Mig grunar nú að þú sért ekki að segja þetta í alvöru og sért meira að setja þetta hér inn til að búa til vandræði (með öðrum oðrum að þursast)

En ef ske kynni að þú sért að meina þetta og sért í raun og veru sannfærður um að ævintýri séu guðlast þá vil ég gjarnan svar þér.

Ég trúi á Guð föður, skapar himins og jarðar, Jesú Krist frelsara minn og allra manna og heilagan anda sem huggar, styrkir og verndar. Ég trúi orðum Biblíunnar og vinn reyndar við að kenna þau.

Ég sé hins vegar ekkert sem segir að ævintýri séu Guði á móti skapi. Ævintýri, hvort sem er Hringadróttinssaga, Harry Potter, Mjallhvít, Rauðhetta, Narnía (sem btw er byggð á Biblíunni og píslarsögu Krists) eru öll um baráttu góðs og ills. Það er það sem kristnidómurinn snýst líka um. Trúin okkar snýst um baráttu góðs og ills. Við þurfum að velja hvoru megin við stöndum í baráttu Guðs og englanna við Satan og púkana. Barátta þeirra snýst um sálir okkar og við þurfum að velja hvoru megin við stöndum og hverjum við viljum fylgja.

Harry Potter er í sömu stöðu. Þar er Dumbledore ímynd hins góða og Voldemort ímynd hins illa. Harry þarf að velja hverjum hann vill fylgja. Hann velur að fylgja hinu góða og berst góðu baráttunni jafnvel þó að hann missi sína nánustu í baráttunni. Foreldrar hans og margir vinir fórna sér og deyja píslardauða fyrir hið góða gegn hinu illa.
Er það ekki alveg það sama og t.d. Stefán gerði í postulasögunni? Maðurinn sem fyrstur lét lífið fyrir trú sína á Jesú Krist. Hann vildi ekki afneita honum og vera sammála þeim vondu en lét lífið til að sýna fram á að hann trúði af heilum hug að Jesús væri Drottinn.

Ævintýri eru ævintýri. Í þeim eru allskonar hlutir sem ekki eru til í alvörunni og allir heilvita einstaklingar skilja það. Meira að segja lítil börn skilja það að nornin í Mjallhvíti er bara í plati og að enginn getur galdrað svona í alvörunni.

Ævintýri hafa þó yfirleitt boðskap og sá boðskapur er oft mjög kristinn. Boðskapurinn er langt um oftast sá að hið góða sigrar hið illa og að það sé öllum fyrir bestu að taka sér stöðu með því góða gegn hinu illa.

Amen!

Tzipporah