Jæja, enginn ætlar að senda neitt inn svo þið fáið bara ruglgrein!

1. Giorgio Cantarini (karakter: Giosué Orefico) í La Vita è bella.

Að mínu mati er Giorgio Cantarini, þ.e. strákurinn í La Vita è bella, langkrúttlegasti einstaklingur kvikmyndasögunnar. Myndin snýst um að finna það fallega í lífinu þrátt fyrir erfiða tíma og ljóst er að hefði þeim ekki tekist að finna svona ótrúlega krúttlegan dreng í hlutverkið hefði það dugað skammt. Ef mér líður illa og vil rifja upp hvað lífið getur verið dásamlegt er nóg að rifja upp þegar Giorgio neitar að fara í bað í La Vita è bella og stappar niður fótunum, vá hvað það var krúttlegt. Það er nokkuð ljóst að ef maður væri á eyðieyju með Giorgio og pakka af Ritz-kexi án áleggs mundi maður ekki hika við að smyrja Giorgo á kexið.

2. Jonathan Lipnicki (karakter: Ray Boyd) í Jerry Maguire.

Flestum finnst Jonathan Lipnicki ef til vill krúttlegastur. Hann lék litla strákinn í Jerry Maguire eftirminnilega og var einmitt með ótrúlega krúttleg gleraugu í henni en hann er kominn með tough-guy gleraugu á imdb.com profile-myndinni. Einhver að reyna að losna við ímyndina. Ef þið lendið einhvern tímann í því að þurfa að láta heilan sal segja ‘awwwww’ til að bjarga lífi ykkar gæti reynst gott ráð að sýna atriðið þar sem Jonathan kyssir Tom Cruise og segist elska hann. Þar erum við sko að tala um krúttlegt.

3. James Whitmore (karakter: Brooks Hatlen) í The Shawshank Redemption.

James Whitmore er án efa krúttlegasta gamalmenni kvikmyndasögunnar sem Brooks í The Shawshank Redemption. Myndin er þannig gerð að hún magnar upp fyrirfram góða krúttmöguleika James og ef maður vill fá níst í hjartað er nóg að rifja upp Brooks að segja ‘hey, fellas’ og svo náttúrulega bréfið sem hann sendir félögum sínum í Shawshank fangelsinu eftir að hann sleppur út. Það er sama hvaða línu þeir gefa honum, hann nær m.a.s. að gera ‘Ain’t that a kick in the head’ guðdómlega krúttlegt. Pant kaupa hann ef hann verður boðinn upp.

4. Taylor Fry (karakter: Lucy McClane) í Die Hard.

Taylor Fry leikur alls ekki stórt hlutverk í Die Hard en hún fær háan krúttleikastuðul fyrir að gera orðin: ‘McClane residence. Lucy McClane speaking.’ ódauðleg. Því miður fann ég ekki mynd af henni á netinu sem mér finnst einkennilegt því hún er svo sannarlega búin að setja sitt spor á kvikmyndaöguna. Maður þarf greinilega að hafa Culkin að eftirnafni til að meika það vegna krúttleika.

5. Allir krakkarnir í Mr. Smith Goes to Washington.

Mr. Smith Goes to Washington fjallar um skátaleiðtoga sem fer á þing og þ.a.l. er mikið um litla skáta í myndinni. Það er eins og Frank Capra hafi handvalið 50 börn 10 árum áður en hann gerði myndina og þjálfað þau í þartilgerðum búðum til að gera þau sem krúttlegust því krakkarnir eru ótrúlega krúttlegir í þessari mynd. Myndin er mjög góð, ég mæli með henni.

6. Sen/Chihiro í Sen to Chihiro no kamikakushi (Spirited Away).

Aðalpersóna Sen to Chihiro no kamikakushi er vægast sagt krúttleg. Röddunin á henni er náttúrulega óaðfinnanleg (a.m.k. á ensku hljóðrásinni) en umhverfið hjálpar mikið til því hún er ein og yfirgefin í furðuheimi. Það er nokkuð ljóst að ef einhver vildi gera labbandi tímasprengju og vildi draga alla athygli frá henni ætti hann að koma henni fyrir í nákvæmri eftirlíkingu af Sen/Chihiro.

7. Kong í King Kong (1933).

Aldrei hefur ‘skrímsli’ verið svona krúttlegt í kvikmyndasögunni. Reyndar á þetta ekki einungis við 1933 útgáfuna því í 2005 er það geysilega krúttlegt þegar Ann Darrow og Kong eru að tengjast. Kong gefur frá sér aragrúa af krútthljóðum sem Andy Serkis á heiðurinn að. Persónan á líka að standa fyrir yfirgang mannsins sem er mjög krúttlegt hlutskipti út af fyrir sig. Ef maður vildi lenda á móti einhverju skrímsli væri það pottþétt King Kong því maður gæti bara steppað fyrir hann og fengið hann til að hlæja.

8. Elsti samúræinn í Schichinin no samurai (Seven Samurai).

Schichinin no samurai er nú almennt mjög krúttleg mynd (sérstaklega undir lokin þegar þeir eru á hvítu undirfötunum að berjast) en gamli vitringurinn stelur algjörlega senunni. Að vísu er hann með sinn besta ‘Bad Boy 4Life’ svip á myndinni sem ég fann en það sést alveg að hann meikar hann ekki. Krúttdrættirnir í enninu á honum leyna sér ekki. Ef gamalmennauppboðið yrði haldið í Asíu og Brooks kæmist ekki á það mundi maður pottþétt taka þennan samúræja.

Þið megið eiga von á fleiru svona rugli ef enginn fer að gera eitthvað almennilegt! Bara til að taka allan vafa þá er mér ekki mikil alvara með þessari grein.