Fyrrum stjörnuleikmaðurinn Shawn Kemp var handtekinn af lögreglu í Houston í dag eftir að lögreglumaður stöðvaði hann fyrir að aka um á númerslausum bíl. Við nánari athugun fannst sterk lykt af eiturlyfjum í bílnum og í ljós komu nokkur grömm af marijúana sem Kemp hafði falin í fórum sínum.

Þetta er ekki í fyrsta skipti sem Kemp kemst í kast við lögin, en hann lagði skóna á hilluna í NBA deildinni árið 2003 eftir að hafa lengi barist við vímuefnafíkn og offitu. Á síðustu mánuðum hafði hinn 36 ára gamli Kemp hinsvegar staðið sig eins og hetja og var að reyna að komast að hjá NBA liðum eftir að hafa komið sér í frábært form á ný og sagt skilið við Bakkus.

Kemp var einn allra besti leikmaður NBA deildarinnar á miðjum tíunda áratugnum þegar hann lék með Seattle Supersonics. Hann varð Ólympíumeistari með liði Bandaríkjanna árið 1996, var sexfaldur stjörnuleikmaður og lék til úrslita um NBA titilinn með liði Seattle gegn Chicago Bulls árið 1996.

copy/paste af vísi