[Notanda eytt] fyrir 20 árum, 3 mánuðum Fjöldi lestra: 1877

2,5kr gegnum netið - 2,94kr á sjó

Eins og virkir lesendur á Hugi.is/netid hafa tekið eftir hef ég nokkrum sinnum velt vöngum yfir háum kostnaði við að sækja gegnum netið erlendis frá. Þetta mál brennur mér á hjarta líkt og svo mörgum netverjum og ákvað ég í gamni mínu að skoða verðmun á því að sækja efni erlendis frá í gegnum netið móti því að fá það flutt hingað til lands með sjóflutningum.

Við gefum okkur að ég hafi fengið að gjöf 58.000 King James biblíur. Á tölvutæku formi eru þær nánast 1024kb og því prýðis gott efni í þessa útreikninga. Ég hef um tvennt að velja; ég get sótt þær allar gegnum netið og greitt fyrir það 2,50kr. pr. MB. til Símans eða fengið þær senda með Eimskip. Í hvoru dæminu um sig lítum við framhjá öllum kostnaði nema nákvæmlega flutningnum sjálfum, þ.e. engin gjöld eða fasta kostnaður (t.d. ekki kostnaði við ADSL tengingu eða leigu á gámnum sjálfum).

Að sækja þessar 58 þúsund biblíur gegnum netið myndi leggjast svona út:
59.392 mb á 2,50 kr. pr. MB eða 148.480 kr.

Ástæðan fyrir því að biblíurnar eru 58 þúsund er að það er eimitt fullur 40 feta gámur. Flutningskostnaður við 40 feta gám á sjóleið hjá Eimskipum (frá Englandi) er 171.000 kr.

Þar af leiðandi væri kostnaðurinn við að fá biblíurnar sjóleiðina 2,94 kr pr. MB.

Flutningstími á sjó væri 4 dagar en að sækja þær gegnum netið á 1024kbps tengingu myndi taka eina 5,49 daga.

BessiB fyrir 20 árum, 3 mánuðum

Vid tetta ma svo baeta ad i oktober er stefnt ad tvi ad setja a stofn nidurhladningartjonustu fyrir islendinga i bretlandi.

Tetta virkar tannig ad thu sendir okkur slod a skra sem thu villt fa nidurhladid. Vid saekjum hana svo fyrir tig, prentum ut binary kodan a blad og sendum ter svo med TNT hradflutningum alla leid heim ad dyrum. Tetta gerist allt hratt og orugglega og er gegn mjog vaegu gjaldi. Tetta er eins og leida ma af greininni mun hagstaedara en ef sott vaeri med venjulegri heimilis-ADSL-tengingu.

Vid munum koma upp vefsidu og kynna tjonustuna betur innan skamms.

Fyrra álit

kristinnm fyrir 20 árum, 3 mánuðum

Sniðug hugmynd - fylgir þræll með til að skrifa binary kóðann inn í tölvuna?

Fyrra álit

[Notanda eytt] fyrir 20 árum, 3 mánuðum

Ég vildi nú bara draga fram fáránleika þessa verðlags með smá gamni :)

Henti þessu saman í fljótu bragði, biðst afsökunar ef það eru villur:

Í rannsókn PriMetrica, Submarine Bandwidth 2004, kemur m.a. fram leiga á STM-1 (155mbps) milli t.d. London og New York hafi lækkað úr $6.039 (að meðaltali) niður í $4.461 yfir árið 2003 eða 3.854.304 kr. á ári ($ @ 72kr). Þetta er samfara þeirri gífurlegu verðlækkun sem hefur verið seinustu ár.
(http://www.telegeography.com/ee/free_resources/sb 2004_exec_sum-01.php)

Verð eru mismunandi og á http://www.bandwidthmarket.com/ er hægt að skoða tilboð í nettengingar. Þessa stundina eru opin 4 tilboð í tengingar milli London - New York, frá $19.000 til $69.750 á mánuði fyrir 2,5gbps tengingar og frá $45.000 til $378.000 fyrir ~10gbps tengingar. Uppgefin verð á bandwidthmarket.com eru venjulega miðaðar við 12 mánaða samning og á 36 mánaða samningum er verðið búið að lækka þónokkuð.

