Peter Kenyon, forstjóri Manchester United, segir að það sé ánægjulegt að forsvarsmenn Real Madrid hafi reynt að kveða niður orðróm um að David Beckham sé á förum til Evrópumeistarana.
Sögusagnir þess efnis fengu byr undir báða vængi eftir að Beckham var settur á varamannabekk United í leik þess gegn Madrid í fjórðungsúrslitum Meistaradeildarinnar í seinustu viku.
Kenyon hitti Florentino Perez, forseta Real, á fundi G-14 hópsins, samtaka 18 stærstu knattspyrnuliða Evrópu, í Brussel á þriðjudag. Perez er forseti hópsins og Kenyon varaforseti.

“Aldrei, aldrei, aldrei,” sagð Perez þegar blaðamenn spurðu hann út í hvort Beckham væri á leið til félagsins.
“Það hefur enginn hjá Real Madrid nokkru sinni rætt um Beckham og ég vil ekki tjá mig frekar um þetta mál.”

“Ég er ánægður með að hr. Perez hafi staðfest þetta svo klárlega, en við hjá Manchester United höfum hvort sem er ekki neinar áætlanir um að selja hann,” sagði Kenyon.
“Allar þessar sögusagnir um framtíð David hafa náð svo langt því hann hefur átt frábæra leiktíð, en þetta hefur skyggt á nær allt sem við við höfum afrekað.”
“David hefur sjálfur lýst því yfir að hann vilji hvergi fara en við höfum alltaf verið tregir til þess að gefa út neinar yfirlýsingar varðandi útlit liðs okkar á næstu leiktíð.”
“Aðstandendur David hafa líka fullvissað mig um að þeir vilji ekki að hann fari frá Manchester United. Það eru allir á Old Trafford þakklátir Real Madríd fyrir að hafa tekið af öll tvímæli um þetta.”

Fyrr í vikunni sendi Real frá sér svohljóðandi tilkynningu um þetta mál:
“Í kjölfar frétta um meintan áhuga Real Madrid á David Beckham vill félagið koma eftirfarandi á framfæri:”
“1. Ekkert samband hefur verið á milli Real Madrid og Manchester United í þessum efnum.”
“2. Hvorki hefur verið beint né óbeint samband á milli Real Madrid og Hr. Beckham.”
“3. Þrátt fyrir ýmsar sögusagnir um þetta mál, þá hefur Madrid ekki neinar áætlanir um að hefja viðræður um kaup á Hr. Beckham.”
“4. Þvert á stefnu félagsins, sem notar aldrei eigin miðla til að neita gróusögum, hefur þessi fréttatilkynning verið gefin út til þess að binda endi á vaxandi orðróm varðandi Hr. Beckham og Real Madrid sem á sér enga stoð í raunveruleikanum.”
“5. Einstakt vináttusamband félaganna er enn til staðar sem og virðingin fyrir Hr. Beckham.”


Og ég spyr:
wbdaz: hvernig veist þú það? Þekkirðu Beckham persónulega eða stjórnendur hjá Manutd/Real? Það er alþekkt að svona orðrómar eru skapaðir svo þessi ógeðslegu bresku blöð græði eitthvað.