Ég ætla að skrifa um eitthvað.

Eitt hvað. Hvað. Hvað? Eitt hvað. Eitt hvað er oft notað sem beiðni um ítrekun á oft flóknum upplýsingum. Dæmi:

-Binni býr brátt á býsna bláum babú-bíl.
-Hvað?

Íslendingar hneigjast jafnan vegna smæðar sinnar að halda að grasið sé grænna hinum megin Atlantshafsins (sem er reyndar rétt) og teygja sig í orðið what þegar eitt hvað gæti leyst málið.

Tvö hvað eru aftur á móti merki um yfirvegun og vilja til að hinn aðilinn slaki á. Dæmi:

-Sigurjón stærðfræðikennari tók af mér vasareikninn því það er bannað að vera með tölvur í tíma, og núna get ég ekki skrifað íslenskuritgerðina mína!
-Hvaða, hvaða.

Þarna erum við komin með tvö hvað.

Það er þó ekki víst að eitthvað merki eitt hvað. Stundum er bara um einhverja hendingu að ræða. Ritgerðin Um eitthvað gæti þannig endað í orðasalati á við þetta:

Þú hljópst undir lampa og kirkjan flaug hátt. Hann kveikti ljótt þegar fljóta tölvan skaut heimskri kúlu yfir hauskúpuna. Ég skaut þig við kynþokkafulla ljónið þegar borðið horfði á hann ríða gíraffa í flamingóa.

Eitthvað er þannig eitthvað sérstakt, en ekkert merkilegt. Sé það hægt verður fjallað um það í næstu grein í flokk óákveðinna fornafna, um allt.