Jæja, þá er komið að því að klára þetta um misgáfulegar ályktanir og svona stikla á stóru þar til DAPO(DAvið's POlitzei, svona sambland af Stasi og Gestapo) nær í skottið á manni. Byrjum þá ballið:
Utanríkis- og varnarmál

“Ungir sjálfstæðismenn leggja áherslu á að á Íslandi vaxi og dafni frjálst og opið samfélag. Íslendingar eiga að taka á þátt í samfélagi þjóðanna og samstarfi lýðræðisríkja um vernd mannréttinda og vera málsvari viðskiptafrelsis.” Málsvari viðskiptafrelsi?? Hvernig er nú með landbúnaðinn og ekki má gleyma því að íslensk stjórnvöld(að skipun Eimskips) kvörtuðu við BNA að Atlantsskip fengu flutning fyrir varnarliðið. Síðustu ár hefur kærum fjölgað á hendur íslenska ríkinu fyrir brot á mannréttindum ýmis konar sem hafa farið fyrir Mannréttindadómstól Evrópu.Ekki má gleyma skerðingu á tjáningarfrelsi(reykingalögin):)

Ætla mér ekki að fjalla um ESB-hluta yfirlýsinganar þareð ég á erftit með að mynda mér skoðun á þeim málum en finnst þó að það megi skoða almennilega til að sjá alla kosti og galla án þess að þurfa að hlusta á hræðsluáróður úr báðum herbúðum

“Í ljósi mikillar útgjaldaaukningar í utanríkisþjónustunni undanfarin ár leggur SUS áherslu á að þegar Sjálfstæðisflokkurinn tekur við stjórn málaflokksins verði tækifærið nýtt til þess að skera niður og hagræða í rekstri sendiráða.” Tími til kominn, við erum með utanríkisstefnu á við stórveldi eins og BNA. Sendiráð í Mósambik og svoleiðis er algjör óþarfi fyrir litla þjóð eins og okkur og verið að byggja þvílíkar glæsihallir í þeim löndum sem við erum með sendiráð með peningum sem hafa fengist með sparnaði í velferðarkerfinu, sýnir brenglun í forgangsröð þessara manna á Alþingi. Sukk og svínarí.

“Um þessar mundir sækist Ísland eftir því að taka sæti í Öryggisráði Sameinuðu þjóðanna árið 2009. Ljóst er að kostnaður vegna framboðs Íslands er töluverður, bæði vegna kosningabaráttu sem nauðsynlegt er að heyja og þeirrar stækkunar sem yrði á umfangi utanríkisþjónustunnar næði Ísland sæti í ráðinu. Þá er á það að líta að meirihluti þeirra mála sem tekinn er fyrir af Öryggisráði Sameinuðu þjóðanna eru málefni sem Íslendingar hafa hingað til lítið beitt sér í. Ungum sjálfstæðismönnum þykir á það skorta að sýnt sé með skýrum hætti fram á þann ávinning sem af setu í Öryggisráðinu hlýst og hvað það er sem Ísland mun leggja áherslu á í starfi sínu í ráðinu.” Ég tek nú undir með þeim hvað í andskotanum viljum við í Öryggisráðið nema þá sem já-þjóð fyrir Kanann? Ef við fengjum neitunarvald þá væri það gaman, gætum tekið smá syrpu til að valda fjaðrafoki og sýna hvað við höfum mikið vald á alþjóðavettvangi:) Annars er þetta peningaaustur og enn eitt sukkið í utanríkismálum sem almenningur mun borga brúsann fyrir. Sýnir bara að Framsókn á ekki að koma nálægt almannafé, þeir munu nota það í svall og svínarí og eitthvað sem kemur almenningi illa.

“Mannréttindi eru algild og án landamæra. Þegar íslensk stjórnvöld eiga í samskiptum við stjórnvöld ríkja sem fremja alvarleg mannréttindabrot, svo sem Kína, er mikilvægt að í hvert sinn sé mótmælum vegna brotanna komið á framfæri með skýrum og afdráttarlausum hætti. Samband ungra sjálfstæðismanna telur slík samskipti líklegri til þess að hrinda af stað umbótum í slíkum ríkjum heldur en samskiptaleysi.” Einhvern veginn efast ég um að mannréttindabrotum hafi verið mótmælt við Kínverjanna, frekar að Kínverjar hafi kennt aðferðarfræði í stjórnun
almennings auk chinese water torture. Ríkisstjórnin er örugglega með brúna tungu eftir allar þessar rassasleikingar við kínverska ráðamenn enda Der Fuehrer mikill áhugamaður um einræði. Held nú samt að þetta sé rétt hjá þeim að hafa samskipti við svona lönd og mótmæla þó þessi ríkisstjórn muni aldrei gera svoleiðis.

