Fréttir frá fréttastofu sorpsins, Guðbjartur Magnús Hálfdánsson flytur fréttir.
Í fréttum er þetta helst:

Einræðisherran á batavegi eftir alvarlegt taugaáfall.

Mikill fögnuður braust út hjá mörgum samstarfsmönnum Einræðisherrans úr Nóvemberhreyfingunni er hann sneri til skamms tíma aftur í sjónarsviðið. Hafði hann verið talinn hafa fallið í launsátri um það leyti er friðarsamningarnir sem bundu enda á Nóvemberstyrjöldina voru undirritaðir. Það reyndist þó ekki á rökum reist, en eftir því sem fréttastofa kemst næst olli mikið álag á honum í átökunum því að hann fékk alvarlegt taugaáfall og var því óhæfur til að stjórna áfram. Viðmælendur fréttastofu telja líklegt að hátt settir meðlimir Nóvemberhreyfingarinnar hafi vísvitandi veitt rangar upplýsingar um ástand hans til að efla samstöðu innan veldis þeirra, en mikill órói hafði myndast meðal almennings í kjölfar langvarandi og blóðugs innrásarstríðs hreyfingarinnar.

Áreiðanlegar heimildir fréttastofu segja Einræðisherran hafa verið óviðræðuhæfan, einrænan og langt niðri mest allan desembermánuð. Hann hafi margsinnis reynt að deila með núlli á þeim tíma, en sem betur fer hafi það ekki gengið upp. Þá mun hann einnig hafa haft uppi hugmyndir um gerð zombie-panda, læðubreimingja og jarðaberjagrauts búnum hugarstjórnunareiginleikum. Hvernig hann hins vegar slapp úr einangrun vildi heimildarmaður fréttastofu ekki láta upp, en biður alla þá sem verða hans varir að hafa samband við viðeigandi yfirvöld.

Árás á páfa Bananakusks.

Hinn heimskunni Svarti Sauður, áður Snjói, stofnaði nýverið trúfélagið Bananakusk og krýndi um leið sjálfan sig páfa þess. Segir þar að lifi menn lífsins til fulls eigi þeir vísa vist á himnum, en séu þeir almennt niðurdrepandi þýði það ekkert annað en eilífar vítiskvalir í iðrum jarðar. Mikil sigling var á aðsókn í hreyfinguna fyrst um sinn, en eftir ítrekaðar hótanir hins bókstafstrúlausa hryðjuverkahóps Tilvistarlaus hendi Guðs hefur nokkuð dregið úr nýmönnun innan trúfélagsins.

Nýjustu fregnir herma að snemma í morgun hafi herskáir meðlimir hópsins ráðist inn á vandlega varðað heimili páfa, kyrfilega bundið hann við borðstofustól, keflað með blautum ullarsokk og haldið yfir honum gríðarlega langdregna ræðu um illsku trúarbragða. Það var ekki fyrr en undir miðnætti er sérþjálfuðum lífvörðum Sauðsins tókst að yfirbuga árásarmennina, en hann var þá orðinn lífshættulega þjakaður af leiðindum. Að sögn vakthafandi læknis er líðan hans eftir atvikum góð.

Sorpari ársins kosinn á fölskum forsendum.

Ofurkrullkrúttið Mogwaii, sem nýlega vann sér það til frægðar að vera kosinn sorpari ársins, er víst ekki allur það sem hann er séður. Hann hefur gabbað ótrúlegasta fólk, en fyrir einskæra heppni tókst fréttamanni sorpsins fyrr í vikunni að ná viðtali við móður hans og komast nær köldum sannleikanum. Mogwaii er ekki tólf ára krjúttpjakkur í raun og veru, líkt og hann hélt fram til að herja út atkvæði grandvaralausra sorpara, heldur ríflega fertugur hálsskeggur (e. neckbeard) og iðjuleysingi. Að sögn móður sinnar eyðir hann mest af sínum tíma í í tölvunni í skítugu herbergi sínu, sem hann tók ekki til í fyrir jólin. Þá borgar hann ekki leigu og er með sífelldan skæting við móður sína eins og versta unglingsstúlka.

Ekki bætir úr skák að móðir Mogwaii er 75% öryrki sökum offitu og kvíðaröskunar, sem hún segir að miklu leyti stafa af hegðun sonar síns í gegn um tíðina. Þrátt fyrir mikla fjárörðugleika til margra ára hefur hann ætíð neitað að sækja um vinnu, er ekki í bótarétti til atvinnuleysisbóta og neitar alfarið að borga heim með þeim peningum sem hann fær upp úr krafsinu við að selja gull í WOW.

Öllum sem vilja hjálpa móður Mogwaii er bent á að leggja inn á bankareikning hennar: 0619 26 678891, kt. 141245-4169.

Fleira verður það ekki að sinni, fréttastofan þakkar áheyrnina og býður góða nótt.

[youtube]http://www.youtube.com/watch?v=OExk13DDq_Q