Færeyingar spila held ég líka mestmegnis á gervigrasi. Það munar um það varðandi möguleikann á fleiri leikjum. Þess utan eru þeir jú sunnar, þó ég viti ekki nákvæmlega hvernig veðrið er almennt í Færeyjum (fyrir utan að það er víst svolítið um þoku og regnúðadaga). 
Það væri eflaust hægt að spila fyrstu umferðirnar inni, en almennt þá líkar fótboltamönnum ekki við að spila of mikið á gervigrasi. Þess utan myndu sum lið vera í verri aðstöðu en önnur (Víkingur frá Ólafsvík myndi t.d. þurfa að spila heimaleikina sína á Akranesi í þessum fyrstu umferðum).

Þó að fáir landsliðsmenn spili á Íslandi þá þýðir það ekki að það hái fótboltaþróun ungra leikmanna. Þeir leikmenn sem þú nefndir hafa fæstir spilað mikið á Íslandi. Kolbeinn spilaði 5-6 leiki 16 ára áður en hann fór til Hollands, Gylfi hefur aldrei spilað meistaraflokksleik með íslensku félagsliði og Aron Einar spilaði ekki nema 5-6 leiki áður en hann fór til Hollands. Jóhann Berg spilaði minnir mig eitt tímabil á Íslandi og Alfreð tvö heil, og 6 leiki þess utan. 
Það er nefnilega þannig að yngri flokka þjálfun er orðin mun betri en hún var, sem er ástæðan fyrir þessum ungu stjörnum okkar. Við erum þó náttúrulega takmörkuð af því að við erum ekki nema 320.000, sem er minna en margar erlendar borgir sem aldrei hafa framleitt heimsklassaleikmenn á borð við Eið Smára, Gylfa Þór og Ásgeir Sigurvinsson. Þó að ungar stjörnur fari fljótlega til útlanda og læri þar í góðum akademíum er það ekkert til að gráta. Við framleiðum menn sem eru of góðir til að geta spilað á Íslandi, útaf takmörkunum, sem eru ekki aðeins veðrið.

Íslenska deildin getur nefnilega aðeins stækkað takmarkað mikið, enda ekki endalaust af peningum í boði fyrir liðin sem spila hérna. Það er ástæðan fyrir því að það getur ekki verið atvinnumannadeild hérna, ekki veðrið. Klúbbar fá mikið af tekjum sínum með aðgangsmiðasölu og ýmsum munum tengdum félaginu, svosem treyjusölu, sem og svo styrktaraðilafé. Vegna mannfæðar mun aðeins takmarkað mikið af fólki mæta á leiki, kaupa muni tengda félaginu og svo framvegis og vegna mannfæðar hafa fyrirtæki sem starfa á Íslandi (og hafa því ástæðu til að styrkja íslensk lið) ekki efni á að dæla helling af pening í félögin. Fyrirtæki styrkja jú bara félög (hvort sem þau eru íslensk eða erlend) til að græða og markaðurinn á Íslandi býður ekki uppá að fjárhæðum sem sjást erlendis sé eytt í íslensk félög. Það borgar sig ekki.

Ég er (almennt) mjög sáttur við grasrótarstarfið í íslenskri knattspyrnu og að þú sért að kvarta núna þegar við höfum líklega aldrei átt fleiri góða unga leikmenn er svolítið skrýtið. Það er einmitt sérstaklega tekið eftir því erlendis hversu góða leikmenn Ísland á miðað við mannfjölda og t.d. hafa Skotar verið að skoða "íslenska kerfið" til að sjá hvort þeir geti ekki lyft landsliði sínu á hærra plan til langs tíma litið.