Kafli 1
Útvarp Matthildur. Dagskrá kvöldsins verður á þessa leið:
Að loknum fréttum og veðurfregnum hefst “Ég er kalinn á hjarta”, Kristján Albertsson syngur nokkur baráttulög úr kalda stríðinu. Fyrsta lagið sem hann syngur er “Sjá roðann í austri”, þá kemur Grýla kallar á börnin sín og loks “Stalín úti í tunglsljósi, Stalín úti í skóg” eftir 12. september 1901.
Að því loknu verður helgistund, séra Guðbjörn tekur hlustendur til bæna.
Klukkan 27:15, Sérkennilegt sakamál: Maðurinn sem hjó fótinn af tengdamóður ömmu sinnar, stal kremkexi frá slökkviliðinu í Hafnarfirði og dó úr glímuskjálfta. Steinn Ásgrímsson haffræðingur segir frá.
Að því loknu klukkan ellefu, Gatan mín, séra Guðbjörn gengur um Herbertsstrasse.
Klukkan 19:19 hefst þátturinn Við sjóinn, Þórður Breiðfjörð finnur hlustendur í fjöru og Gísli Örn Lárusson dregur ýsur.
Loks er Þótti og þröngsýni, þáttur í umsjá þjóðkirkjunnar.
Að loknum fréttum og veðurfregnum: Maður er nefndur, Magnús Kjartansson skipar nokkrar nefndir.
Þá hefst Hljómplötusafnið, Gunnar Guðmundsson safnar nokkrum hljómplötum.
Klukkan 17: Á varðbergi, Hvatarkonur bæla hvatir sínar.
Klukkan 18: Frá útlöndum, Magnús Þórðarson og Tímas Karlsson koma heim frá útlöndum.
Núll núll fimm: Gatan hans, Þórður Breiðfjörð og Gísli Örn Lárusson skyggnast eftir séra Guðbirni, sem enn er í Herbertsstrasse.
Þá hefst Gatið mitt, Þórður Breiðfjörð segir frá reynslu sinni við prófborðið.
27:30 syngur kór bakarasveinafélagsins af hinni nýju hljómplötu sinni, “Lagkaka”. Fyrst er “Kanntu brauð að baka”, þá “Eins manns dauði er annars brauð”, síðan “Allt í köku allsstaðar” og loks “Gef oss í dag vort daglegt brauð”.
Þar á undan, Gatan mín, séra Guðbjörn gengur um Herbertsstrasse, það er tvöhundraðasti og fjórði áfangi.
Núll núll sjö: Bannlögin, Jón Þórarinsson bannar nokkur lög.
Skömmu síðar lýkur sakamálaleikritinu “Hver er utanríkisráðherra?”.
Dagskránni lýkur svo með þættinum Á hljóðbergi, Dirch Passer les úr Andrési Önd.