2. Varnarmál

“Íslenska ríkið ber ábyrgð á því að öryggi og frelsi þeirra sem dvelja á Íslandi sé varið.” Nei, sko, þeir vilja ekki að þetta sé í höndum einkaaðila

“Samband ungra sjálfstæðismanna skorar á ríkisstjórn Íslands til þess að hefja vinnu hið fyrsta við nákvæmt mat og skilgreiningu á lágmarksvarnarþörf landsins í tengslum við endurskoðun á framkvæmd varnarsamningsins…….Hugsanlegar ógnir við íslenskt öryggi stafa ekki einvörðungu af hefðbundnum hernaði og varnarviðbrögð Íslendinga þurfa að taka mið af því. SUS hvetur til þess að Íslendingar taki aukinn þátt í eigin vörnum og skoðað sé með hvaða hætti slíkri þátttöku yrði best fyrir komið.” Íslenskur her finnst mér bjánaleg hugmynd enda höfum við ekki efni á svoleiðis og hvar eiga peningarnir að koma frá, það kemur allavaega ekki til greina hjá SUS að hækka skatta á fyrirtæki, spurning með 80% skatt á einstaklinga? Einhver talaði um það nýlega að eina ástæðan fyrir því að Sjálfstæðismenn vildur her(og leyniþjónustu væri til að beita honum gegn almenningi ef þeir sæu fram á að fara að missa völdin eða menn mótmæltu einhverju eins og Kárahnjúkavirkjun og kínverskum góðvinum eða töluðu illa um Der Fuehrer eða gleymdu að bæta nafninu hans inn í faðir vorið. Kæmi mér allavega ekkert á óvart:)

Jæja, skoðum hvað SUS-arar hafa til málanna að leggja í velferðarmálum:

“Velferð hvers einstaklings er fyrst og fremst undir honum sjálfum komin enda felst hún í margbreytilegum þáttum sem aðeins hann getur skilgreint. Því er einstaklingum best treystandi til að tryggja sína eigin velferð og er nauðsynlegt að skapa honum sem mest svigrúm til þess. Í frjálsu þjóðfélagi fæðast flest tækifærin til að ná settum markmiðum og uppfylla margbreytilegar þarfir hvers og eins. Öflugt ríkisvald takmarkar þessa kosti og heldur aftur af fólki sem vill auka velferð sína og um leið annarra. Því ber ríkisvaldinu að lágmarka afskipti sín af velferð borgaranna. ” Semsagt every man for himself, survival of the meanest(eða þannig). Ríkisvelferðarkerfi(og þá er ég að tala um menntun, félagslegt og heilbrigðiskerfi) gefur öllum einstaklingum jöfn tækifæri í þeim málum, ekki bara þeim sem eiga pening og fæðast heilbrigðir, virðist fara í taugarnar hjá SUS að sumt fólk þurfi aðstoð frá ríkinu og geti ekki bara drepist eða betlað út á götum. Hvernig er með lítilmagnann, þá sem geta ekki veitt sér björg? Einhvern efa ég að menn eins og Kaupþings-menn láti sér annt um borgarana.

“Ungir sjálfstæðismenn telja frjálst hagkerfi og öflugt atvinnulíf undirstöðu velferðar á Íslandi. Álögur ríkisins, verndarstefna, tollar, tilskipanir og reglugerðir draga úr hagkvæmni atvinnulífsins og hægir á vexti þess. Það er fólkið, ekki ríkisvaldið, sem knýr áfram lífskjörin í landinu. Því er það velferðarstefna að auka hér frjálsræði, minnka afskipti ríkisins af fólki og fyrirtækjum og auka um leið tekjur.” Fyrsta setning er ég sammála en velferð skilgreini ég sem félagslegan, heilsufarslegan og menntunarpakkann, ekki atvinnulífið þó það hafi áhrif. Afskiptaleysi þýðir ekkert endanlega aukning tekna að mínu áliti því ef fyrirtæki fá að hegða sér að vild þá eru þau alveg tilbúin til að eyðileggja lífsviðurværi fólks og samfélög fyrir nokkrar krónur, það þarf að hafa eftirlit með atvinnulífinu og veita því aðhald án þess að tryggja einokun eða fákeppni. Flokknum er nú frekar illa við Samkeppnisstofnun vegna þess að hún hefur verið að atast í eigendum Sjálfstæðisflokksins t.d. olíufélögunum, tryggingabransanum og hún verður örugglega lögð niður ef þeir fara að skoða flutningamarkaðinn, þá lætur Dabbi hnakka nokkra.

