Bandaríska söngkonan Britney Spears yfirgaf í skyndi sviðið þegar tónleikum hennar var að ljúka í Berlín í Þýskalandi á dögunum. Hún táraðist og hélt inn í bifreið sem beið hennar fyrir utan tónleikastaðinn. Á meðan voru hljóðfæraleikarar enn á sviðinu að ljúka síðasta laginu á dagskránni. Hún hélt beint á hótel í borginni og hunsaði aðdáendur sem biðu fyrir utan. Ástæðan fyrir þessari uppákomu er sú að Britney hefur verið harðlega gagnrýnd fyrir að þykjast syngja mestan part þeirra tónleika sem hún hefur haldið.
Hún beið því óþreyjufull eftir því að ljúka tónleikaferðalaginu og halda heim til sín. Hún hefur nú þegar frestað tónleikaför í Suðaustur-Asíu. Unnusti hennar, Kevin Federline, hefur dvalið með henni stærstan hluta tónleikaferðarinnar í Evrópu, en parið hefur meðal annars sést sletta úr klaufunum í Amsterdam og Malaga, að sögn ananova.com.