Kafli 2
Útvarp Matthildur. Klukkan er hálf þrjú. Nú verða sagðar fréttir.
Fréttirnar segir Þórður Breiðfjörð.
Mikil hungursneyð ríkir nú í Bakistan og hafa fjölmargar ríkisstjórnir sent flugvélar á vettvang með fæði og húsnæði. Matthildska ríkisstjórnin ákvað á skyndifundi í dag að senda innilegar samúðarkveðjur í ofboði til hins sveltandi fólks.
Í málefnasamningi hinnar nýstofnuðu ríkisstjórnar í Matthildi segir meðal annars að Matthildur muni þegar í stað leggja áherslu á að ganga úr og í NATO, hækka og lækka kaupið, lækka og hækka gengið, færa landhelgina fram og aftur, reka og hafa herinn, vera í og utan EFTA, setja bakstra á verðbólguna og leggja áherslu á að áhersla verði lögð á áhersluatriði. Aðalefni málefnasamningsins fjallar um styttingu og lengingu vinnuvikunnar. Fréttastofan náði tali af frú Ólafíu.
-“Frú Ólafía, hvernig verður framkvæmdum háttað við styttingu og lengingu vinnuvikunnar?”
-“Ja, veistu það, ég bara veit það ekki.”
—
Sýningum á Hárinu sem hefjast áttu með haustinu hefur verið frestað vegna flösu.
Í umræðum á Alþingi í gær kom fram hjá formanni Sjálfgræðisflokksins að Sjálfgræðisflokkurinn hefði ætíð barist fyrir því að landhelgin yrði færð út eigi síðar en 1.september 1972. Þetta hafi sem kunnugt er verið stefna Sjálfgræðisflokksins í síðustu kosningum, en nú hafi ríkisstjórnin tekið upp þessa stefnu og gert að sinni, og sé það vissulega þakkarvert. Þó hafi ríkisstjórnin ekki þorað að ganga eins langt og Sjálfgræðisflokkurinn, en stefna hans sé sem kunnugt er að landhelgin verði miðuð við 400 cm öldutoppa í 14 hnútum, og til viðmiðunar sé hafður ganghraði kolkrabba í auðum sjó.
—
Fréttastofunni hefur borist fyrsta tölublað af ritinu “Sameining”. Sameiningartákn blaðsins prýðir forsíðu þess og sýnir hverja höndina upp á móti annarri. Fréttastofan náði tali af einum sameiningarmanna eftir langa mæðu.
-“Henrý Baldur Bersi Andrés Önd Hannibalsson, ábyrgðarmaður Sameiningar, hver eru tildrög útgáfunnar?
-”Ja, við gátum ekki komið okkur saman um að gefa það ekki út, svo við urðum að gefa það út.“
-”Nú heitir blaðið “Sameining”, hvað eigið þið sameiginlegt?“
-”Ja, það er náttúrulega sundrungin sem sameinar okkur.“
-”Aðalslagorð ykkar er: “Sameiningarmenn í öllum flokkum, sameinist”. Hverjir eru þessir sameiningarmenn og hvað ætla þeir að sameinast um?“
-”Við sameiningarmenn samanstöndum af nokkrum sameiningum sameiningarmanna sem lengi hafa staðið sameinir í ýmsum flokkum og staðið á sama, en ætla nú að sameinast um það að sameinast.“
—
Í gær héldu matthildskir eiginmenn fund í Laugardalshöllinni. Ákvað fundurinn að láta í ljós samúð sína með kvenréttindabaráttu matthildskra rauðsokka með því að rísa úr sætum og hlæja.
—
Í viðtali við fréttastofuna í dag sagði doktor Geirfinnur Guðmundsson geirfuglafræðingur að geirfuglskjöt það sem nú væri á boðstólum, niðursoðið í dósir í verslunum bæjarins, væri trúlegast ekki af geirfugli. Benti Geirfinnur á það að í bókinni ”Finnur og fuglarnir“ komi það fram að síðustu fjórtán dósirnar af niðursoðnum geirfugli sem til voru í heiminum hafi selst á uppboði hjá Southby í London árið 1926. Kaupandi var jarlinn af ”leið“, sem lést úr matareitrun ásamt fjölskyldu sinni skömmu síðar.
—
Vegna samhæfðra og þrautskipulagðra aðgerða toll- og leynilögregluyfirvalda tókst að komast fyrir stórfellt hasssmygl á Keflavíkurflugvelli ekki alls fyrir löngu. Hámarki náðu þessar aðgerðir er salernisvörður staðarins hnaut um hassbirgðir sem lágu í sekkjum hist og her um starfsvettvang hans. Lögreglan telur að hér hafi verið hin harðsvíruðustu glæpasamtök að verki, þar sem sekkirnir voru ýmist ómerktir eða á þá var letrað orðið ”gráfíkjur“. Kvað lögreglan þetta sýna ljóslega til hvílíkra lymsku- og örþrifaaðgerða glæpahringir gætu gripið. Að lokum þakkaði lögreglan þennan sigur hinu mikla og frábæra undirbúningsstarfi sínu, og hasshundinum, sem reyndar var staddur í Reykjavík er þetta gerðist, en hafði gefið löggæslumönnum ýmis hollráð áður en hann fór í bæinn.