Í júlí hefti International Telecommunications er talað um hvernig offramboð á bandvídd og lækkandi verð geti á endanum valdið því að gjaldtaka fyrir bandvídd leggist af með öllu. Þar er m.a. rætt við Siddartha Ray forstjóra Data Access á Indlandi. Hann gerir ráð fyrir áframhaldandi verðlækkun og segir að fyrirtæki sitt gæti þess að gera ekki langtíma samninga vegna þess að þá gætu þeir læst sig inni með óhagstætt verð. Hann segir að kostnaður hans við bandvídd þetta árið muni lækka um 10-15% og það muni valda lækkun á kostnaði endanotanda.

Því finnum við hér á Fróni ekki fyrir áhrifum þessarar verðlækkunar? Því hefur verð pr. mb. að utan nánast haldist í stað seinustu árin (fyrir utan einn og einn aur til eða frá)? Er Síminn með svona lélega saminga sem þeir eru fastir í næstu árin?

Ef við gæfum okkur að Síminn greiddi $4.461 á mánuði fyrir 2,5gbps tengingu (tengingar núna eru 155mbps til USA og 310 til UK) til Bretlands þá þyrfti ekki nema 125 viðskiptavini til að sækja 1gb umfram kvóta að utan til að þeir séu komnir í plús.

Fyrra álit

andri fyrir 20 árum, 3 mánuðum

Við skulum nú bara hafa réttar tölur við höndina:
2,5Gbit tenging til Bretlands frá Íslandi um Farice kostar rúmlega milljón dollara á mánuði.

Minni tengingar eru svo alltaf dýrari per mb/s.

Ennfremur er rétt að það komi fram að ekki er eðlilegt að gera ráð fyrir nema kannski 30% meðalnýtingu á strengnum því það þarf jú að vera pláss fyrir toppa.

Ástæðan fyrir þessum verðmun á verðum milli Bretlands-Bandaríkjanna og Íslands-Bretlands er að sjálfsögðu sá að flutningsgeta Farice er 720gb/s en við erum kannski að ráðstafa 1/100 þessarar flutningsgetu í dag á meðan aðrir sæstrengir eru mun betur nýttir (þótt nýtingin sé kannski samt undir væntingum).

Ef allir á Íslandi myndu nota Netið 100 sinnum meira en þeir gera í dag væri svosem hægt að lækka verðið per MB margfalt, en aðalatriðið er að krónutalan sem kemur í kassan má ekki verða lægri en hún er í dag. Það er hinsvegar afar ólíklegt að netnotkun myndi 100-faldast, jafnvel þótt alveg ókeypis yrði að flytja gögn frá útlöndum. Þetta er þróun sem mun taka nokkur ár.

Verðin munu hinsvegar væntanlega lækka hraðar á næstu árum nú þegar Farice hefir verið tekinn í notkun heldur en þegar við höfðum einungis Cantat-3. Við höfum svosem orðið vör við það nú þegar með lækkunum símafyrirtækjanna á síðustu mánuðum.
Eftir 10 ár mun netnoktun væntanlega verði miklu meiri en hún er í dag og þá má líka gera ráð fyrir því að verðin verði 1/10-1/100 af því sem þau eru í dag - eða jafnvel enn lægri!

Fyrra álit

[Notanda eytt] fyrir 20 árum, 3 mánuðum

Ef við tökum tölurnar sem andri gefur upp og segir réttar þá ætti FARICE að borga sig upp á tæplega 19 mánuðum miðað við 1,04% nýtingu, það er ekki langur tími - greinilega fín fjárfesting hjá Símanum, FöroyaTele og fleirum :) Geturðu getið heimilda ?

Kostnaðurinn við FARICE var rétt rúmlega 4 milljarðar, eða u.þ.b. 5.000 kr. pr. mb. í burðargetu. Samkvæmt ársskýrslu FARICE 2002 og bráðabirgða reikningum fyrir fyrsta árshluta 2003 er kostnaður við rekstur FARICE u.þ.b. 20-25 milljónir á ári.

