Íslandsmótinu Í Taekwondo hefur verið frestað til sunnudagsins 27. apríl nk. Þá munu fara fram allir úrslitabardagarnir, athugið einnig úrslitin í stelpnaflokk 1 sem höfðu farið fram áður en mótið var stöðvað. Mótið fer því fram samhliða Íslandsmótinu í Púmse og Kjokpa sem halda átti sama dag.

Það sem gerðist á mótinu var að einn keppandi fékk höfuðhögg á meðan hann var úr jafnvægi og datt niður með hnakkann fyrst. Það var því fallið sem olli slysinu en ekki sparkið sjálft. Keppandinn skall harkalega í gólfið með þeim afleiðingum að hann missti meðvitund um tíma og varð að flytja hann burt í sjúkrabíl. Hann er nú kominn úr rannsókn og sjá læknarnir engin merki um skaða og segja að hann nái sér að fullu og geti farið heim í kvöld eða á morgun.

Með öðrum orðum, einn keppandi á Íslandmótinu fékk slæmt högg á hnakkann og fór upp á spítala í rannsókn en virðist úr allri hættu. Áhorfendum var verulega brugðið við að sjá þetta þar sem keppandinn lá fyrir framan áhorfendapallana í dágóða stund á meðan beðið var eftir sjúkrabíl. Eftir samráð við keppendur sína ákváðu yfirkennarar hvers félags að fresta keppninni þar sem þetta atvik hafði mikil og truflandi áhrif á fólk í húsinu.

Ég vonast til þess að sjá alla á mótinu 27. apríl nk. og þá sérstaklega þá keppendur sem um er rætt. Atvik sem þessi fylgja íþróttum og í raun öllu því sem við tökum okkur fyrir hendur í lífinu. Stöndum saman og styðjum þá sem mest þurfa.

kveðja,
Sigursteinn Snorrason 4. dan
yfirkennari Dojang Dreka