miðri kosningabaráttunni var tekið fagnandi af Samfylkingunni og þótti þeim fengur að. Enn var bætt í umræðuna.

Rannsókn Hörpu Njáls reyndist hins vegar ekki sá happafengur sem Samfylkingin hafði vonast eftir, því þegar nánar var rýnt í niðurstöður hennar kom í ljós að helsta ástæða aukinnar sóknar fólks til líknarfélaga eftir 1995 voru breyttar reglur sem leiddu til minnkaðs stuðnings Reykjavíkurborgar við fátæka á tímabilinu 1995-1999. Eftir að þessi staðreynd komst í hámæli hafa raddir Samfylkingarinnar um fátækt þagnað og þær sem heyrast hafa reynst hjáróma.

Nú kemur hver embættismaður Reykjavíkurborgar á fætur öðrum fram til að kynna þær niðurstöður sínar að fátækt hafi raunverulega minnkað í Reykjavík á síðustu árum. Sigurður Snævarr, borgarhagfræðingur, sagði í erindi sínu á ráðstefnu í síðustu viku að fátækum hefði fækkað um helming frá árinu 1995-2001. Þannig hefði 4,2% einstaklinga verið undir fátæktarmörkum á árinu 1995, en á árinu 2001 hafi þetta hlutfall verið komið niður í 2%, miðað við fátæktarmörk 1995 á verðlagi 2001. Jafnframt kom fram í rannsókn hans að fátækt meðal barna væri minnst hér á landi í heiminum fyrir utan Svíþjóð. Í sama streng tók Sigríður Jónsdóttir, framkvæmdastjóri hjá Félagsþjónustunni í Reykjavík, þegar hún ræddi aukinn fjárhagsstuðning borgarinnar við fjölskyldur á síðustu misserum.

Hér hafa embættismenn borgarinnar talað í allt aðra veru en fyrrverandi yfirmaður þeirra og núverandi frambjóðandi Samfylkingarinnar sem og aðrir talsmenn flokksins.

Það er jákvætt að umræða um fátækt á Íslandi skuli vera að leiðast í farveg upplýstrar umræðu um raunverulega stöðu mála. Jafnframt er ástæða til að fagna því að Reykjavíkurborg hefur séð að sér á síðustu misserum og aukið stuðning við fólk sem býr við bágar aðstæður. Ég er þeirrar skoðunar að það sé jafn mikill ábyrgðarhluti að tala fátækt upp og tala hana niður. Samfylkingin hefur gerst sek um að tala fátæktina upp en gert sjálfsmark um leið. Óvandaður málflutningur hefur tilhneigingu að hitta þann fyrir sem slíku beitir. Það á við um Samfylkinguna í hverju málinu á fætur öðru í yfirstandandi kosningabaráttu. ”

Ef þú villt lesa fleiri greinar eftir Ástu, uppáhaldsstjórnmálamanninn minn, þá eru ótal af þessu tagi um hin margvíslegustu mál á heimasíðunni hennar, og líka skemmtiefni, persónulegir hlutir frá henni, og þú getur spjallað við hana og sent fyrirspurnir. Mjög vel uppsett, skemmtileg og fróðleg heimasíða um mikilvæg málefni og gaman í bland.

Slóðin á heimasíðu þessarar huggulegu og gáfuðu konu er:
http://www.althingi.is/astam/

xDkynslóðin