Fyrra álit

wbdaz fyrir 20 árum, 3 mánuðum

Hreinnbeck: ekki gleyma t.d. VSK, álagningu, vaxtakostnaði vegna lána sem voru tekin til að gera strengin osfrv.

Fyrra álit

andri fyrir 20 árum, 3 mánuðum

Nú ber svo vel í veiði að Farice birtir fjárhagsuppgjör sitt á heimasíðunni sinni. Þeir eru reyndar aðeins búnir að birta uppgjör fyrir fyrri helming ársins 2003 og skilaði fyrirtækið 11 milljón króna tapi á þeim tíma. (Segir reyndar lítið þar sem innkoman á því ári var 0 krónur.)

Ef svo skyldi vera að fyrirtækið sé að stórgræða ætti það því að sjást þegar ársuppgjör fyrir 2004 verður opinbert, einhvern tímann á næsta ári. Við bíðum öll voða spennt, er það ekki?

En í alvöru talað er Farice almennt talin slæm fjárfesting og og þessvegna þurfti ríkið að hlaupa undir bagga með Landssímanum og Færeyska símanum til að hægt væri að leggja strenginn. Og Vodafone tímdi hinsvegar ekki að leggja nema einhver 4% til verksins, ef ég man rétt. Farice er enda rekið til að enda réttu megin við núllið, ekki til að græða fúlgur fjár.
Það eru líka margir fleiri kostnaðarliðir við Farice heldur en einungis að borga upp lán vegna lagningar strengsins. Ég spurði einfaldlega um þetta hjá Farice og var sagt að vextir og afborganir af lánum næmu “allnokkurri” upphæð en að annar rekstrarkostnaður væri “verulegur”, svo sem vegna kapalstöðva og leigu á fjarskiptaleiðum á Íslandi, Færeyjum og Skotlandi.

Annars er ég ekki einu sinni viss um að heildarnýtingin á strengnum núna sé komin upp í 2,5Gbit/s. Ég veit að á síðasta ári var verið að tala um að heildarnýting Íslendinga á Cantat-3 næmi svona 700mb/s (skv. heimasíðu Farice) og ennfremur er Cantat-3 áfram notaður þótt Farice hafi verið tekinn í notkun.

Fyrra álit

andri fyrir 20 árum, 3 mánuðum

Já, og í sambandi við heimildir er ég einfaldlega með verðskrána frá Farice fyrir framan mig. Ég bað einfaldlega um hana hjá þeim og fékk hana. Kostar ekki mikið að spyrja, ha?

Ég kann hinsvegar ekki alveg við að vera að birta nákvæmar tölur úr verðskránni án leyfis.

Fyrra álit

gitar fyrir 20 árum, 3 mánuðum

hér tala miklir snillingar. Málið er einfalt, það er mikil tekjuþörf hjá Farice (sennilega 5-700 MKr á ári) og hún mun aukast á næstu árum og einnig leggst við rekstrarkostnaður hjá fjarskiptafélögunum til að veita tengingar. Kúnnar Farice eru að mestu tveir, Landssíminn og og Vodafone og enginn annar á leiðinni. Velflestir hafa fengið sér internet tengingar, amk öll fyrirtæki og mjög mörg heimili hafa fengið sér ADSL. Það mun kannski bætast við 20,000 heimili í viðbót við þau 30,000 núna en þessi 20,000 nota væntanlega dial-in í dag. Sem sagt tekjur af Interneti eru að nálgast hámark og það þýðir væntanlega um 3-4000 á heimili. Framundan er aukin tekjuþörf af Farice og til að jafna það út þarf aukning í ADSL að koma til móts við það. Magngjöld eru leiðin til að ná í tekjurnar og leið til að láta þá sem nota netið mest borga meira sem er sanngjarnt. Ef notendur hefðu þörf á að nota netið margfalt meira og myndu t.d. tvöfalda notkun ef fjarskiptafyrirtækin helmingslækkuðu verðskránna þá væri væntanlega auðveldara að lækka. Fjarskiptafyrirtækin geta hins vegar ekki einfaldlega dömpað verðskránni þar sem núverandi tekjur sem eru svona sæmilegar gætu dottið niður. Ég á því von á að fjarskiptafyrirtækin taki varkár skref á næstu mánuðum í lækkun og sjái viðbrögðin. Þau eru líkleg til að bjóða eitthvað meira fyrir peninginn í stað þess að lækka flatt verðskránna. Sem dæmi er vefvarp Og Vodafone þar sem ekki er magnmælt fyrir útvarpshlustun.

