Við viljum benda þér á nýjasta ofureflið í íslenskri ljóðlist: Tíu þúsund tregawött er vefrit um ljóðlist sem býr að www.10000tw.blogspot.com. Þar verður birt alls lags efni um ljóðlist, íslenska og erlenda, gamla og nýja, framúrstefnu og hefðbundna, og hefur þegar nokkuð birst af efni þó ritið sé einungis nokkurra daga gamalt. Að ritstjórn þessa nýja vefrits standa Ásgeir H. Ingólfsson, bókmenntafræðingur, Eiríkur Örn Norðdahl, ljóðskáld, Hildur Lilliendahl, ljóðskáld, Ingi Björn Guðnason, bókmenntafræðingur og Ingólfur Gíslason, stærðfræðingur.

Óbreyttum netnotendum og ljóðaunnendum viljum við benda á að heimsækja síðuna. Vonir standa til að hún verði mikið uppfærð.

Landeigendur á netinu viljum við biðja um hlekk og ábendingu.

Af fjölmiðlum heimtum við eins mikla athygli og dálksentimetrarnir leyfa.

Útgefendum bendum við á að hægt verður að fara fram á umfjöllun um tilteknar bækur á síðunni, hvort sem er nýútgefnar íslenskar ljóðabækur, eldri íslenskar ljóðabækur eða bækur með ljóðaþýðingum. Bókaútgefendum er bent að hafa samband á tiuthusundtregawott@gmail.com, æski þeir sérstakrar umfjöllunar, ritdóms eða birtingar efnis úr bókum.

Ljóðskáldum, bókmenntafræðingum, þýðendum og ljóðaunnendum bendum við á að senda inn efni. Nánari upplýsingar á: http://10000tw.blogspot.com/2006/05/ritstjrn.html

Bestu kveðjur,

Ritstjórn.