Ég skoðaði heimasíðuna þeirra og leist ágætlega á. Að vísu gat ég ekki séð hverjir eru að kenna hjá þeim og það vekur alltaf grunsemdir mínar. hins vegar er þetta háskólaklúbbur (er það ekki rétt hjá mér?) og þeir eru venjulega frekar traustir og vel reknir. Þeir setja fram mjög góða kennsluheimspeki sem byggir á því að þú ákveður sjálf hraðann sem þú tekur í byrjun og þeir segjast ekki ýta fólki út í neitt. Þetta er mjög jákvætt. Þetta virðist líka vera klúbbur sem kennir mjög mörg afbrigði kung-fu og það er ekkert verra, en þú verður þá að athuga hver munurinn er og hvort það eru sömu kennararnir sem kenna alla stílana, og ekki síst hvaða stíll hentar þér best.

Það sem ég get ráðlagt þér er þetta: Farðu á staðinn á þeim tíma sem þeir eru að kenna og fáðu að horfa á eina kennslustund/æfingu. Ef þeir vilja ekki leyfa þér að horfa á skaltu leita annað. Ef þeir taka vel á móti þér skaltu fá aðtala við kennarann og spyrja hann út í allt sem þú vilt fá að vita um klúbbninn, t.d. hverjir kenna og hvar þeir hafa lært? Hvernig eru nemendur klúbbsins, eru þeir flestir í háskólanum?
Hver er munurinn á stílunum sem þeir kenna og hver þeirra telur kennarinn að myndi henta þér vel? Hver eru aðalatriði þess stíls? Hvenær eru æfingarnar? Hversu mikill agi er á æfingum og hverjar eru reglurnar? Hvað kostar að æfa? O.s.frv….

Það mikilvægasta er að fá tilfinningu fyrir klúbbnum. Er jákvætt andrúmsloft þar og lítur fólk út fyrir að vera ánægt þarna? Eru hinir nemendurnir fólk sem þú getur hugsað þér að æfa með? Hvernig líður þér þar og hvernig er tekið á móti þér?

Það besta sem þú getur gert er að fara á staðinn og pæla í þessum atriðum. Svo getur þú tekið ákvörðun um það hvort þú vilt æfa þar eða ekki.

Varðandi það hvort þú þarft grunn í kung fu til að æfa thai chi þá eru allar líkur til að kung fu kennari myndi svara þeirri spurningu játandi en thai chi kennari myndi segja nei.
Mín persónulega skoðun er að allur grunnur er góður eins lengi og þú ert tilbúin að ganga að nýjum stíl með opnum huga. Hins vegar má segja að ef þú vilt fara að læra Thai chi er kannski best að byrja strax á því í stað þess að taka annað kung fu fyrst. Thai Chi er eftir allt saman bara einn af kung fu stílunum!

Vona að þetta hafi hjálpað eitthvað <br><br>obsidian
[LBFR]/Aikikai Reykjavík