Fyrra álit

ibwolf fyrir 20 árum, 3 mánuðum

Menn gleyma einu hérna þegar þeir reyna að reikna út kostnað við Farice, eða hve mikið þarf til að standa undir honum. Og það er að hann er ekki eingöngu fyrir internetið!

Þá hefur Landsíminn einnig getað sparið verulegt fé með því að leggja af eða minnka verulega umsvif á jarðstöðvum (gervihnattasambönd). Reyndar er búið að leggja jarðstöðvardeildina niður og fellur sú littla starfsemi sem er eftir inn í aðra deild. Þetta spara ófáar milljónir á ári á móti kostnað Farice.

Annars fylgir bandvíddar notkun (eða bandvíddar þörf) lögmáli Moore's. Þ.e. hún vex um helming á 18 mánaði fresti. Það að verðið haldist óbreytt á sama tími þýðir í raun að verið er að HÆKKA verðið þar sem ‘grunnskammturinn’ (ef svo má að orði komast) stækkar. Þannig að (ef verðbólga er engin) þá ætti verð á bandvídd að lækka um helming á eins og hálfs árs fresti bara til að halda því jöfnu.

Verðið hefur nú verið fast í 2,5 krónum í allavega 2 ár (ef ekki lengur) þannig að raun hækkunin er veruleg. Í raun er þessi verðlagnin að halda verulega aftur af aukinni notkun internetsins á ísland.

Dæmi: Ég keypti mér nýlega tölvuleik í gegnum netið (City of Heroes). Fyrir hann borgaði ég um 3500 kr og var svo sem sáttur við það. Ef ég hefði einnig þurft að borga fyrir niðurhalið (um 850 MB) þá hefði lagst við 2125 kr. ‘net skattur’. Það sér hver heilvita maður að þetta nær ekki nokkurri átt. Þetta er meira en 50% álagning á vöruna sem ég er að kaupa!!!

Í ljósi þess að sífelt meira efni verður nú fáanlegt í gegnum netið (t.d. tónlist en þess verður varla langt að bíða að bíómyndir og sjónvarpsefni bætist í hópinn) þá er það bara lífsnauðsynlegt að fara að koma böndum á þetta verð.

Fyrra álit

andri fyrir 20 árum, 3 mánuðum

Verðið hefur auðvitað haldist fast alveg síðan ADSL-ið hélt innreið sína á Íslandi (fyrir utan reyndar smá tímabil í blábyrjun þegar niðurhalið var frítt) vegna þess að Cantat-3 er aðeins 2,5Gbit strengur og Íslandingar réðu ekki einu sinni yfir allri þeirri bandbreidd.
Það var því raunverulegur skortur á bandvídd hér áður fyrr og því að eðlilegt að halda verðinu háu svo netnotkunin færi ekki úr öllu valdi með tilheyrandi óþægindum fyrir notendur.

Núna höfum við svosem yfir nægri bandvídd yfir að ráða með Farice og við sjáum að símafyrirtækin eru nú farin að fikra sig áfram í lækkun á bandvíddargjöldum. Það er hinsvegar skiljanlegt að þau vilji ekki fara of geyst í sakirnar því þau vilja auðvitað ekki tapa peningi á niðurhalinu sem gæti gerst ef lækkunin væri of hröð.

En lækkunin á bandvíddargjöldum mun koma með tíð og tíma og aukinni bandvíddarnotkun og það kæmi mér ekkert á óvart þótt verðið verði komið niður í svona hálfa krónu per megabæt eftir um ár.

