Námsefni Hogwartsskóla gefið út

Galdradrengurinn Harry Potter hefur lagt Muggaheima að fótum sér. Harry stundar galdranám í Hogwartsskóla en sá skóli er ekki öllum opinn. Þau okkar sem vilja kynnast hinum mögnuðu fræðum sem þar eru kennd geta nú nálgast tvær kennslubókanna sem lesnar eru við skólann, en nýlega voru gefnar út handbækurnar: Quiddich í aldanna rás og Furðuskeppnur og hvar þær má finna.

Bækur þessar koma við sögu í skáldsögum J.K.Rowling um Harry og þarf engin að efast um að aðdáendur Harrys taka því fagnandi að fá að glugga í þetta spennandi námsefni. Rowling skrifar bækurnar sjálf undir dulnefni og opnar með þessu tiltæki nýja möguleika á samblandi skáldskapar og raunveruleika. Snæbjörn Arngrímsson hjá bókaútgáfunni Bjarti segir að verið sé að skoða hgsanlega útgáfu kennslubókanna á íslensku,án þess að nokkur ákvörðun hafi verið tekin.

Það er engu að síður heilmikið fjör í vændum hjá áhangendum Harrys, en þýðing fjórðu bókarinnar um kappann, Harry Potter and the Goblet of Fire, er í fullum gangi hjá Bjarti og er áætlaður útgáfudagur 30. október n.k. Þá er verið að leggja lokahönd á kvikmyndina eftir fyrstu bókinni Harry Potter og viskusteinnninn og er áætlaður frumsýningardagur 20. nóvember, þannig að það verður nóg að gera hjá Muggum allra landa í haust.