“Ef þú þiggur styrk úr einkareknum sjóði þá þarft þú að borga lánið aftur með vöxtum”

Ef þú þiggur námslán frá ríkinu þarftu að gera nákvæmlega hið sama, nema hvað að ríkið þarf ekki að vera samkeppnishæft hvað varðar vexti. Það þurfa einkareknar lánastofnanir að vera. Svo ef þú færð styrk þá þarftu aldrei að borga hann til baka. Lán borgar maður til baka en styrki ekki.

“Málið er að ef allt er einkarekið þá er það alltaf sama fólkið sem er fátækt og það sem er ríkt heldur líka áfram að vera ríkt kynslóð eftir kynslóð.”

Þetta er einfaldlega ekki rétt. Þetta er ekki málið, og er þveröfugt við rauveruleikann. Þú ert að ímynda þér eitthvað lénskerfi eins og var á miðöldum þar sem auður var skapaður af þegnum handa lénsherrunum. En merkilegt nokk, í því kerfi var ekkert einkarekið. Þar var allt rekið af lénsherrum, sem voru eins konar ríkisstjórn yfir ákveðið landsvæði. Aftur á móti í einkavæddum iðnaði þá eru neytendur herrarnir og eigendur fyrirtækja eru þegnarnir. Fyrirtæki svara til neytenda og viðskiptavina, sem merkilegt nokk eru sama fólkið og vinnur í fyrirtækjunum. Einkavæðing færir þannig völdin til fólksins.

“Verðmætin verða ekki til úr einhverjum hugmyndum. Þau spretta af auðlindum einsog fiskinum”

Fiskurinn veiðir sig ekki sjálfur. Verðmætin verða til úr fiskveiði, ekki úr fiskinum. Verðmætin verða til úr hugviti sem þarf til að nýta auðlindir. Þetta er grunnurinn að kapítalismanum. Ef við værum enn að veiða fiskinn með berum höndum þá fengjum við ekki mikið fyrir vinnu okkar. En með hugvitinu byggðum við net til að veiða meiri fisk, og báta til að róa út á meira dýpi, síðan togara og dragnótir til að veiða ennþá meira, og enn skilvirkar. Það hefur oft verið sagt að upphafið að efnahagslegu sjálfstæði Íslands hafi verið þegar fyrstu togararnir komu til landsins. Hvernig komu þeir hingað? Jú, þeir voru keyptir fyrir peninga sem kom frá seldum fiski. Þeir gátu síðan notað togarana til að veiða enn meira og fá enn meira af peningum fyrir fiskinn því það kostaði minni vinnu á tonnið. Þá peninga notuðu þeir svo til að kaupa fleiri togara. Og með nýjungum og auknu hugviti getum við skapað enn meiri auð, með minni vinnu og kostnað á tonnið af fiski. Þannig er það hugvitið en ekki auðlindin sem skapar auðinn.

“Málið er að það hafa bara ekki allir efni á því að spara hluta af laununum sínum.”

Nei, ekki meðan þeir borga þetta himinháan skatt.

“Væri ekki rétt að skipta gróðanum jafnt á milli fólkssins í stað þess að mismuna því með einkavæðingu?”

Það felst engin mismunun í einkavæðingu. Þvert á móti. Það hafa allir jafnan rétt til að reka fyrirtæki í þeim geira sem þeim sýnist. Nema í þeim geirum þar sem ríkið er með einokunarvald. Þar er lokað á alla samkeppni með skyldufjármögnun. Í skyldufjármögnun felst síðan mismunun því ekki allir eru skyldaðir til að fjármagna jafn mikið.

“Þannig að stjórnvöld geta aldrei verið spillt því að allt sem þeir setja í lög eru lög?”

Jú, því lög geta verið ólögleg. Það eru ekki öll lög jafn gild. Til dæmis lög sem stangast á við stjórnarskrána. En stjórnvöld geta ekki verið spillt ef þeim eru ekki gefin þessi gífurlegu völd. Við þurfum að minnka ítök stjórnvalda og hagsmunaárekstra einmitt með því að einkavæða. Stjórnvöld eiga ekki að þjóna neinum tilgangi öðrum en að vernda frelsi einstaklinga og halda uppi lögum og reglu. Ef tilgangur þeirra er enginn annar þá er ekkert pláss fyrir neina spillingu og engin þörf á spilltum lögum.

“Ef hinsvegar skólinn væri ríkisrekinn færi sá hagnaður…”

Ókei, hérna ertu bara að bulla. Það er enginn ríkisrekinn skóli rekinn með hagnaði. Slíkt hefur aldrei gerst. Peningarnir sem við ausum í þessi apparöt einfaldlega tapast. Það er enginn ábyrgur fyrir því tapi og þess vegna batnar það seint eða aldrei. Það þykir mér aum fjárfesting og hrein kúgun að skylda mig og þig til að fjárfesta í slíku peningagímaldi.

“Einu flokkarnir sem sóa skattpeningnum er Sjálfstæðisflokkurinn.”

Þetta er rugl og þú veist það. Allir flokkar í stjórn sóa peningum af því að þeir mega það. Við gefum þeim til þess vald. Þetta vald þurfum við að taka frá þeim. Það á að vera undir fólkinu (einstaklingnum) komið í hvað peningarnir þeirra fara og í hvað þeim er sóað.

“Málið er bara að Sjálfstæðisflokkurinn er búinn að vera alltof lengi í stjórn og fólk er búið að gleima hvenær skattpeningunum var síðast eitt á skynsamlegan hátt”

Hvenær var það? Manstu það? Aldrei, það er svarið. Hvorki sjálfstæðisflokkurinn né neinn annar flokkur í nokkurri íslenskri stjórn hefur nokkurn tíma eytt peningum skynsamlega. Enda ættum við ekki að treysta stjórnvöldum til þess. Við ættum ekki að treysta neinum nema sjálfum okkur fyrir að eyða peningunum okkar.
Stjórnvöld ættu að fá rétt nóg til að reka lögreglu, dómstóla, alþingi, o.s.frv. Öllu umfram það ættum við að halda fyrir sjálf okkur og ráðstafa eins og okkur þykir viðeigandi.
Eins og ég segi, við þurfum ekkert fyrirvit og enga fóstru. Við getum alveg treyst sjálfum okkur fyrir eigin samfélagi.

“Þeir fá sangjarnt verð fyrir þjónustu sína því hún er bara niðurgreidd af ríkinu.”

Það er einmitt þess vegna sem þeir fá ekki sanngjarnt verð fyrir sína þjónustu. Þeir fá ekki að selja sína þjónustu á frjálsum markaði. Eini viðskiptavinur þeirra er ríkið sem jafnframt er vinnuveitandi þeirra. Læknar fá ekki að vera í samkeppni hvor við annan þess vegna. Þeir hgnast ekkert á að undirbjóða og þess vegna er engin verðþróun. Læknar borga einnig háa skatta og niðurgreiða þannig eigin vinnu.

“En ef einhver einn aðili mundi ná eiokun á markaðinum þá gæti hann hinsvegar hagnast gríðarlega á því að borga sínum starfsmönnum lág laun!”

Ekki án þess að leggja einokunarstöðuna undir. Því ef einokunaraðili borgar lág laun þá opnar það leið fyrir smærri aðila sem gætu boðið hærri laun, dregið þannig til sín besta starfsfólkið og haslað sér völl á markaðnum. Þetta sjáum við í sífellu gerast. Bæði á símamarkaði, í hugbúnaðargeiranum, tryggingamarkaði, neysluvöruiðnaði og merkilegt nokk í sjávarútvegi.