Annars fellst ég seint á að það sé eitthvað lífsnauðsynlegt að lækka verðið á bandvíddargjöldum (allavega vil ég engar niðurgreiðslur frá ríkinu).
Svo lengi sem maður einskorðar netnotkunina við að skoða vefsíður og hala niður einstaka forriti, tónlist eða leik er verðið ekkert stjarnfræðilegt. Það er hinsvegar erfiðara að fara á warez flipp - en slíkt myndi seint kallast sjálfsögð mannréttindi ;)

Fyrra álit

ibwolf fyrir 20 árum, 3 mánuðum

andri: Eins og ég nefndi í greinarsvari mínu þá er síaukið magn af efni fáanlegt í gegnum internetið. Ég nefndi dæmi um tölvuleik sem ég keypta nýlega þessu til stuðnings. Vissulega eru ‘warez’ gaurarnir mestu bandvíddar notendur (meðal einstaklinga) en það breytir því ekki að einstaklingur getur haft góðar og gildar ástæður fyrir því að vilja sýsla með tugi (og jafnvel hundruð) GB á mánuði. T.d. ef viðkomandi er áhugamaður um ýmiskonar ‘experimental’ tónlist og því um líkt en mikið magn af slíku má fá ókeypis (og reyndar margt fleira) frá archive.org.

Það er kannski ekki lífsnauðsynlegt að lækka verð á bandvídd en ef íslendingar vilja ekki dragast aftur úr hvað varðar notkuna á internetinu á komandi árum þá er grunn atriði að gera þetta ódýrara.

Fyrra álit

[Notanda eytt] fyrir 20 árum, 3 mánuðum

Við gætum auðvitað farið að draga um heildarmyndina, vexti af lánum og afskriftir o.s.frv. Þótt við myndum leggja 300% ofaná þessa fjóra milljarða þá er nú ansi gott að ná sér á skrið eftir einungis 75 mánuðum (rúmlega 6 árum) ansi gott, sérstaklega miðað við 1,04% nýtingu á strengnum. Ef við miðum við hæsta verð sem ég fann á 2,5gbps tengingum um sæstreng milli BNA og Bretlands: $68.250 (4.845.750 kr. miðað við $@71kr.) þá er munurinn á milli FARICE og hæsta verðs 1365% verðmunur og miðað við lægsta verð, $19.000, ein 5163%!

Ef við miðum við þessa milljón dollara sem 2,5gbps eiga að kosta gegnum FARICE þá þarf að “selja” 27TB af umferð um hann á mánuði til að ná kostnaði eða 9GB pr. viðskiptavin (ef við lítum framhjá grunngjaldi) miðað við tölurnar frá gitar, er þá samband við útlönd rekið með gífurlegum halla? Ég vil samt benda á að netveitur eru nú búnar að lækka verð á þeim erlenda kvóta sem er innifalinn er í hinum mismunandi þjónustuleiðum verulega og er það vel.

Þá er raunin sú að kostnaður pr. mb. er oftar en ekki einungis samningsatriði og hef ég séð samninga hjá fyrirtækjum alveg niður í 1,2 kr. pr. MB og mest 2kr. pr. MB svo hef ég heyrt af fyrirtækjum sem greiða ekkert aukalega, væri betra að skila slíkum kjörum til einstaklinga sem nýta netið til náms, fróðleiks og skemmtunar fremur en fyrirtækjum sem nýta eflaust margfalt meiri bandvídd en einstaklingar? Þá er ég að tala um að standa við stefnu ríkisstjórnarinnar og vilja þjóðarinnar um að skapa vel menntað og tæknivætt þjóðfélag sem stendur fremst meðal þjóða.

Auvitað koma svo upp vissar efasemdir um þessa verðlagningu þegar litið er til þess að hún hefur haldist nánast óbreytt í mörg ár og það þrátt fyrir gífurlegar gengisbreytingar upp og niður, stórkostlega fjölgun viðskiptavina og mörgþúsundfaldrar stækkunar sambands okkar við útlönd.

