Hann segist elska Valencia, en hann verður að breyta til, til hins betra, segir hann.

Gaizka Mendieta, fyrirliði Valencia, boðaði til blaðamannafundar í gær þar sem hann lýsti því yfir að hann vilji yfirgefa herbúðir Valencia.

“Vegna fjölmargra ástæðna þá langar mig til þess að biðja Valencia um að gefa mér og umboðsmönnum leyfi til þess að ræða við önur félög þar sem ég hef hug á því að fara frá Valencia. Það voru ákveðnir hlutir sem komu upp í vetur sem hafa orðið til þess að ég hef ákveðið að fara frá félaginu. Jafnvel þegar vel gekk þá var hluti stuðningsmanna félagsins á móti mér og öðrum leikmönnum liðsins.

”Að sjálfsögðu er öllum leyfilegt að gagnrýna en þetta fékk mig til þess að hugsa um hvort mínum tíma hjá Valencia væri ekki lokið.

“Ég er ekki að horfa til neins sérstaks félags. Ég er bara að leita að leið frá félaginu. Ég vil bara að ég og fjölskyldan mín sé ánægð,” sagði Mendieta.

Vitað er af miklum áhuga Real Madrid en þeir geta vart borgað þær 35 milljónir punda sem Valencia vill fá fyrir hann. Lazio er einnig að spá í hann og svo er aldrei að vita hvað Barcelona gerir en þeir hafa verið rólegir á markaðnum undanfarið og eiga örugglega eitthvað af seðlum til þess að eyða.