Kafli 3
Fréttastofan náði tali af Ugga Greipssyni pípulagningamanni, umboðsmanni Geysis.
-”Þetta var mikið gos, Uggi?“
-”Jú, sá gamli gaus 56 metra og 26 sentimetra fyrir ofan sjávarmál.“
-”Þetta hefur þá verið hin stórfenglegasta sjón.“
-”Nei.“
-”Nú?“
-”Því miður var enginn viðstaddur þegar hann gaus, en þetta var hið mesta gos.“
-”Mun þetta gos ekki stórauka ferðamannastraum til Matthildar?“
-”Vissulega, enda náðum við mynd af gosinu skömmu eftir að því lauk, og verður henni dreift um allan heim. Hugmyndin er þá sú að fara sömu leið og gert hefur verið við Gullfoss, það er að segja að setja á hverinn krana sem auðveldlega má skrúfa frá þegar ferðamennirnir koma. Er þarmeð lögnin fullkomnuð, kaldur krani á Gullfossi og heitur krani hér.“
—
-”…og hver er þá stefnan Ólafía?“
-”Ja, svarið við því er að finna í málamyndasamsetningnum á síðu 6, já þarna ofarlega á síðunni.“
-”Já, en hvað með herinn Ólafía?“
-”Já, ja, um þetta eru skýr ákvæði í málamyndasamsetningnum, en ja það var hann Maggi Kjar sem samdi þann kafla og ja, ég hérna, ég hef bara ekki lesið hann.“
-”Verður herinn þá látinn fara?“
-”Ja, hvert á hann að fara? Nú einhversstaðar verða vondir að vera. Og fyrst við erum nú á annað borð þarna í ja hva, EFTA eða hvað það nú heitir, þá verðum við að taka afleiðingunum af því. Annars er Nanna Skaft og Birna á Mýri og allar hinar stelpurnar á teppinu eitthvað svag fyrir þeim.“



Kafli 4
Ef herinn er þá er hann hér
er her, her er
Í huga mínum rennur Kaninn inn og úhút
fram og aftur, upp og gegnum sjálfan sig í hnút.
Ef herinn fer þá fer inn her
her fer, fer her
Í huga mínum rennur Kaninn inn og úhút
fram og aftur, upp og gegnum sjálfan sig í hnút.



Kafli 5
Menntamálaráðuneytið gaf í dag út handtökuskipun á hendur þeim ótíndu óbótamönnum sem gerðu strandhögg í Eldey nýlega. Skorar ráðuneytið á Vestmannaeyinga að gera sjálfsmorðstilraunir sínar annarsstaðar og það sem allra fyrst, ella muni ráðuneytið taka af þeim ómakið.
—
Kristrún í Hamravík hefur verið gerð að fyrirlesara í matthildskum nútímabókmenntum, og hlýtur Kristrún stöðuna fyrir tímamótaverkið ”Guðmundur G. Pensillín - metsölubók“.
—
Landsmót ungmannafélaganna í Matthildi stendur nú yfir og var Elliði Karlsson kjörinn formaður Ungmennafélagasambandsins í fimmtugasta og fjórða sinn. Fréttamaður útvarpsins hitti Elliða að máli.
-”Elliði, hvert er helsta vandamál ungmennafélaganna í dag?“
-”Maðurinn með ljáinn.“
—
Fréttastofunni hefur borist eftirfarandi yfirlýsing: Við mótmælum þeim ofsóknum á hendur okkur sem felast í ákvörðun ríkisstjórnarinnar um að láta þá er breiðust hafa bökin bera öll aukin útgjöld ríkissjóðs. Félag matthildskra lyftingamanna.
—
Í fréttaskeyti til fréttastofunnar voru að berast óljósar fregnir af hljóðdvalarbyltingunni miklu. Segir að uppreisnarmenn hafi beitt fyrir sig hljóðvörpum og finnbogum, og hafi tveir íslenskufræðingar klofnað í einfalda sérhljóða þegar raddband slitnaði í átökunum. Víða á Vestfjörðum mátti heyra gamlar konur og linmæli. Flámæltu uppreisnarmenn marga lifandi.
—
Á árinu hafa fundist margir stórmerkilegir sögulegir hlutir í Matthildi. Má þar helst telja steinasafn Jónasar Hallgrímssonar, fingrafar Jóns Arasonar, hempu og trefil Nonna, heljarskinn Geirmundar, ljóð Páls Ólafssonar, grímur Thomsens, gleraugu Hallgríms Péturssonar, sundgleraugu Grettis og loks rakvél Njáls.
—
Í janúar gerðust þau stórmerki að drukkinn maður stal flugvél, og var það eina flugvélarán sem framið var í Matthildi á árinu. Þórður Breiðfjörð brá sér í flugturninn með hljóðnema.
-”Ingi Alfreð Friðrik, Ingi Alfreð Friðrik. Nonni! Komdu niður! Komdu niður!“
-”Hvað er þetta maður, ég er svo hátt uppi.“
-”Nei!!! Ekki fljúga á Hallgrímskirkju! Komdu niður! Annars tökum við af þér lendingarleyfið! Hættu þessu Nonni! Nonni!!! Þú truflar kennslu í háskólanum! Komdu niður! Komdu niður!!!“
-”Komdu niður kvað hún amma, komdu niður segja pabbi og mamma… heyrðu, þetta er allt í lagi, ég drekk mig niður smám saman…“