Væri möguleiki á að finna aðrar lausnir, ef þetta snýst um að gæta þess að nýting á strengnum fari ekki yfir 50% og dragi úr notagildi/hraða hans - er þá ekki hægt að setja hámarkshraða á erlenda umferð eftir að kvóti er búinn líkt og tíðkast sumsstaðar erlendis?

Frekar myndi ég vilja hafa 64kbps samband til útlanda eftir kvóta og láta síðurnar dóla inn heldur en að greiða stórfé fyrir að fá það 1, 2 og 10. Er kominn tími á nýja þjónustuleið þar sem þú verslar bandbreidd en ekki magn til útlanda, sumsé 64kbps samband burstable uppí 128kbps á stundum eða álíka?

Ég mun hafa samband við FARICE í vikunni og kanna hvort mögulegt sé að fá upplýsingar sem gefa má upp, enda engar upplýsingar að fá á síðunni þeirra (undir Pricing Policy á www.farice.is kemur einfaldlega: “This the upcoming website of FARICE…”).

E.S. Mér finnast útreikningar mínir eitthvað aðeins loðnir, svo vinsamlegast leiðréttið ef þið takið eftir einhverju.

Fyrra álit

[Notanda eytt] fyrir 20 árum, 3 mánuðum

Var að skoða málin aðeins og ef ég fer ekki með rangt mál þá áttu OgFjarskipti 720 rásir (45mbps) gegnum Cantat-3. Líklegast hefur það verið með IRU (Indefeasible Right of Use) samningi, sem er í raun og veru langtíma leigusamningur (sem gefur algjöran eignarrétt yfir umræddri bandvídd [og oftar en ekki rétt til framleigu] meðan á honum stendur) og er venjulega um eingreiðslu að ræða. Samkvæmt http://www.bonds.is/icex_news_detail.asp?ArticleId=2899 1&cat=106 seldu OgFjarskipti eignarhlut sinn í Cantat-3 til FARICE hf. fyrir 234 milljónir króna:

“During the period the Company sold its ownership in the Cantat 3 submarine cable. The sales price of the ownership was ISK 234 million. At the same time Og Vodafone purchased a part of the FARICE submarine cable for ISK 114 million.”

IRU eingreiðslan er einungis fyrir afnotin, auk þess bætist við rekstrar og viðhaldskostnaður á ársgrundvelli, þá er heldur ekki í þessu kostnaður við tengingar inná netkerfi á endastöðum.

Langtíma IRU samningar (10-25 ár) eru hagstæðastir á þeim svæðum þar sem framboð er nokkuð en eftirspurn lítil. Þannig getur munað um og yfir 1.000% á verði IRU samnings ef hann fer um streng í Kyrrahafi (dýrara) fremur en Atlantshafi (ódýrustu tengingarnar í dag). Áður var það almenn regla að 25 ára IRU samningur sé hagstæðari heldur en 2 ára leiga á bandvídd á mánaðar basis yfir sama tíma (International Bandwidth 2000, TeleGeography Inc.), þótt ég efist um að það sé svo í dag miðað við þá verðþróun sem verið hefur. Mörg fyrirtæki hafa þó brennt sig á IRU samningum gerðum fyrir árið 2002, og hafa í raun greitt meira heldur en kostar að leigja sömu bandvídd á sama streng í dag. Gæti það verið raunin með íslensk fjarskiptafyrirtæki og berum við endanotendur kostnaðinn?

Einnig gæti vandamálið verið að mögulega er ekki hægt að afskrifa IRU samning (sem er í raun fasteign, 25 ár er meðallíftími sæstrengs) samkvæmt skattalöggjöf hér á landi, það geta þó þeir sem eiga strenginn sjálfann til að byrja með og myndast við það vissar samkeppnisskorður, það gæti meðal annars verið ástæða þess að OgFjarskipti eiga í dag 10% hlut í FARICE hf. Þær netveitur sem vilja versla bandvídd beint gegnum FARICE, ekki gegnum Símann, OgVodafone o.fl. gætu því átt erfiðara í samkeppni við þau.

