Sumir kettir eru litlir í sér og virðast vera alltaf hræddir. Það er lítið hægt að gera í því enda hluti af skapferlinu. Best að láta hana finnast hún vera örugg inn á heimilinu.

Kassavandamál með ketti má leysa á margvíslegan hátt. Oftast eru það merki um kötturinn sé óánægður með eitthvað og oft gera þeir þarfir sínar á gólfi ef einhver breyting hefur gerst. T.d. ef þú ert að flytja eða nýflutt, eða ef þú ert að breyta heimilinu (smíða), ef nýtt barn er komið í fjölskylduna eða annað gæludýr.

Til að leysa að hún kúki fyrir utan kassann er hægt að prófa t.d.
- Í fyrsta lagi að hreinsa blettinn sem hún kúkar á mjög vel. Helst með efnum sem leysa upp lífræn efni (t.d. Ensými) og alls ekki sápu með ammoníak (köttum finnst ammoníaklykt vera eins og pissulykt og halda áfram að merkja staðinn). Þetta er gert vegna þess að dýr halda áfram að gera þarfir sínar á stöðum sem þeir finna lykt af þvagi og hægðum.
- Prófaðu að nota annan kattarsand í kassann. Gæti verið að hún sé að mótmæla sandinum. Keyptu klumpandi sand og hreinsaðu kassann daglega. Mæli með Cats best kattarsandi sem fæst í Dýrabæ, Hlíðarsmára 9.
- Prófaðu að færa kúkakassann annað, helst á stað sem hún fær frið til að gera þarfir sínar. Ef þú ert með opinn kassa þá gæti verið að þú þurfir að kaupa lokaðan kassa, svo hún fái meiri frið til að gera sitt. Ef þú ert með lokaðan kassa, prófaðu að taka hurðina af, gæti verið að hún sé hrædd við að vera í kassanum svona lokuðum
- Ef hún sýnir einhverja aðra grunsamlega hegðun farðu með hana til dýralæknis, gæti verið að hún skíti fyrir utan kassann vegna þess að hún er veik.

Þetta er það sem mér dettur í hug. Annars er bara að fikra sig áfram, gera eina breytingu í einu og athuga hvernig hún tekur því. Ef hún er ekki vön að vera sóði þá er það örugglega merki um að hún sé óánægð með eitthvað.
Gangi þér vel
Heiðrún