Þú munt aldrei vita það nema prófa :)

Ég skal segja þér eina sögu. Ég var í Nordjobb einu sinni og þar var íslenskt par þar sem strákurinn hafði ekki fengið vinnu en samt komið með stelpunni uppá von og óvon. Hann fór á Nordjobb skrifstofuna og spurði hvort þau gætu reddað honum vinnu. Þau sögðust gera sitt besta.

Síðan kom finnskt par sem var í nákvæmlega sömu aðstöðu. Sá strákur fór á Nordjobb skrifstofuna og spurði hvað hann sjálfur gæti gert til að finna vinnu. Þau létu hann hafa langan lista yfir fyrirtæki og bentu honum á síma. Hann sat og hringdi allan daginn, alls staðar nei en á ca. þrítugasta staðnum sem hann hringdi á fékk hann já.

Íslenski strákurinn sat hins vegar atvinnulaus allt sumarið og vældi yfir að Finninn hefði verið tekinn fram yfir hann.

Boðskapur þessarar sögu er að það er mun líklegra að þú fáir vinnu með því að hringja (eða mæta) á 30 staði heldur en ef þú situr heima og bíður eftir að einhver annar reddi þessu fyrir þig :)

Meðan ég man, þá var ég líka einu sinni atvinnulaus og ég sótti um allar auglýsingarnar í DV. Meira að segja sótti ég um þar sem var auglýst eftir úrbeiningarmanni þó ég kynni ekki rassgat. Ég sagðist bara alveg vera til í að læra það. Þau tóku niður nafnið mitt og hringdu í mig viku seinna, höfðu ekki fengið neinn vanan og ég fékk starfið.