Skjálfandi ungmenni í vígahug.

LOKSINS er búið að setja upp æfingarbúðir fyrir barnunga vígamenn á Íslandi. Hingað til höfum við þurft að horfa öfundaraugum til Palestínu, Ísraels, Kólombíu, Bandaríkjanna og annarra alvöru útlanda sem eiga herská og vopnuð ungmenni, en nú eru kominn vísir að öflugri og markvissri framleiðslu á íslenskum skyttum. Ungmennin reyna á samhæfingu hugar og líkama, beita útsjónarsemi og ná fram sterkri liðsheild og umfram allt góðum anda.

SKÍTT og lago með leiðindajarm í sálfræðingum og sérfræðingum sem þykjast finna samhengi á milli glæpaheims og sýndarheims - beina tengingu á milli morða og ofurhetja kvikmynda og tölvuleikja. Heimurinn er í stöðugri framrþóun og þetta er þróun sem við megum ekki missa af. Að vísu er íþróttin aðeins stunduð á tölvuskjám í bili. En oft á tíðum er hárfín og ósýnileg lína á milli veruleika og óveruleika og því má gera sér vonir um að einhvern tímann verði stokkið út úr tölvuheiminum til þess að sjá alvöru blóð renna. Nánir og eineggja tvíburar standa þétt saman, svo sem þær heisla og vanheilsa, siðgæði og siðleysi, mennska og ómennska, feigur og ófeigur.

SÍMINN hefur lagt skógrækt og fjárhættuspil á hilluna og súið sér að öflugri æskulýðsstarfi ásamt fleirum. Nú skal styrkja Skjálftamót ungmenna í Kópavogi. Fimm hundruð börnum var smalað í búðirnar til helgardvalar. Færustu keppendurnir skjóta tugi manna á einni helgi, sagði í sjónvarpi allra landsmanna. Þeir vesalingar sem ekki náðu að drepa nógu marga máttu að sjálfsögðu æfa sig á nóttunni. Því hvað er skammarlegra en að koma heim að loknu íþróttamóti án þess að hafa drepið neinn? Það hefði þó sjálfur Egill Skallagrímsson tekið undir að væri aumingjalegt.

OG íþróttin er beinlínis hönnuð fyrir hin sérstaka innistofn íslenskra barna. Fátt er óhollara en of stór skammtur af súrefni og hreyfing er fyrir vesalinga sem kunna ekki að skjóta. Styrktaraðilar gætu í framtíðinni veitt bestu skyttunum vegleg verðlaun. Fyrstu verðlaun gætu verið vika á vesturbakkanum, önnur verðlaun á vígslóðum Vosíngton og þriðju verðlaun dagur með dátum á Miðnesheiði. Aukaverðlaun fyrir viðleitini gætu verið stutt sýnikennsla í notkun borvéla og tanga á vegum Handrukkarafélags Íslands.

gg Stína þröngsýna..