Christiane F. - Wir Kinder vom Bahnhof Zoo (1981)

Leikstjóri: Ulrich Edel
Aðalhlutverk: Nadja Brunkhorst, Thomas Haustein, Jens Kuphal, Reiner Wolk.

Fyrir um mánuði síðan las ég bók sem heitir Dýragarðsbörnin, skrifaða af Kristjönu F. Þetta er mjög fræg bók, sjálfsævisaga barnungrar stúlku sem lendir í klóm heróíns um miðjan áttunda áratuginn. Það er svo sem ekki í frásögur færandi nema að sama dag og ég kláraði bókina skrapp ég út á vídeóleigu og það fyrsta sem ég sá var hulstur sem á stóð: “Christiane F. - Wir Kinder vom Bahnhof Zoo”.

Þar sem ég er forlagatrúar fannst mér þetta vera of mikil tilviljun svo ég var “tilneydd” að taka hana. Ég skellti henni í spilarann og kom mér vel fyrir, sem var eins gott því ég hreyfði mig ekki næsta einn og hálfan tímann.

Myndin byrjar í heimahverfi Kristjönu, Grópíusbæ í Berlín og þessi eina sena sem varir í ca. hálfa mínútu nær að koma til skila fyrstu 60 bls. eða svo í bókinni. MAður fær innsýn í hversu ömurlegar aðstæður Kristjönu voru þegar hún var að alast upp. Ömurleikinn stigmagnast svo og endar í átakanlegu atriði þar sem Kristjana reynir að fá sér “gullnu” sprautuna í “besta” almenningsklósetti í Berlín.

Myndin er mjög raunveruleg, enda kvikmynduð “on location” í austurhluta Berlínar. Reyndar er myndin tekin að mestu upp á faldar myndavélar því á þeim tíma sem myndin er gerð var Sovétstjórnin enn við völd í Austur-Þýskalandi og ekki möguleiki að fá leyfi til að kvikmynda vesældina á Dýragarðsstöðinni.

Þessi mynd er þó ekki fyrir alla. Í henni sjást 13 ára krakkar að sprauta sig á drulluskítugum almenningsklósettum og barnungar stelpur að selja sig fyrir smáaura. En ég mæli hiklaust með henni.

***1/2/****

(Fáanleg á DVD í Laugarásvídeó, hef ekki kynnt mér það á öðrum leigum.)