Kafli 6
Og þá er komið að fugli dagsins.
(löng þögn)
Fugl dagsins var geirfugl.
—
-”Skipulagsmál höfuðborgarinnar hafa verið mjög á döfinni að undanförnu, og við erum staddir hér á gatnamótum Iðnós og Lækjargötu og horfum yfir tjörnina. Hér hefur orðið allmikið rask. Uuu… segið mér Guðmundur, hver er tilgangurinn með þessum framkvæmdum hér?“
-”Ja, tjörnin hefur lengi verið mér þyrnir í augum, enda hin hræðilegasta forarvilpa. Því ákvað ég að hún skyldi bara hverfa.“
-”Og hvernig hafið þér hugsað yður framkvæmd þess? Ætlið þér að hleypa úr henni og þurrka hana upp?“
-”Neineineineinei, alls ekki, neineineinei. Tjörnin er svo snar þáttur í lífi margra að okkur dettur ekki í hug að fórna henni á nokkurn hátt, en burt skal hún.“
-”Og hvernig þá?“
-”Ja, eins og þér sjáið erum við byrjaðir að færa hana upp í brekkuna hér fyrir ofan, og til að auðvelda það útrýmdum við húsunum við Tjarnargötuna. Í brekkunni verður auðveldara að setja undir hana hjól samkvæmt útreikningum mínum.“
-”Uu… hjól?“
-”Já, hjól já. Ja, meiningin er að festa á hana hjól og draga hana síðan upp í Árbæ.“
-”Uuu.. já…uuu… Það sem ég átti nú eiginlega við, Guðmundur, var það hvort ekki gæti orðið erfitt að ná taki á tjörninni.“
-”Já, neinei, sko, tjörnin fer ekki langt af sjálfsdáðum. Hún er búin að vera hér ansi lengi sko, alltof lengi, því miður.“
-”Uuu… ég á nú við, er hún ekki fullmjúk, eða blaut…uuu…skvapkennd til að hægt sé að hafa hendur á henni?“
-”Ja, sko, sjáið þér pokastaflana hér í kring? Sko, í þeim er stífelsi sem við höfum komist yfir. Þegar því hefur verið hellt í tjörnina verður leikur einn að bregða um hana kaðalspotta, og draga hana síðan upp í brekkuna.“
-”Einmitt, einmitt það já.“
-”Já.“
-”En hefði steinsteypa ekki verið heppilegri?“
-”Nei, neinei, sko bróðir minn, hann hefur umboð fyrir stífelsi sko.“