“Í frjálsu hagkerfi er tekjuskipting samkvæmt frjálsu vali. Tilraunir stjórnmálamanna til breyta tekjuskiptingu skerða því val einstaklinganna. Í því felst óréttlæti og frelsisskerðing. Eitt mikilvægasta hlutverk ríkisvaldsins er að tryggja jafnrétti meðal þegnanna. Þetta felur þó ekki í sér að ríkinu beri að tryggja fullkominn jöfnuð; einungis jöfn tækifæri. ” M.ö.o. það á að tryggja að þeir ríku verði ríkari og hinir geti bara étið skít

“Samband ungra sjálfstæðismanna telur nauðsynlegt að strengt sé öryggisnet fyrir þá sem ekki geta séð sjálfum sér farborða. Einstaklingi, sem stendur höllum fæti er nauðsynlegt að eygja möguleika á því að bæta lífskjör sín af eigin rammleik. Tryggja þarf að skattaumhverfið sé sniðið með þeim hætti að einstaklingur sjái sér augljósan hag í því að stunda vinnu fremur en að þiggja bætur ? hafi hann á annað borð val.” Þá verður nú vinna að vera til staðar:) og ég held nú að lítill hópur þeirra sem eru á bótum vilji vera það.Fólk getur nú lent í áfalli og verið atvinnulaus um skemmri og lengri tíma og bæturnar eru svo lágar að fólk varla skrimtir á þeim. Atvinnuleysi hefur verið að aukast að einvherju leyti á þann hátt að fólk er mun lengur atvinnulaust að ég tel. Allt í nafni “hagræðingar” sem er fínt orð fyrir brottrekstur.

“Til þess að hið opinbera velferðarnet hafi tilætluð áhrif er því nauðsynlegt að endurskoða skatta- og bótakerfið með það að makmiði að gera það einfaldara þ.a. þeir sem raunverulega þurfi á hjálp að halda, fái hana; en hinir, sem eru færir um að stunda atvinnu og afla sér farborða, hafi til þess nægileg tækifæri og hvatningu. ”Kannski er það ég en þeir virðast vilja að ríkið skaffi einnig vinnu og sjái um þá sem missa vinnu í nafni hagræðingar, finnst nú að fyrirtækin eigi að leggja til eitthvað þar til atvinnusköpunar. Þetta er svona svipað og BNA og Írak, rústa fyrst öllu og ætlast til að aðrir borgi brúsann.

“Taka mætti velferðarkerfið til gagngerrar endurskoðunar með það fyrir augum að tryggja öllum ákveðna grunnframfærslu á grundvelli tekna eingöngu, en ekki annarra þátta sem oft eru tengd fátækt, s.s. húsnæðisstöðu, atvinnuleysis, örorku, elli o.þ.h. Þannig mætti einfalda kerfið svo um munar, styðja betur við bakið á þeim sem raunverulega eru fátækir og jafnframt minnka sóun fjármuna í formi styrkja til þeirra sem ekki þurfa á þeim að halda. ”Ég er nú ekki alveg að ná þessu en er þetta ekki bara að þeir sem eru gamlir, öryrkjar og atvinnulausir geta étið það sem úti frýs og vera ekkert að væla um bætur. Þetta er nú yfirleitt það fólk sem er fátækast

“Í rekstri velferðarþjónustu gilda lögmál framboðs og eftirspurnar rétt eins og í öðrum rekstri. Samband ungra sjálfstæðismanna leggur áherslu á að einstaklingar og félög séu betur í stakk búin að mæta þörfum viðskiptavina sinna, heldur en ríkið. Stjórnvöld eru hvött til gefa fólki aukin tækifæri til að virkja náungakærleik sinn með því að draga úr skattlagningu þannig að fólk hafi stærri hafi stærri hluta tekna sinna til ráðstöfunar. Óþvinguð samhjálp er á siðferðilega sterkari grunni. Það felst lítil reisn í því að gera góðverk á kostnað annarra. ” Mikla trú hafa þeir á náungakærleik annara(nokkuð sem þeir eru gerilsneyddir, flestir greyin) og ég hélt nú að þeir myndu ekki sjá á eftir þessum örfáu krónum sem fara í samhjálp frá ríkinu. En svona eru SUS-arar, láta Scrooge líta út eins og fyrirmynd samhjálparinnar:)

