Öhm ég ætla að reyna að sýna smá lit fyrst ég er við tölvu í dag, þetta er dáldið væmið en ég er búin að vera að burðast með það á bakinu í dáldinn tíma og er aldrei ánægð með það þ.a. allar athugasemdir verða litnar hýru auga :D

Í gær dreymdi mig svefn í vöku

Trén á leið í háttinn.
Sum lík ærslafullum börnum í flónelnáttfötum.
Rósaruninn þokkafull og fáguð í svífandi silki.
Hlynurinn, gamall og hlýlegur
í flókainniskóm, setur gómana í glas.
Öll þreytt en ánægð að loknum annasömum degi.

Í gær sá ég þau hátta
meðan litrík sæng haustsins
kúrði sig hægt og blíðlega yfir garðinn

Í gær dreymdi mig ástina

Seinna mun vetur syngja þeim
hvínandi vögguljóð stormanna
um hetjur og hugrekki.

Og um leið heyrist óma
fegurð svefns og drauma
dásemd hvíldarinnar
ótakmörkuð von ókominna morgna

Í gær átti ég frelsi
og elskaði.