Kafli 7

Tilkynningar: Verslun og viðskipti.
- ”Þegar dallurinn sökk“, ógleymanleg sjómannasaga um stórslys og svaðilfarir. Bókaútgáfan Heimdallur.
- Munið eftir smáfuglunum. Skotfélagið.
- Spennið öryggisbeltin og bíðið spennt eftir slysunum. Umferðarráð.
- Hverfa(-)samtök Sjálfgræðisflokksins(?). Sjálfgræðisflokkurinn.
- Skreið til Nígeríu. Skreið til Nígeríu. Hver skreið til Nígeríu?
- Er að drepa tímann. Tímas Karlsson.
- Bölsýnismenn, bölsýnismenn! Höfum fyrirliggjandi í miklu magni áfengisböl, þjóðarböl, alheimsböl, böl, heimilisböl, Hanniböl.
- Frá lögreglustjóraembættinu. Að gefnu tilefni vill lögreglustjórinn í Matthildi beina þeim tilmælum til fanga sem ferðast um landið á puttanum, að þeir trufli ekki lögregluna við skyldustörf hennar.
- Verslun og viðskipti: Munið okkar vinsæla kalda stríð. Morgunblaðið.







Kafli 8
Í fréttaaukanum ræðir Þórður Breiðfjörð við Jón Þór Sæmundsson, yfirmann leynilögreglu Matthildar.
-”Nú hefur verið kvartað yfir því í matthildskum dagblöðum að undanförnu hve fáliðuð leynilögreglan væri. Hversu margir starfa hér raunverulega?“
-”Auk mín er það ég, ég sjálfur, Páll og Sigurður sem nú er hættur. Auk þess er hér vélritunarstúlka, Jónína, föðursystir móðurbróður Páls sem ég nefndi áðan. En ég við taka það skýrt fram að hún er ekki ráðin í gegnum klíku, enda hef ég margoft hamrað á þessu í viðtölum.“
-”Að sjálfsögðu ekki Jón, en þurfa þeir sem starfa hér ekki að búa yfir einhverri sérstakri þekkingu og reynslu?“
-”Reglur kveða á um að leynilögreglumenn verði að hafa mjög fjölþætta menntun“
-”Jahá, hvað geturðu þá sagt okkur af sjálfum þér og þinni æsku?“
-”Ég fæddist í Grenjaðarstaðarhreppi skömmu fyrir frostaveturinn mikla. Það ár fórst skúta sú með hundi og öllu innanborðs sem Pálína hét. Þeirra dóttir kemur hér við sögu… (spólað áfram) …í volki og barningi en semsagt eftir að ég hafði verið á togara í 16 ár sótti ég um starf við götulögregluna í Matthildi, en var þegar í stað ráðinn yfirmaður leynilögreglunnar.“
-”Jahá, þetta var löng, mjög löng raunasaga. En segðu mér Jón, nú hefur verið nokkuð um afbrot að undanförnu. Hvernig hafið þið upp á afbrotamönnum?“
-”Það er ákaflega misjafnt og flókið mál. Þar er fyrst til að taka að sumir eru okkar föstu kunningjar, en þeir koma hér reglulega á mánudögum og föstudögum til að játa. Svo er það hin manngerðin, þessir harðsvíruðu, það er þeir sem ekki mæta í játningartímana á mánudögum og föstudögum.“
-”En koma nú ekki stundum nýjir afbrotamenn til sögunnar?“
-”Neineineinei… og þó… Jú, slíkt ber nú við.“
-”Hvernig fáið þið þessa nýju menn til að játa?“
-”Já, þetta er náttúrulega algert leyndarmál sem ég er tilneyddur að segja frá í sem allra fæstum orðum. Þar beitum við ýmsum sálfræðilegum brögðum til að brjóta niður viljaþrek viðkomandi afbrotamanna. Sé ekki hægt að nota þessa aðferð eða reglu, til dæmis ef afbrotamaðurinn þegir eða byrjar að rekja ættir sínar og vill klíku, ja, þá er ekki um neitt annað að ræða en beita hné-aðferðinni.“
-”Hné-aðferðinni?“
-”Sú aðferð er úthugsuð af mér sjálfum, og hefur hún borið ríkan ávöxt. Við hné-aðferðina ber maður sig þannig að, að maður læðist hljóðlega í humátt að sökudólginum og reynir að beina athygli hans frá hnénu á honum með því að tala um allt annað. Þegar maður er kominn í seilingarfjarlægð frá sökudólginum leggur maður höndina eldsnöggt og fyrirvaralaust á hnéð á honum, þéttingsfast. Skjálfi hnéð er hann sekur. Skjálfi það ekki, saklaus.“
-”Jahá, en er þessi aðferð virkilega ótvíræð?“
-”Tvímælalaust, alveg tvímælalaust. Að vísu getur maður þurft að færa sig aðeins upp eftir lærinu, en slíkt er maður ekki að telja eftir sér til að ná árangri í starfi, það er ná fram skjálftanum.“
-”Já Jón, þetta hefur nú verið hið fróðlegasta spjall og ég nú viss um að hlustendur eru miklu nær eftir þetta spjall, en Jón, er eitthvað að mér, afhverju horfið þér svona á mig?“
-”Ég var bara að furða mig á því afhverju það skelfur svona á þér hnéð…“







