Það er skiljanlegt að þið séuð ekki ánægðir með þetta, og það eru alls ekki allir á eitt sáttir um þetta atriði. Þetta hefur verið rætt töluvert innan félaganna og eins og málin standa í dag þá er þessi regla viðhöfð. Ástæðunnar er aðallega að leita í því að einhver verður að bera ábyrgð á merkjaranum þegar hann er lánaður út frá félaginu og allri notkun á honum á meðan hann er í útláni. Skv. reglugerðinni verður að vera ábyrgðarmaður fyrir útlánum og sá einstaklingur verður að vera lögráða. Þar sem starfshætir félaganna byggjast á því að hver félagsmaður er ábyrgur fyrir sínum eigin útlánum þá lendum við í þessari dilemmu að yngri en 18 ára geta ekki verið ábyrgðarmenn og því ekki félagar. Auðvitað hafa verið sett fram rök þess efnis að þeir sem eru yngri en 18 gætu fengið merkjara lánaða út á ábyrgð t.d. fjölskyldumeðlims sem væri yfir 18 og félagsmaður. Vandamálið við það er hvort að öruggt sé að sá félagsmaður geti borið ábyrgð á allri notkun merkjarans í höndum hins allan þann tíma sem hann er í útláni. Reyndin yrði væntanlega sú að þú myndir fá merkjarann lánaðann, einhver annar myndi skrifa undir ábyrgðina og ekki sjá merkjarann meira eftir það eða hafa hundsvit á því hvað þú værir að gera með hann.

Við hjá Litboltafélögunum erum í þeirri stöðu að reyna að hafa allt okkar algerlega á hreinu gagnvart reglugerðinni og lögreglunni til að við getum í framtíðinni knúið fram breytingar á reglugerðinni þannig að einstaklingar geti átt sjálfir sína merkjara. Á meðan við verðum að starfa undir þessum reglum og félögin eru ekki stærri en þetta þá verðum við að reyna að takmarka líkurnar á því að við lendum í veseni út af einhverjum sem ekki kunna með þessa hluti að fara. Við gerum okkur grein fyrir því að þetta stinkar fyrir ykkur, en vonandi getum við breytt þessu sem fyrst.

obsidian
LBFR