Ég hef að undanförnu fylgst aðeins með umræðu hérna á korkunum um kosti og galla pmove_fixed í Q3 1.27g. Greinilegt er að fólk hefur sterkar skoðanir á þessu máli, og vilja ýmsir halda því fram að pmove_fixed 1 skekki leikinn á einhvern hátt sem hafi m.a. áhrif á mið leikmanna. Þessu til stuðnings hafa einhverjir verið að vitna í leiki sem þeir hafa spilað með pmove_fixed 1 þar sem þeir gera ekki annað en að rekast utan í veggi og skjóta út í bláinn. Hið versta mál að sjálfsögðu. Það sem ég skil ekki í þessu samhengi er eftirfarandi:

Ef pmove_fixed hefur þessi slæmu áhrif á leikmenn (gefum okkur að svo sé) ættu þau væntanlega að bitna jafnt á öllum. Enginn ætti þá, samkvæmt þessu, að hitta neitt að ráði né komast leiðar sinnar (a.m.k. ekki sérlega hratt). En sú er alls ekki raunin. Fjölmargir pluma sig ágætlega með pmove_fixed 1 og hafa undan engu að kvarta. Margir hverjir eru rammafátæk grey sem hitta alveg jafn vel og áður en geta jafnframt svifið lengra en í gamla daga.

Gengur þetta upp? Mismunar pmove_fixed 1 fólki á einhvern hátt? Ég hef ekki svarið við þeirri spurningu, en ég hugsa að ef pmove_fixed hefði raunverulega neikvæð áhrif á mið og annað slíkt, að þá væri víðtækari óánægja með þessa tilhögun en raun ber vitni um.

Hvað er þá í gangi? Er fólk að ímynda sér eitthvað? Fjölmargir hafa sagt frá því hvernig þeir hafa borið saman leiki með og án pmove_fixed og niðurstöðurnar segja þeir vera ótvíræðar (auk þess sem að hlýtur að liggja einhver ástæða að baki því að einhverjir eru yfirleitt óánægðir til að byrja með). Þessar niðurstöður sýna vissulega að einhverjum gengur verr þegar pmove_fixed er 1 heldur en þegar það er 0. Mér þykir þetta alls ekki ólíklegt. Hins vegar er ég ekki sannfærður um að pmove_fixed sé djöfullinn. Ég held að lang einfaldasta og um leið (í mínum huga) líklegasta skýringin á þessu sé að sumir eigi erfitt með að venjast þeim nýju náttúrulögmálum (physics?) sem pmove_fixed 1 hefur í för með sér. Ég spilaði alltaf með cl_125Hz 1, en samt var ég lengi að venjast pmove_fixed 1. Maður svífur einfaldlega lengra, strafe jumpar hraðar, og þ.a.l. er erfiðara að taka snöggar beygjur o.s.frv. Segjum sem svo að einhver sé vanur að spila við vin sinn (á staðarneti) á sínum eigin server án þess að nota pmove (eins og allir vita er helvíti að vera með osp server í windows ;o)). Þegar þessi vinur okkar tengist síðan skjálfta og fer að spila líður honum eins og á tunglinu. Hann rekur sig í hvern einasta vegg í borðinu og hittir ekki nokkurn skapaðan hlut. Því er eins farið með spilara (t.d. sjálfan mig) sem eru vanir því að spila með pmove_fixed og prófa svo að spila án þess. Sementsskór og railið skilið eftir heima. Einfaldlega tveir gjörólíkir heimar.

Ég veit, áður en fólk rífur mig í sig, að þeir sem hafa verið að gagnrýna pmove_fixed hafa spilað með það í heillangan tíma og náð að venjast því (eða ættu að hafa gert það). Tilgáta mín er sú að fólk sé að spila annað slagið á serverum sem noti ekki pmove_fixed, sem valdið gæti þessum ruglingi. Nokkuð svipað því þegar maður er á lani og prófar svo að spila á netinu (manni líður einhvern veginn soldið ‘off’).

Eins og ég sagði, þetta er bara tilgáta. Ég hef spilað fjölmarga leiki með pmove_fixed 1 og er orðinn algjörlega háður því. Ég hef aldrei tekið eftir neinu slæmu við pmove_fixed 1 síðan ég vandist því (sem tók sinn tíma). (Þetta er auðvitað mjög einstaklingsbundið).

Að lokum (já, það er komið að lokum þessarar langloku =)) vil ég minna alla á að upprunalega var pmove_fixed hannað til þess að koma á einhvers konar jafnrétti í hreyfigetu spilara (sem hlýtur að teljast af hinu góða ekki satt?), sem það hefur og gert. Ég held að ef pmove_fixed 1 væri breytt í 0 í dag yrðu eftir sem áður jafn margir óánægjuseggir, í þetta sinn að kvarta undan því að þeir hittu ekkert útaf þessu fjandans pmove_fixed 0 (við þetta myndu svo bætast kvartanir frá fólki sem gæti ekki tekið T2 hoppið os.frv. o.sfrv. o.s.frv.). Er þetta ekki bara spurning um að venja sig á eitthvað eitt?