Kafli 9

-Frá Náttúruverndarráði: Sparið náttúruna. - Hrein mey fjölgar ei - Náttúruverndarráð. Spillum ekki

náttúrunni, við missum hana nógu fljótt samt. Náttúruverndarráð.
-Lúðvíkingar, Lúðvíkingar! Brúðuleikhús okkar sýnir í félagsheimilinu í Lúðvík í dag. Hinar þekktu brúður

Arnalds og Svala dansa á flokkslínunni undir stjórn hins góðkunna fjöllistamanns M. Kjartanssonar.
-Þeir sletta skyrinu sem eiga það. Mjólkursamsalan.
-Lokað eftir hádegi í dag. Hnífurinn stendur í kúnni. Sláturfélag Suðurlands.
Ferðir og ferðalög.
-Ferðalangar, ferðalangar! Hafið með ykkur bein handa hasshundinum þegar þið komið heim frá útlöndum.

Hundavinafélagið.
-Höfum himin höndum tekið, hann situr nú í fangelsi. Lögreglan.
Vinna og ráðningar.
-Ungum frásóknarmönnum verður veitt ráðning í dag. Flokksstjórnin.
Tapað-Fundið.
-Frá Alþýjaflokknum: Málstaður okkar tapaðist á leiðinni frá Sjálfgræðisflokknum yfir á vinstri kantinn.

Þegar hann fór að heiman var hann með kápuna á báðum öxlum og vart þekkjanlegur. Þeir sem kynnu að

hafa orðið hans varir eru beðnir að líta í eigin barm. Alþýjaflokkurinn.







Kafli 10
Næst á dagskránni er húsmæðraþáttur, Rakel Sívertsen flytur nokkur gullfalleg ljóð.
-”Ég ætla að lesa hér nokkur gullfalleg ljóð sem ég frumorti.



Bakstur
Ég er að baksa og baka
og bráðum verður kaka,
kartöflur og hveiti
ég kannski legg í bleyti,
bæti í það feiti,
Sívertsen ég heiti.



Að síðustu les ég eitt sögulegt ljóð um Guðrúnu Ósvífursdóttur. Ljóðið heitir Ástarsorgir.



Hún átti hund, hún átti hest,
en var þeim verst er hún unni mest
uns hann lést.
Ei hún hló er Kjartan dó,
og þó.
Að vörum bar hún bolla
en samt hún skellti skolla-
eyrum við
ómi unga hjartans
er eitt sinn sló til Kjartans.
Það sló og sló,
en dó.“







Kafli 22
Útvarp Matthildur. Næst á dagskránni er þátturinn Styrjaldarleiðtogarnir. Páll Breimar Jónsson sér um þáttinn. Lesari með honum er annar hver starfsmaður útvarpsins.



Hitler litli var voða voða vondur.
Þegar Hitler var 5 ára sagði hann við móður sína:
-”Haltu kjafti helvítis druslan þín!“
Þá hafði Hitler litli sótt um inngöngu á barnaheimili í Vín.
Barnaheimili þetta var stofnað í Salzburg 30. nóvember 1812 af ungfrú Edeltraut Katzenjammer sem borðaði hafragraut í hvert mál, en þann dag var mjög gott veður í Salzburg.
Og hvað hafði þessi reynda barnfóstra að segja um Hitler 5 ára?
-”Hann fór ekki einu sinni úr stígvélunum!“
…þegar hann kom inn.
Á barnaheimilinu var Hitler litli mjög vondur, ofsótti öll hin börnin og sparkaði í þau.
Og hvað hafði Johann Wolfgang von Goethe, besti leikfélagi Hitlers á barnaheimilinu, um þetta að segja?
- en hann er enn á lífi og býr í Bonn.
-”Ég er enn með marblett eftir hann.“
Illmennska Hitlers birtist nokkrum mánuðum síðar þegar hann var 8 mánaða og bað móður sína…
- sem var hin vænsta kona og gekk alltaf í rósóttum kjól frá The Norman Brothers, 65 Oxford Street, London.
…um mjólk.
-”Ég vil fá pelann!“



