Þar sem ég fylgist töluvert með NBA þá ákvað ég að skrifa hvað er að gerast í NBA, hvernig liðin eru að standa sig og hverjir hafa komið á óvart. Ég ætla að taka hvern riðill fyrir sig og senda inn grein um hvern riðill þegar ég hef tíma. Ég ætla að byrja á Atlantshafsriðlinum þar sem mínir menn eru þar.

New Jersey: 42-25
Þeir hafa komið rosalega á óvart eftir fremur lélegt gengi á undanförnum árum. Það að fá Jason Kidd frá Phoenix virðist hafa breytt rosalega miklu fyrir liðið. Þeirra lykilmenn eru Kidd, Keith Van Horn og Kenyon Martin. Þótt þeir séu efstir í austurdeildinni þá sé ég þá ekki eiga eftir að gera mikið í úrslitakeppninni, en þó er aldrei að vita. Það fer bara allt eftir hvernig lykilmennirnir eru að spila.

Boston Celtics: 38-29
Þeir hafa líka komið nokkuð á óvart, og eru núna í þriðja sæti í austurdeild. Þeirra lykilmenn eru Paul Pierce, sem er orðinn einn skemmtilegasti leikmaður deildarinnar, og Antoine Walker. Á góðum degi er aldrei að vita hvað þeir gera í úrslitakeppninni, en þó gæti vantað upp á reynsluna, þeir hafa ekki mikla reynslu í úrslitakeppni, allavega flestir þeirra leikmenn.

Orlando Magic: 37-30
Fyrir tímabilið var því spáð að Orlando yrði að berjast um efsta sætið í Austurdeild en meiðsli Grant Hill hafa veikt liðið mikið, en samt eru þeir í 4 sæti. Lykilmenn eru Tracy McGrady, Mike Miller og Darrell Armstrong. Stundum virðist Tracy McGrady vera óstöðvandi og ef hann fer í ham í úrslitakeppninni gætu þeir komist langt, auk þess að Patrick Ewing og Horace Grant koma með rosalega reynslu inn í liðið.

Philadelphia: 35-31
Eftir frábært gengi í fyrra, var reiknað með töluvert miklu af Philly, en því miður þá þarf liðið að treysta einum of mikið á Allen Iverson, ef hann er meiddur eða spilar illa þá fer það yfirleitt illa fyrir sixers. Lykilmenn eru Allen Iverson, Dikembe Mutombo og Derrick Coleman. Liðið hefur alla burði til að geta komist eitthvað áfram í úrslitakeppninni, en þá þarf Iverson að vera heill.

Washington: 31-36
Það var ekki búist við neinu af liðinu, jafnvel þótt Jordan væri kominn aftur, en hann hefur sannað það að hann er varla mannlegur, og hefur komið rosalegu sjálfstrausti í þetta lið, en þar sem hann er meiddur eins og er virðist liðið aðeins vera að hiksta. Lykilmenn eru Michael Jordan og Richard Hamilton. Þeir eru að missa af lestinni að komast í úrslitakeppnina, en eiga þó enn fræðilegan möguleika.

Miami: 30-35
Mínir menn í Miami byrjuðu tímabilið hörmulega og voru 8-26 í byrjun janúar en náðu að snúa því við og hafa nálgast liðið í áttunda sæti, en því miður virðast þeir ekki ætla að komast í úrslitakeppnina. Lykilmenn eru Eddie Jones og Alonzo Mourning. Þeir hafa alla burði til að komast í úrslitakeppnina en því miður verður það víst ekki á þessu tímabili.

New York: 26-40
Þetta lið sem hefur verið með þeim bestu í Austurdeildinni undanfarinn ár virðist vera komið á botninn núna vegna lélegrar stjórnunar á liðinu. Þeim vantar alveg stóra menn og virðast vera með lið fullt af bakvörðum. Lykilmenn eru Latrell Sprewell og Allan Houston. Ef þeim tekst að fá einhvern alvöru center með Sprewell og Houston þá á þetta lið alveg að geta gert eitthvað á næsta tímabili.