Nú er kominn tími til að koma af stað umræðu um eitt mesta hitamál samtímans, eitthvað sem brennur á hjarta okkar allra án þess að jafnvel vita það.
Sumir hafa eflaust pælt meira í þessu en aðrir og aðrir hafa ekki hugmynd um að þetta er þeim hjartans mál og mikilvægi þess vegur meira en líf þeirra sjálfra.
Að sjálfsögðu er ég að tala um Færeyjar og þeirra áform um yfirtöku Íslands og mögulega heimsins. Stefnir þetta í einhversskonar misheppnaða tilraun að heimsyfirráðum eða er þetta eitthvað áhyggjuefni?
Þessari spurningu er auðsvarað, þetta er áhyggjuefni fyrir alla sem bera hag þjóðarinnar fyrir brjósti.

Þið gætuð vel verið að hugsa ‘Hvað er þessi rugludallur að rugla?’ en á bak við skrif mín býr mikil viska og fróðleikur sem annar hver maður á eyjunni er bara því miður ekki gæddur.
Svört áform Færeyinga um yfirtöku fara dafnandi og á hverjum degi komast þeir nær því að fullkomna áætlun sína.

Hvers vegna hafið þið aldrei heyrt um þetta áður?
- Vegna þess að þetta eru háleyndar aðgerðir, það fyrirfinnast jafnvel Færeyingar sem hafa ekki heyrt um þetta mál… Aðeins er talið að um 2/5 af þjóðfélaginu sjái um skipulagningu en að allt upp í 70% taki þátt í yfirtökunni sjálfri.
Þá værum við að tala um tæp 20.000 manns í skipulagningu, og 34.000 manna her sem færi í yfirtöku, en ekki eru allir sem taka þátt í henni enn meðvitaðir um að þeir muni gera það…

Hvernig ættum við mögulega að stoppa þetta?
- Jú, svarið er einfalt… Með snöggum tiltækum aðgerðum væri hægt að fara í skjóta viðbragðsstöðu og stöðva þennan nýlega myndaða her sem fyrst, áður en hann breiðir úr sér og tekur að stækka og gæti myndast útfrá því jafnvel skæðasta aflífunarsveit sem heimurinn mun nokkurn tíman augum bera eða jafnvel detta í hug að verði til.
Ef við horfum á þetta sem svo að herinn er ~100.000 mönnum færri en t.d. þýski herinn er í dag, er ekki fjarstætt að reyna stöðva þetta enn sem komið er.

Er þetta raunverulega eitthvað til að óttast?
- Sem stendur stafar okkur ekki ógn af þessum óþekkta her, enda könnumst við Íslendingarnir ekki við aðrar þjóðarhetjur samtímans í Færeyjum nema jú Brandur Enni sem stendur sannarlega fyrir nafni.
Við erum að tala um menn sem gætu verið sambærilegir fyrrum þjóðarhetjum þeirra eins og Tróndur í Gøtu(smella fyrir mynd) eða Sigmundur Brestisson sem þið þekkið að sjálfsögðu sem mannin sem kynnti Færeyingum fyrir kristindómi.

Ég vona að þið kæru lesendur séuð meðvitaðri um hvert þessi heimur stefnir eftir þennan lestur, heimsyfirráð Færeyinga eru yfirvofandi og við gerum allt til að stöðva það!

Allar fyrirspurnir eða umræður eru vel þegnar í Álit við þessari klausu…