Rangfærslurnar og útúrsnúningarnir sem vinstrimenn eru stöðugt með gagnvart Sjálfstæðiflokknum og verkum ríkisstjórnar Davíðs Oddssonar ætlar aldrei að linna.

Ég ætla að byrja á því að segja frá sex ástæðum fyrir því að ég kýs Sjálfstæðisflokkinn:

1) Ég er fylgjandi hraðvaxandi stéttaskiptingu í landinu.

2) Ég er fylgjandi forgangi útgerðaraðalsins að auðlindum hafsins.

3) Ég er fylgjandi miklum skattalækkunum. Menntun, læknisþjónusta og fleira ættu notendur þjónustunnar að greiða sjálfir. Skattgreiðendur eiga ekki að þurfa að halda uppi einhverjum aumingjum.

4) Ég er fylgjandi fleiri orkuverum á ósnortnum víðernum landsins.

5) Ég er fylgjandi hrikalega hárri og áhættusamri ríkisábyrgð handa bandaríska fyrirtækinu deCode, sem verður afgreidd eftir kosningar.

6) Ég er fylgjandi undirlægjuhætti stjórnvalda gagnvart nýrri heimsvaldastefnu Bandaríkjanna, sem einkum beinist gegn smáríkjum.


Morgunblaðið hefur upplýst, hver sé árangur velmegunarinnar, sem dásömuð var á landsfundi Sjálfstæðisflokksins í byrjun aprílmánaðar. Stéttaskipting hefur aukist í skólum landsins og íþróttafélögum. Hún lýsir sér m.a. í, að sum börn hafa ekki efni á að kaupa skólamáltíðir eða stunda íþróttir. Þetta er upphafið að árangrinum af vaxandi kostnaðarhlutdeild almennings í þjónustu, sem beint eða óbeint er á vegum hins opinbera. Við siglum áleiðis til þjóðskipulags Bandaríkjanna, þar sem auðræði hefur leyst lýðræði af hólmi, þar sem meira en allur hagvöxturinn fer í að bæta kjör þeirra allra best settu, og þar sem almúginn verður sífellt fátækari. Sjálfstæðisflokkurinn mun færa okkur slíkt þjóðskipulag. Kjósum rétt, X-D.

Forza Islanda
Áhrif fjárglæframannsins Silvio Berlusconi, sem er forsætisráðherra Ítalíu, ná til Sjálfstæðisflokksins á Íslandi. Á landsþingi flokksins blasti við íslenskað slagorð Berlusconi: Forza Italia, Áfram Ísland. Þetta er ekki í fyrstu ítölsku áhrifin á íslensk stjórnmál. Áður hafði Sjálfstæðisflokkurinn tekið upp slagorð fasistans Mussolini: Stétt með stétt. Búast má við, að nýja slagorðið verði áhrifamikið í kosningunum, rétt eins og hin róttæku yfirboð flokksins á skattalækkunarloforðum hinna flokkanna. Yfirboðin eru einnig að hætti Berlusconi, sem náði nægu fylgi í síðustu kosningum á Ítalíu til að verða forsætisráðherra og láta hjá líða að efna loforðin. Huliðshjálmurinn, sem Sjálfstæðisflokkurinn vill hafa yfir samskiptum stjórnmála og peningafursta, er einnig að hætti Berlusconi. Þess vegna ræður kolkrabbi ríkjum í báðum löndum.

Sjálfstæðisflokkurinn er frábær stjórnmálaflokkur
Sjálfstæðisflokkurinn er magnaður stjórnmálaflokkur. Hann geta allir stutt, sem eindregið eru samþykkir hinni nýju heimsvaldastefnu Bush forseta og fjöldamorðum Bandaríkjanna á Írökum. Hann geta allir stutt, sem eindregið vilja aukinn mun á lífskjörum ríkra og fátækra hér á landi. Hann geta allir stutt, sem eindregið vilja, að samskipti stjórnmálaflokka og peningafursta séu áfram höfð undir huliðshjálmi. Hann geta allir stutt, sem eindregið vilja láta reisa sem flest orkuver í óbyggðum Íslands. Hann geta allir stutt, sem eindregið vilja alls ekki, að rætt sé um hugsanlega aðild okkar að Evrópusambandinu. Hann geta allir stutt, sem eindregið vilja ekki, að þjóðin öll eigi auðlindir sjávar. Hann geta allir stutt, sem eindregið vilja, að ráðherrar beiti valdi sínu gegn framkvæmdum á höfuðborgarsvæðinu. Sjálfstæðisflokkurinn hefur skýra stefnu í verki. Hann er nákvæmlega flokkur, sem Íslendingar eiga skilið. Kjósum rétt, X-D.