Í raun mætti kannski segja að rekstur sæstrengja í dag sé nokkurskonar vítahringur; það er þörf fyrir bandvídd, hún er “búin” til, bandvídd eykst með tækniframförum (t.d. DWDM sem FARICE notar til að ná fram 720Gbps burðargetu), verð lækka, ný tækni og þjónusta fyrir endanotendur krefst meiri bandvíddar sem aftur veldur þörf fyrir bandvídd.

Ein þeirra ástæða fyrir því að ég velti þessum málum fyrir mér er einnig sú að OgFjarskipti og Síminn hafa nú selt FARICE tengingar sínar gegnum Cantat-3 og erum við þá mögulega að fara aftur í sama farið þar sem eitt fyrirtæki rekur netsambönd við útlönd, líkt og Internet á Íslandi hér á árum áður. Í raun ríkir engin samkeppni um bandvídd á Íslandi í dag og mun mögulega aldrei verða.

Fyrra álit

JReykdal fyrir 20 árum, 3 mánuðum

Gáfuleg umræða um gagnamagnsgjöld…..ég á ekki orð. Best að fara að leita að þessum fljúgandi svínum :)

Keep it up :)

Í öllum þessum talnaflaumi ykkar…gerið þið ráð fyrir rekstrarkostnaði vegna tenginganna heima og erlendis? Kostnaði sem þjónustuaðilar þurfa að borga en ekki Farice félagið.

JReykdal

Fyrra álit

[Notanda eytt] fyrir 20 árum, 2 mánuðum

Þú ert lúði… ;)

Fyrra álit

MAniaco24 fyrir 20 árum, 2 mánuðum

Er bara ekki langsniðugast að Downloada þessari “King James Biblíu” einu sinni og copera hana 58.000 sinnum á harðadiskinn hjá sér,
og borga 2.50kr í stad fyrir hundrað og eitthvad þúsund?

Fyrra álit

Mroho fyrir 20 árum, 1 mánuði

Þetta var bara sýnidæmi hjá manninum. það er enginn að fara að kaupa 58 000 þúsund King James bibliur.

————————

Fyrra álit

[Notanda eytt] fyrir 20 árum, 1 mánuði

Heyrðu

Ég er hjá símanum. þið segið að mbit kosti 2,50 krónur, en samt erum við að borga 13þús segir síminn. hvað er í gangi ? ég kann ekki mikið á net,adsl eða mótöld af hverju kyni :) en 13þús er soldið mikið fyrir 1 gbit! það er það hæðsta sem eg hef farið í. og annað…

Ef ég er með 100mbit utanlands-download innifalið í adsl-inu, og ég fer uppí 1Gbit, hvað myndi það kosta?

Fyrra álit

karfi88 fyrir 20 árum, 1 mánuði

strákar eigið þið ykkur ekkert LÍF eða eruði bara að skoða kostnaðinn við að senda gögn með samskip eða netinu eruði CRAZY!!!!!!! >|

Fyrra álit

allisnilli fyrir 20 árum

Gætu þeir ekki komið sér upp gervihnetti ég held að ég hafi lesið einhversstaðar að það væri ódýrara en sæstrengur í rekstri.

Fyrra álit

Pottlok fyrir 19 árum, 12 mánuðum

Kannski í rekstri en 1stk gervihnöttur :)

Kv. Pottlok

Fyrra álit

allisnilli fyrir 20 árum

Og annað hraði á tengingum er alltaf að aukast ef að gjaldið fyrir erlent niðurhal yrði lækkað alveg helling myndu allir vilja downloada og þá myndi notkunin aukast.

Fyrra álit

Netið

Netið

Ofurhugar

Stjórnendur

Hverjir eru inni

Greinar

2,5kr gegnum netið - 2,94kr á sjó

Dýr

Dægurmál

Fræði

Leikir

Lífið

Lífsstíll

Margmiðlun

Menning

Skjár

Sport

Tónlist

Tækni

Vélar

Hugi