Sepp Blatter, forseti FIFA, Alþjóða knattspyrnusambandsins, segir að talsverðar líkur séu á því að úrslitakeppni heimsmeistaramótsins í Suður-Afríku árið 2010 verði leikin á gervigrasi.

„Við höfum lagt til, enda þótt það sé ekki ennþá ákveðið endanlega, að HM 2010 verði leikin á gervigrasi. Ég tel að það sé kominn tími til fyrir þennan heimshluta að einbeita sér að gervigrasinu,“ sagði Blatter við BBC að lokinni úrslitakeppni Afríkumótsins í Ghana.

FIFA vinnur um þessar mundir að byggingu gervigrasvalla í öllum löndum Afríku, nema Suður-Afríku. Vallarskilyrði í fjölmörgum löndum álfunnar eru oft mjög erfið, ýmist vegna rigninga eða þurrka.

„Með gervigrasi eru aðstæður þær sömu allt árið í kring. Ég fylgdist mjög vel með Afríkukeppninni og staða knattspyrnunnar í álfunni er á mjög háu stigi. En það sem ég er ekki sáttur við er ástand vallanna. Gervigras er góð lausn fyrir vallaryfirvöld, þá er hægt að nota vellina oftar en einu sinni í viku og nýta þá fyrir aðrar íþróttir. Það er betra en að spila á misjöfnum og ósléttum völlum þar sem erfitt er að hemja boltann,” sagði Blatter og sagði að aðalleikvangurinn í Ghana hefði t.d. ekki verið góður.