Finnur Kolbeins og Sævar Þór (2) skoruðu mörk Fylkis í kaflaskiptum undanúrslitaleik í Bikarkeppni KSÍ í kvöld. Finnur skoraði fyrsta mark leiksins á 7. mínútu með góðu skoti yst í vítateignum, skotið sneiddi varnarmann KA og Þórður markvörður þeirra átti aldrei möguleika á að verja. Sævar bætti við öðru marki úr vítaspyrnu um miðjan hálfleikinn og svo því þriðja undir lok hálfleiksins eftir glæsilega stungusendingu frá Steingrími.

Seinni hálfleikur fór vel af stað fyrir Fylki. Leikmenn liðsins höfðu öll tök á leiknum til að byrja með og sköpuðu sér nokkur góð færi sem ekki náðist að nýta. Lazy-boy stemming ríkt hjá stuðningsmönnum Fylkis á þessum tíma, menn hölluðu sér aftur í sætin og fylgdust með leiknum af rósemi og yfirvegun. En Addi var ekki lengi í Paradís, KA menn voru alls ekki sáttir við sitt hlutskipti, heldur bættu hressilega í og þegar Hreinn Hringsson og Ásgeir Árbæingur Ásgeirsson komu inn á jókst sóknarþungi þeirra til muna. Eftir að Hreinn skallaði yfir Kjartan í markinu á 70. mínútu var nánast bara eitt lið á vellinum. Fylkismenn komust tæplega fram yfir miðju og hver sóknin dundi á vörninni. Lokamínútur leiksins voru æsispennandi og Þorvaldur Makan skoraði glæsilegt mark á 91. mínútu og minnkaði muninn í eitt mark. Góður dómari leiksins, Gylfi Orrason, flautaði leikinn af fáeinum mínútum síðar við mikinn fögnuð Árbæinga sem nú eru komnir í bikarúrslit annað árið í röð. Glæsilegur árangur!

KA-menn eiga heiður skilið fyrir frammistöðuna og baráttuna í lokinn og það hefði ekki verið ósanngjarnt þó þeir hefðu fengið meira út úr leiknum. Fyrri hálfleikur og fyrri huti seinni hálfleiks var vel leikinn af hálfu Fylkismanna, en liðið var næstum því búið að glopra niður öruggri forystu á lokakafla leiksins og alger óþarfi að hleypa KA-mönnum svona hressilega inn í leikinn.

En bikarleikir eiga að vera dramatískir og 3:2 sigur þýðir að Fylkir mætir Fram í úslitaleik Bikarkeppninnar þann 28. september næstkomandi. Alltaf gaman í Laugardalnum!

Leikurinn var drengilega leikinn og góður andi ríkti í blíðunni á flóðlýstum Laugardalsvellinum, bæði utan vallar sem innan og gaman var að sjá Þorvald Makan, hinn skæða sóknarmann KA-manna, klappa fyrir stuðningsmönnum Fylkis eftir leikinn. Íþróttamannsleg framkoma af hans hálfu og til fyrirmyndar. Annað skemmtilegt stemmingsdæmi var þegar hálf stúkan stóð upp og hyllti Sævar Þór þegar hann fór af leikvelli um miðjan seinni hálfleik.

Lið Fylkis í kvöld: Kjartan - Björgvin, Ómar, Tóti, Gunni Þór - Sverrir, Valur Fannar, Finnur - Sævar, Steingrímur, Teddi. Björn Viðar og Jónsi komu inn fyrir Steingrím og Sævar í seinni hálfleik.