Þú kemur inn til mín og sest hljóðlega niður
Mjúkar varir þínar geisla frá sér ljósi í dimmu herberginu
og hita upp hjarta mitt.
Þú segir mér allt um líf þitt þann daginn
en ég bíð eftir að þú komir
og gerir mig hluta af lífi þínu
þann daginn.

Ég heyri ekki í þér
þú beygir þig nær
og hvíslar í eyra mér.
Ég hlusta nú
ég hlusta á andardrátt þinn á eftir orðunum
hvernig hann endar inni í mér
og kitlar eyru mín ljúflega.

Ég sný mér að þér
varir móti vörum
augu móti augum
nefin strjúkast saman
og neistarnir fljúga milli þeirra.
Ég teygi mig nær
Ég færi mig nær
og hvísla á móti
inn á milli fagurra vara þinna.
Við kyssumst.

Ég faðma þig djúpt að mér og finn hjarta þitt slá
það slær inn í mig
bylgjurnar dynja á húð minni
brjóstin þrýsta á hörund mitt
og varirnar strjúka sál mína.
Heitur
Langur
Rafmagnaður koss.

Við endum flöt á sænginni
svífum á dúnmjúkum fjöðrunum
sameinuð í eitt
eitt stórt ský
og endum þarna uppi.

Ég strýk þér ljúft um hörundið
andlitið
bakið
lærin.
Færi mig nær
Horfi dýpra inn í þig
færi mig lengra að þér
og færi þig úr öllum vörnum þínum
kemst inn í virkið
kemst undir fötin
og enda í höllinni.

Við hreyfum okkur hægt og varlega
Svífum varlega inn í þoku alsælu
saman á litlu skýi
saman litla stund.
og við komumst fljótlega þar sem allir koma að lokum
inn í….

Bííííííííbbb

Ég legg á.
Frelsið búið og ég blóta þeim sem fundu upp skafkortin hjá Landssímanum.