Þetta var barnatíminn, Páll Breimar Jónsson barnaði Tímann.







Kafli 24
Nú er verslunarmannahelgin og voða voða mikil umferð ökutækja á þjóðvegum landsins. Munið að halda ökutækinu á veginum. Ef beygja á ökutækinu er gott að snúa stýrinu. Þegar tvö ökutæki mætast er gott að víkja sitthvoru ökutækinu til sitthvorrar hliðar. Munið þá eftir stýri ökutækisins. Munið að hemla hemlum ökutækisins ef ökutækið skal skal staðnæmt. Sýnið því fyllstu aðgát við akstur ökutækja og munið eftir að setja gluggahlera á framrúðu ökutækisins til að forða framrúðubroti á ökutækinu, því það finnst mér svo leiðinlegt.






Kafli 26
Næst á dagskránni eru Styrjaldarleiðtogarnir, 18. þáttur um Stalín. Páll Breimar Jónsson sér um þáttinn. Lesari með honum er annar hver starfsmaður útvarpsins og frú.

-”Lúðvík Jósefsson Stalín, þú sást Stalín.“
-”Jájá.“
-”Var Stalín stór?“
-”Ja, hann var svona meðalmaður.“
-”Já en nú var Stalín enginn meðalmaður.“
-”Neineinei, hann var enginn meðalmaður.“
-”Var hann þá stór?“
-”Nja, hann var svona á hæð við skápinn þarna.“
-”Þú tókst í hendina á Stalín.“
-”Já.“
-”Hvernig var handtakið?“
-”Það var hlýtt.“
-”En þú hefur ekkert verið neitt hræddur um að Stalín myndi handtaka þig?“
-”Njaa….“
-”En nú er oft hungursneyð í Sovét-Rússlandi, hvað sagði Svetlana, heldurðu að hann hafi svelt hana?“
-”Ja, ég held hann hafi selt hana.“
-”Nú var hann feitur?“
-”Nei.“
-”Þybbinn?“
-”Jaaa…“
-”Sver?“
-”Neineinei.“
-”Þrekinn?“
-”Já.“
-”Þéttur?“
-”Jájá, hann var þéttur.“
-”Já Stalín drakk mikið. Var hann mjór?“
-”Ja, ég sá hann nú ekki svo greinilega.“
-”Ertu viss um að þetta hafi verið Stalín?"
—
Og þá er komið að fugli dagsins.
(hávært gelt)
Fugl dagsins var hundur.



——————————————————————————–

Nú líður óðum að eins árs afmæli frú Ólafíu, og hefur afmælisveislan þegar verið undirbúin. Verður þar mikið um veitingar, svo sem vínveitingar, stöðuveitingar, orðuveitingar og fjárveitingar. Stöðuveitingamaður verður M. Kjartansson. Í tilefni af afmælinu mun Seðlabankinn gefa út sérstakan matseðil sem hljóða mun svo:
Forréttur, sem aðeins verður veittur forréttindastéttinni, og í honum eru loforð, bitlingar, utanferðir og embætti. Þá verður súputeningunum kastað og borin fram fjármálasúpa sem þjóðin mun síðan súpa seyðið af. Þá verður skálað í fljótandi gengi. Aðalréttur kvöldsins verður réttur einstaklingsins, og verður hann fyrir borð borinn ásamt óhagstæðum greiðslujafningi. Í eftirrétt verður soðið naut á nývirki með blönduðum hagvöxtum ásamt reyktum samborgarahrygg. Í afmælinu mun forsætisráðherra flytja stutta vísitölu, og eru þá önnur skemmtiatriði óþörf.