“Samband ungra sjálfstæðismanna leggur til að verkefni Tryggingastofnunar verði í auknu mæli færð yfir á hendur einkaaðila. Þannig er unnt að stuðla að hagkvæmari nýtingu skattfjár og gæði þjónustu aukist. Mikilvægt er að hver einstaklingur treysti á sjálfan sig hvort sem um er að ræða tryggingavernd fyrir slysum eða lífeyri til elliáranna.” M.ö.o. þeir vilja bandarískt kerfi í þessum málum og þeir sem eru fátækir eða minna mega sín geta rotnað þar sem þeir liggja.

Menntamál:

“Helstu lagabreytingatillögur:

1. Ríki og sveitarfélögum er skylt að greiða sömu upphæð með hverjum einstaklingi fyrir þá menntun sem hann velur sér á öllum námsstigum. Óheimilt er að mismuna skólum eða einstaklingum með mismunandi greiðsluupphæðum vegna rekstrarforms skólanna.
2. Einstaklingur hefur fullt val að velja sér einkarekinn skóla, borgar-/bæjarrekinn skóla eða ríkissrekinn skóla
3. Einkareknum skólum er heimilt að innheimta skólagjöld eða styrki ef þurfa þykir.” Er nú ekki verið að rukka inn skólagjöld nú þegar?

“SUS leggur einnig til að allar menntastofnanir séu undir Menntamálaráðuneyti ekki fagráðuneyti hvers skóla. Það er atvinnulífinu í hag að fjárfesta í menntun einstaklinga og tryggja sér þannig starfskrafta að námi loknu. SUS hvetur atvinnulífið til þess að horfa til þess tækifæris sem felst í að styrkja starfsmenn sína í nám fyrir fyrirtæki og rekstur” Sammála að þetta á allt að vera undir Menntamálaráðuneyti en á atvinnulífið semsagt að kaupa sér einstakling sem það sendir í nám og á svo það sem eftir er? Og hvað með þá sem vilja fara í nám sem atvinnulífið hefur ekki áhuga á.

Grunnskólastigið

· “Ríkisvaldið þarf að draga verulega úr afskiptum sínum varðandi kennsluhætti og kennslufyrirkomulag og auka þannig sveigjanleika í leiðum til náms. Þannig fá skólar meira sjálfstæði og geta markað sér sérstöðu” En þá má ekki láta fyrirtæki/trúarhópa sjá um námsefnið líkt í BNA, stærðfræðibók í boði Coke:)

· “ Auka þarf vægi einkarekinna skóla í landinu. Alþjóðleg samanburðarrannsókn (PISA) sýnir að þau lönd sem hafa farið út í einkarekstur og ríkið stendur undir mestum eða öllum kostnaði við skólakerfið standa sig betur í lestri og stærðfræði heldur en þau lönd sem ríkið stendur að menntun (sjá meðfylgjandi greinargerð). Samkeppni, þó ekki væri nema að hluta, hefur góð og mikil áhrif á skólakerfi sveitarfélaganna . Foreldrar eru neytendur þjónustu skóla á grunnskólastigi og skólarnir eiga að miðast við þarfir og kröfur þeirra. Aðlögun að þjónustu sem þessari gerist einungis ef samkeppni fær að njóta sín í grunnskólakerfinu.” Það er nú einnig það að hægri menn hafa yfirleitt dregið úr ráðstöfun fjárs til menntamála fyrir sín gæluverkefni

· “Námskrá grunnskóla, kjarasamningar, pólitísk viðhorf sveitarstjórna og grunnskólalög eru takmarkandi þættir fyrir sjálfstæði og framþróun grunnskóla. SUS leggur til að þessir rammar séu endurskoðaðir með samræmdri athugun með það að sjónarmiði að draga úr þeim þáttum sem hamla sveigjanleika skólastarfs. Eftir farsælan flutning skólastarfs grunnskóla frá ríki til sveitarfélaga er mikilvægt að draga úr ríkisafskiptum og veita skólum frelsi til sveigjanleika. ” Þetta er mjög athyglisvert hvað er takmarkandi, sérstaklega kjarasamningshlutinn. Farsæll flutningur, jamm, það eru nú skiptar skoðanir um það.

