Einu sinni var rammfölsk byssukúla sem var bannað að taka þátt í Eurovision því hún var svo rammfölsk að það hálfa væri nóg til að kæfa fíl í miðri skíðagöngu.

Og svo þegar byssukúlan var búin að jafna sig á grátkastinu sem fylgt hafði í kjölfar þessarar staðreyndar, komst hún að því að hún hafði grenjað úr sér augun. Hún gargaði svo að það heyrðist langar leiðir og lungun hentust út úr henni. Þá kom göldróttur fataskápur að nafni Skímir og gaf byssukúlunni ný augu. Og ekki nóg með það heldur gaf skápurinn henni líka ný lungu. Þá varð byssukúlan ofsaglöð og sagði Skími besta vin sinn en við þetta roðnaði hann svo að það kviknaði í honum og hann brann og dó. Þá varð byssukúlan ofsareið og sparkaði í öskuhrúguna og axlarbraut sig. Kúlan staulaðist því upp á sjúkrahús og þar var grænklædd töfradís sem gat læknað allt nema brotnar axlir, þannig að kúlan þurfti að leita hjálpar annars staðar. Þetta líkaði henni alls eigi og því hentist hún út úr sjúkrahúsinu og sofnaði á gangstéttinni.

Þegar kúlan vaknaði, þrem dögum seinna, var verkurinn ekki enn horfinn. “Fjandakornið!” beljaði hún. Svo hélt hún af stað, ákveðin í að finna fimm stjörnu gæðaspítala í Rússlandi.

Eftir mikla leit og finkembingu á gervöllu Rússlandi hafði byssukúlunni ekki enn tekist að finna fimm stjörnu gæðaspítala. Þannig að hún stofnaði hann og hafði hundrað og súrkál Rússa í vinnu þar. Svo skipaði hún Rússunum að lækna sig en þá urðu þeir bara reiðir og fóru fram á tvöhundruð % launahækkun. Þá gargaði byssukúlan okkar eins og henni einni var lagið (þó ekki svo ofsalega að lungun flygju út úr henni, hún hafði slæma reynslu af því að garga úr sér líffærin).

Kúlan lagði af stað til Kína eftir að hafa selt hinn rússneska gæðaspítala og gerðist sjálfkrýndur keisari yfir nýrri borg sem hún ákvað að reisa þar og nefna Hongkonglichibichibonghaiooa- tao chia. Og svo, í ljósi þess að kúlan átti sér ekkert nafn, skírði hún sig Byssukúlmund. Nafnið Byssukúlmundur var eilítið erfitt í framburði fyrir hinar fáu Kínverja-hræður sem bjuggu í Hongkonglichibichibonghaiooa- tao chia, svo hann leyfði þeim að kalla sig “Kúli”. Þegar hann gargaði svo á Kínverjana að lækna öxlina á sér, dóu þeir allir saman úr hræðslu (fyrir utan einn, en hann nagaði höndina á sér svo mikið að hún datt af og honum blæddi út). Þá gerði Byssukúlmundur árás á Hong Kong, stal galdrakústi og flaug til Afríku og hitti þar fyrir rauðklædda töfradís sem gat einungis læknað brotnar axlir. Eftir að hafa verið læknaður, öðlaðist Byssukúlmundur lífsfyllingu og fór til Ítalíu, þar sem hann sat úti og hugleiddi alls konar heimspekilegt rugl. Hann stirðnaði svo upp í þessum hugleiðingum sínum og varð þyrnir í augum flestra Í tala, svo þeir hentu honum til Ástralíu þar sem reiðir frumbyggjar réðust á hann og bjuggu til úr honum hveitimjöl.