Æfðu hestinn þinn í að bera sig sjálfur á tölti, reyndu að nota taumana sem allra allra minnst. Þegar þú vilt fá hestinn upp á tölt er ágætt að gera hljóðmerki til að auðvelda vinnuna, en aðalábending á að koma í gegnum mjaðmir og fætur.

Ef að þú kemur hestinum upp á tölt þannig að hann beri sig sjálfur og að þú sért með sáralítið taumsaband, þá geturðu notað taumana til þess að taka hann niður á hreinna tölt. Hins vegar ef þú styðst mikið við taumana þá mun það fá hestinn til að binda sig meira því hann er að berjast gegn taumhaldinu.

Þú verður samt alltaf að meta hvernig hesturinn þinn bregst við. Sumir hestar binda sig frekar ef þú notar taumana til að hreinsa þá en geta verið með æðislegan fjórtakt ef þeir fá að teygja aðeins úr sér og ná eitthvað upp í yfirferð. Ég var með eina mjög bundna/skeiðlagna meri einu sinni sem að náði ekki að tölta í góðum fjórtakt nema að vera komin á gott yfirferðatölt! Þegar hún náði töltinu á þeim hraða gat ég svo hægt farið að vinna í að hægja á ganginum og halda taktinum hreinum.

Hesturinn sem ég er hins vegar með núna á mun auðveldara með að taka hægt-milliferð á tölti og takturinn fer aðeins í keng þegar ég hraða á honum. Hann ber sig nú nánast alveg sjálfur á tölti og ég þarf ekki nema að hvetja hann áfram og þrýsta mjöðmunum aðeins fram til að hann fari upp á tölt, einstaka sinnum þarf ég að nikka í tauminn ef hann reisir sig ekki eins og hann á að gera. Þetta gerir alla vinnu með hraða MUN auðveldari!

Hraðabreytingar eru mjög góðar, þær hjálpa taktinum og hjálpa þér einnig að finna á hvaða hraða hesturinn þinn töltir best. Ef þú veist það þá áttu auðveldara með að finna út hvar er best að vinna með hann. Þær neyða hestinn líka til að einbeita sér að því sem hann er að gera. ;)

Svo er gott að tölta í bauga og slöngulínur, byrjaðu nokkuð gróflega, sérstaklega ef hesturinn er bundinn. Þú þarft heldur ekki að ríða það á tölti því þetta eru æfingar sem liðka hestinn til óháð hvaða gangi hann er á, en ein aðalástæða þess að hestar verða bundnir er að þeir eru stirðir eða eru að hlífa sér. Til dæmis er besta leið til þess að fá lullara til að brokka að liðka þá til og kenna þeim að slaka á með því að hreyfa sig rétt.

Mundu bara að verðlauna hestinn þegar hann gerir það sem þú vilt. Ef að hesturinn minn er eitthvað pirraður eða leiðinlegur og reynir að göslast áfram og vill ekki tölta þá verðlauna ég hann fyrir nokkur góð töltspor með því að leyfa honum að feta í smá stund. Þegar hann er svo farinn að tölta sáttur þá eyk ég tímann sem ég læt hann tölta. Það er líka mjög gott að leyfa hestinum að brokka á milli eða feta, þeir slaka á á meðan og eru tilbúnari til þess að vanda sig þegar þú tekur þá aftur upp á tölt.

Og að lokum, ef þú ert ekki búin að því þá mæli ég með að skaufhreinsa og tékka á tanngaddi. Þegar hesturinn minn kom í hús í vetur var hann í fyrsta skipti mjög bundinn, skildi ekkert í því hvað hafði gerst! En læknisskoðun leiddi í ljós að hann var bæði með stein og tanngadd. Ái! Hnakkar sem passa illa geta líka valdið spennu sem og stíft taumhald.

Það er lítið sem ég get bætt við fyrra svarið, æðislegt svar þar á ferð en, mér var alavega kennt að bindingur væri bara lull, bundinn hestur þá lullari..

En hinsvegar hef ég heyrt að brokk hreinsi hestana talsvert svo inn á milli hafa bundnir hestar mjög gott af því að fá brokktúra, klárinn minn átti þetta til þangað til hann fór að brokka, var reyndar ómögulegur fyrstu vikurnar þar sem hann vildi fyrst bara brokka en svo kom töltið betra eftir það en nokkru sinni fyrr ;)

Ég á tvo hesta sem eru yfirleitt mjög bundnir svona fyrst á veturna og þeir eru rosalega ólíkir…

Faxi er latur alhliðhestur þar sem gangurinn var ekki þjálfaður nógu mikið þegar hann var ungur… ég nota alltaf písk á hann og þegar ég kem honum til að verða betur reistur, léttari í taumi og viljugari þá töltir hann yfirleitt hreinna…

Hinn hesturinn, Blesi… hann er viljugur klárhestur en er bundinn á hægu og meðaltölti… til að hreinsa hann róa ég viljann aðeins niður, brokka, reyni að fá betra fet, lengri afturfótaskref, og þá kemur hann oftast til.. annars þarf hann líka bara rosalega mikla upphitun og þá er hann alveg hreinn á töltinu…

Allavega…. svona smá frá minni eign reynslu… :P

Mér finnst fimiæfingar virka best á svona hesta. Kenna þeim framfótasnúning fyrst og fara svo að fykra sig í krossgang. Það getur líka verið gott að losa um hestana á rólegu stökki áður en þeir eru krafðir um tölt.