· “Aðalnámskrá grunnskóla hamlar sjálfstæði skóla töluvert. Eðlilegt er að einhvers konar lágmarksvísir sé að námskrá á skyldunámsstigi en ungir sjálfstæðismenn telja ramma aðalnámskrár vera allt of hamlandi. Þessar hömlur birtast í takmörkuðum fjölbreytileika skólanna.” Þetta þyrftu þeir að útskýra miklu betur, hvað takmarkar fjölbreytileikann og hvað veldur hömlum, getur einhver útskýrt

· “SUS hvetur Menntamálaráðuneytið leiti leiða til að meta árangur í grunnskóla á fleiri en einn hátt. Ríkið verður að hafa einhvers konar taumhald þar sem skylda er til náms. Mjög mikilvægt er þó að skólar hafi svigrúm til og viðurkenni mismunandi hæfileika einstaklinga og geti aðlagað námskrá sína hvort sem um er að ræða bráðger börn eða börn sérþarfir. Miðstýringu fyrrgreindra ramma þarf að takmarka þannig að sveigjanleiki og sjálfstæði skóla fái að njóta sín til fulls (sjá greingargerð).” Vilja ekki ríkisafskipti, vilja ríkisafskipti, getið þið ákveðið ykkur

· “ Mat á skólastarfi er á ábyrgð ríkisins en á að vera í höndum einkaaðila til þess að grunnskólar fái hlutlaust mat á starfi sínu” Semsagt ríkið á að vera fjárþúfa fyrir einkaaðila

· “Námsgagnastofnun skal leggja niður í núverandi mynd til að auka framboð á námsefni. ”Umhverfisfræði í boði Alcoa

Leikskólstigið(læt þetta fylgja með þó ég hafi enga skoðun nema hvað þeir taka alltaf Reykjavík sem dæmi um eitthvað slæmt, ætli þeir séu eitthvað sárir yfir að stjórna ekki þar?)

· “ Skólastarf í leikskólum er farsælast í höndum einkaaðila. Leikskólar þjónusta foreldra og hver skóli á að þjóna foreldrum eftir þeirra þörfum og kröfum. Takmarkanir við þjónustu til foreldra eins og t.d. sumarlokanir skóla og takmörkun lestrarkennslu vegna kjarasamninga eru dæmi um óhófleg afskipti sveitafélaga ríkisvalds af þjónustu við börn, foreldra og atvinnulíf

· Tryggja þarf að leikskólinn verði í auknum mæli einkarekinn og fjárhagslegt öryggi verði tryggt þrátt fyrir pólitísk öfl hverju sinni. Þannig er valfrelsi foreldra aukið og gæði og hagkvæmni tryggð

· Mat á skólastarfi leikskóla þarf að vera í höndum einkaaðila en ekki framkvæmdaraðila þjónustu eins og tíðkast í dag. Sem dæmi fer fram gæðamat hjá Leiksskólum Reykjavíkur sem eru stærstu rekstraraðilar leikskóla og því ekki hæfir til að meta starf annarra rekstraraðila.

· SUS fagnar frumkvæði Garðabæjar að fjölga markvisst einkareknum leikskólum en harmar að sveitarfélög eins og Reykjavík dragi úr frumkvæði einstaklinga og geri einkareknum skólum erfitt fyrir með því að greiða ekki jafnháar upphæðir með börnum sem fara í einkarekna skóla og þeim sem fara í borgarrekna skóla

· Ungir sjálfstæðismenn hvetja nýja rekstraraðila til að stofna nýja eða taka yfir rekstur núverandi leikskóla”

Framhaldsskólastigið

· “ Ungir sjálfstæðismenn telja að rekstur framhaldskóla sé betur kominn í höndum einkaaðila en opinberra og hvetur nýja rekstraraðila til að stofna nýja eða taka yfir rekstur núverandi framhaldskóla” üff, þá byrjar fyrst að kosta í skóla og þrengjast hverjir geta stundað nám

