Sara Ósk Friðriksdóttir. Og þá sá hann hana, þegar hún svaraði kennaranum. Hún sat bara tveimur sætum frá honum en samt hafði hann ekki tekið eftir henni fyrr. Hún var fallegasta stelpan sem hann hafði nokkurn tímann séð.

Kæra Dagbók (08.01.07 ritað kl. 22:01). Ég sá fullkomna stelpu í dag. Hún heitir Sara og er með mér í líffræði. Eftir að ég sá hana gat ég ekki hætt að stara á hana og þegar hún leit á mig á móti sá ég það í augunum hennar að hún þráði mig jafn mikið og ég þrái hana. Við tengdumst á þeirri stundu böndum sem ég vissi ekki að til væru. Og við fundum það bæði…

Hann mætti henni á ganginum daginn eftir. Hann sneri við til að elta hana og þegar hann kom nær gat hann fundið lyktina af henni.

Kæra Dagbók (09.01.07 ritað 21:56). Sara var með nýtt ilmvatn í dag. Ég skil alveg hvað hún er að gera þó að hún þykist ekki hafa áhuga á mér. Ég get ekki hætt að hugsa um hana…

Hann settist fyrir framan tölvuna og fór að vafra um á netinu. Hann byrjaði á því að googla Söru og fann bloggsíðuna hennar.

Kæra Dagbók (13.01.07 ritað kl. 00:20). Ég skoðaði bloggsíðuna hennar Söru í dag. Hún á víst kött sem heitir Máni en það merkilega er að hún var að hætta með kærastanum sínum. Ég veit hún þráir mig og hún veit það. Hún veit kannski bara ekki að hún viti það…

Hann sat einn í herberginu sínu að hlusta á tónlist. Úr prentaranum kom enn ein myndin af Söru sem hann hengdi upp á vegg. Eina geymdi hann í veskinu sína, hann var með eina sem desktop-mynd og með eina undir koddanum sem hann geymdi fyrir andvökunætur.

Kæra Dagbók (15.01.07 ritað kl. 20:49). Ég elti Söru heim úr skólanum í dag. Hún fór reyndar að hitta vinkonu sína í Smáralindinni fyrst en hún vissi að ég var að elta hana. Ég held að ég elski hana. Hún talaði um það við vinkonu sína að hún væri ein heima í kvöld þannig að ég ætla að fara til hennar. Ég ætla að segja henni að ég elska hana. Hún veit það örugglega fyrir en ég er orðinn leiður á þessum leikaraskap…

Hurðin var ekki læst að einbýlishúsinu þar sem Sara bjó ein með foreldrum sínum þannig að hann gekk beint inn. Það var tónlist í gangi, ástarlag, eitt af hennar uppáhalds vissi hann.

Kæra Dagbók (15.01.07 ritað kl. 01:02). Það gerðist í kvöld, það sem mig hafði dreymt um svo lengi…

Sara var nýkominn úr baði og var að greiða á sér hárið. Hún var í bláum baðslopp og söng með laginu; „Make love to me through the night!“

…þegar ég kom upp á aðra hæðina beið hún eftir mér, í engu nema slopp og með rómantíska músík í gangi…

Sara sá spegilmyndina hans þar sem hann faldi sig undir borðstofuborðinu og öskraði.
„Hvað í andskotanum ertu að gera hérna?“ sagði hún. Röddin var hás þannig að hún hvíslaði næstum. „Og hver ertu?“
„Hvað meinaru?“ svarði hann. Hún náði ekki að svara fyrr en hann var staðinn upp, búinn að grípa hana og kyssa blautum kossi.

…þetta var unaðslegt kvöld sem hvorugt okkar mun nokkurn tímann gleyma…

Hún klóraði í hann en hann hætti ekki heldur reif í hárið á henni með hægri hendinni og losaði sloppinn með þeirri vinstri.

…hún gat ekki neitað tilfinningum sínum og við gáfum okkur ástríðunni á vald…

Hann þrykkti henni upp að vegnum og baðsloppurinn rann niður af henni þannig að hún stóð frammi fyrir honum nakin. Hún klóraði hann í hálsinn og beit hann í höndina en þá greip hann aftur í lokk úr hárinu hennar og lamdi hausnum að öllu afli í vegginn þannig að hún missti meðvitund. Hann lagði hana mjúklega á gólfteppið og renndi niður rennilásinn á buxunum sínum.

…þetta var fyrsta skipti okkar beggja og algjör draumur. Ég sé það fyrir mér í móðu eins og fjarlæg minning af einhverju sem virðist svo gott að það geti ekki verið satt.

Foreldrar Söru komu heim um miðnætti og fundu hana nakta á gólfinu. Hún andaði ekki. Þungt höfuðhögg var dánarorsökin og henni hafði verið nauðgað eftir á. Morðinginn fannst aldrei, þetta leit úr fyrir að vera verk ókunnugs manns. Algjörlega tilviljunarkennt.