Helgi SR-ingur fórnaði 2 tönnum í að passa það að bjarnarhúnn að nafni Þossi gæti beitt sér í vörninni. Lán í óláni að skurðurinn sem Helgi fékk í síðasta Bjarnarleik á undan var gróinn, það gæti varðar við leikbann að vera að spila svona allur sundurskorinn.

Gvendur súkkulaðistöng SR-ingur sá enga þörf á að bjóða finnskan Hríseying velkominn og hreinsaði góminn á honum með prikinu sínu, 3 tennur og 8 spor var árangurinn, en sögur segja að hann eigi enn 29 tennur eftir svo ekki er honum mikil vorkun.

Þjóðsagan reyndist sönn, það blæðir líka úr Tékkum og það kom í ljós þegar Hríseyingar náðu að skutla hann eins og háhyrning, nokkur spor, og Snorri dómari fékk ástarljóð sem heyrðist um alla höll sem laun fyrir að segja honum frá blæðingunni.

Ævarandi skömm hefur þjálfari Bjarnarins kallað yfir íþróttina í heild með því að leiða lið sitt af velli á grundvelli ágreinings við yfirvaldið. Íþróttaandanum var þar fórnað á altari geðvonskunnar og ber maður sig nú ekki eins vel og áður þegar spurt er hvaða íþrótt maður iðki.

Ég er sko einn af þeim sem ber með sér að stundi mikla garpa-íþrótt og er því oft spurður að þessu…

Nú er svo komið að rökin láta á sér standa þegar ræða þarf nauðsyn þess að ungviðið fari að æfa íshokkí, konan spyr hvort eitthvað vit sé í að láta börn kynnast ofbeldi og barnaskap í æskulýðsstarfi, hvort krulla sé ekki betri kostur, bæði á ís hvort sem er. Ég á ekki mörg svör þessa dagana. Nema að dýrmæt íshokkígen mín færu þá til spillis. Ég veit ekki hvort konan glotti eða kúgaðist, þetta fékk allavega mjög á hana.

Ég vil kasta þeirri hugmynd fram að stjórn Íshokkísambandsins breyti reglum þ.a. allir leikmenn á Íslandi beri stálgrind á hjálmum sínum til að koma böndum á tannflótta leikmanna. Bannið verði í fyrsta lagi endurskoðað í lok þessa tímabils. Tannböðlar liðanna geta tekið á sig sök, sem og þeir sem duglegastir hafa verið við að blóðga andstæðinga.

Grindurnar gætu líka orðið til þess að geldingar liðanna sjái sér þann sóma að vera í hönskunum þegar breiða á yfir getuleysi á skautum með slagsmálum, þráðarhöfundur hefur tekið eftir að hanskar hafa ekki haldist nógu vel á ungum og óþroskuðum fingrum barnalegra slagsmálahunda.

Líkamsmeiðingum þarf að koma út úr þessarri íþrótt, það verður einungis gert með lögsókn á hendur tannböðlum, fjársektum á félög og einstaklinga eða skerðingu á meiðslafrelsi leikmanna.

Ég vona að Íshokkísambandið taki þessa hugmynd upp á næsta fundi og að ég geti hætt að drekka á daginn (kvöldin eru nú fair play).

Skál fyrir því.

Massi