·
· “ Verkmenntun er á undanhaldi á Íslandi og er það miður. Hluti af ástæðum þess er að verkmenntun felur að stórum hluta í sér skyldumenntun í bóknámi. Aukinn einkarekstur í framhaldsskólakerfinu og minni kröfur ríkisvalds um samræmd próf munu aðlaga námsframboðið að eftirspurn eftir verkmenntun og tryggja að þjóni hagsmunum nemenda og atvinnulífs (sjá greinargerð).” ég var í iðnnámi þannig að ég get talað af reynslu um þetta, þetta er rétt um skyldumenntunina í bóknámi en sumt af því er nauðsynlegt ef þú ætlar í áframhaldandi tækninám. Einnig er það að það hefur ekki þótt fínt að vera í iðnnámi heldur frekar gerast SUS-ari í viðskiptafræði eða svoleiðis og svo hefur nú Sjálfstæðisflokkurinn ekki verið hrifinn af því að eyða peningum í endurnýjun tækjabúnaðds o.fl. í verkmenntun ásamt því að svelta kerfið og eyða í gæluverkefni.

Háskólastigið

· “ Í raun má líta á menntun á háskólastigi sem einstaklingsbundin gæði. Ungir sjálfstæðismenn telja að með aukinni þátttöku einstaklingsins í fjármögnun menntunar sinnar verði námsval og námstími markvissari og kröfur til menntastofnana að sama skapi auknar. Af því leiðir að skólastofnanir á háskólastigi þurfa að huga meira að þjónustuþætti sínum við nemendur og eflist í samkeppni sín á milli. ”M.ö.o. háskólamenntun bara fyrir rík pabbabörn

· “Endurskoða þarf lög um háskólastigið með tilliti til rekstrarumhverfis skólanna. Deildir innan háskóla þurfa aukið sjálfstæði til framkvæmda og samninga við atvinnulíf og einstaklinga. Auka þarf tækifæri háskólanna til að afla sér sértekna. Eðlilegt er að þátttaka einstaklinga við kostnað aukist því lengra sem líður á námið.” Þessi háskólakafli virðist ganga út á það að búa eigi til elítu menntaðra auðkýfinga þannig að þetta verði svona yfirstétt yfir landinu a la S-Ameríka

· “Skilyrði háskóla vegna nýjunga og stofnun deilda eiga vera sem opnust og sem minnst háð pólitískum öflum hverju sinni. Menntamálaráðuneyti ber að samræma þær kröfur sem gerðar eru til háskóla um starfsleyfi og stofnun deilda. Stjórnendum háskóla er best treystandi fyrir því að leggja í þá vinnu og áhættu sem felst í því að bæta við námsúrval skólans. Tryggja þarf rekstraröryggi háskóla óháð rekstrarformi.” Heyr, heyr og Sjálfstæðismenn eiga að sjá til þess að skólarnir geti verið með góð tæki og græjur í staðinn fyrir stöðugan niðurskurð
·
Lánasjóður íslenskra námsmanna

· “Þjónustuþætti ánasjóðs íslenskra námsmanna er betur kominn sem í höndum útlánastofnana en í vörslu og rekstri ríkisins. Þannig er tryggð hagræðing sjóðsins, aukin þjónusta við nemendur og bættur rekstur” Bankar veita aldrei góða vexti, myndi leiða til hærri skulda einstaklinga og þetta yrði algjört gróðadæmi fyrir bankanna, ekki hagstætt fyrir námsmenn.

· “ Samband ungra sjálfstæðismanna telur að enn mætti skoða hækkun frítekjumarks. Afnema á kröfu um ábyrgðarmenn með vísan í að allir eiga jafnan aðgang að námslánum.” Alveg sammála og bara afnema ábyrgðarmannakerfið með öllu, það er fyrir neðan allar hellur.

Jæja, læt þetta nægja yfir ályktanir SUS, skemmtilesning á köflum og óhugnanlegri en The exorcist annars staðar. Finnst nú margar af þessum yfirlýsingum veruleikafirrtar og hef einhvern veginn á tilfinningunni að mikið af SUS-urum seú svona ríkir pabbastrákar sem hafa aldrei unnið almennilega vinnu, verið reddað allt í gegnum tíðina og telja það að fólk geti bara kennt sér um ef það sé fátækt, hungrað, fæðst með örorku og svoleiðis fólki sé engin vorkunn og skuli lóga helst Einhver skoraði á mig að taka ályktanr ungliðahreyfingar VG í gegn og hver veit, ef maður er í stuði að taka þær fyrir, örugglega ágætis skemmtilesning einnig þar á ferð.