Fullyrðingar um að breyttir jeppar valdi fleiri slysum en aðrir bílar eru eingöngu byggðar á getgátum og fordómum. Það eru engar tölur til sem styðja það og ekki hægt að lesa það útúr slysaskráningum. Það eru til tölur um fjölda dauðaslysa þar sem jeppar koma við sögu (ekki breyttir jeppar sérstaklega) og þær benda ekkert sérstaklega til þess að jeppar séu hættulegri en aðrir bílar, en til þess að það sé hægt að draga einhverjar ályktanir af þeim þarf að bera þær saman við fjölda jeppa í umferð og svo auðvitað greina á milli breyttra og óbreyttra jeppa.

Það er víst eitthvað verið að skoða þessi mál en ég held að það standi ekkert til að banna eitt né neitt nema það komi eitthvað skuggalegt í ljós. Sem er ekkert sérstaklega líklegt.

Hins vegar þurfa jeppaeigendur að nota aðeins common sense eins og aðrir og keyra í samræmi við það. Benni (í Bílabúðinni) var einhvern tíman að benda á það að okkur hætti til að keyra þessa trukka allt of hratt og lítill Yaris sem lendir í því að mæta nokkrum 44" Patrolum á mjóum malarvegi á fullri ferð, hann er örugglega ekkert að vanda jeppamönnum kveðjurnar og mjög eðlilegt að hann líti á þá sem stórhættulega glæpamenn í umferðinni. Benni vildi að á sama hátt og menn komu af stað hugarfarsbreytingu á sínum tíma gagnvart utanvegaakstri og náttúruskemmdum, þá þurfi núna samskonar hugarfarsbreytingu gagnvart aksturslagi á vegum þannig að jeppamenn fái á sig þá ímynd að vera til fyrirmyndar í umferðinni. Ég held þetta sé hárrétt hjá karlinum, við þurfum ekki einhverja lagasetningu heldur þurfum við bara að venja okkur á að sýna skynsemi og tillitsemi í umferðinni. Og þá stórminnkum við líkurnar á að fá yfir okkur vanhugsaðar lagasetningar.