Þetta lítur út fyrir að vera ítarleg og góð grein. En almennt séð er Wikipedia alls ekki örugg og traust heimild vegna þess að þetta er alfræðirit á vefnum þar sem hver sem er getur sent inn greinar og það er engan veginn tryggt að greinarhöfundur viti hvað hann er að tala um. Og jafnvel þótt svo vildi til að viðkomandi væri t.d. menntaður á því sviði sem hann er að skrifa um, þá getur hver sem er breytt greininni og bætt inn alls kyns villum.

Ég gæti t.d. sent inn langa og ítarlega grein um fyrri heimsstyrjöldina en ég er ekki sérfróður um hana þannig að greinin yrði ekki traustari en heimildir mínar (og það er ekki alltaf sem greinarhöfundar á Wikipedia hafa fyrir því að taka fram heimildir sínar). Á hinn bóginn gæti ég skrifað grein um eitthvað sem ég þekki vel; ég stunda t.d. doktorsnám í heimspeki og klassískum fræðum og ætti að geta skrifað grein um t.d. eitthvert efni í fornaldarheimspeki. En ef ég geri það og hef í henni upplýsingar sem eru ekki almenn vitneskja og ganga kannski gegn því sem segir um efnið í almennum ritum, þá gæti hver sem er breytt greininni og “leiðrétt” hana með því að taka út það sem er efnislega rétt en ekki almennt vitað og sett inn eitthvað sem er efnislega rangt en er útbreiddur misskilningur og stendur í öllum eldri bókum og úti um allt á vefnum.

Í stuttu máli: Wikipedia er hönnuð þannig að ómögulegt er að tryggja að upplýsingarnar komi frá eða séu svo mikið sem lesnar yfir af sérfræðingi og þannig að það sem sérfræðngur kynni að láta frá sér geti glatast vegna þess að hver sem er getur fiktað í efninu.