Ís brotnaði undan 17 hrossum við Stokkseyri sem fóru út á Traðarholtsvatn, austan Stokkseyrar, síðdegis í gær, sunnudag. Alls er talið að 17 hross hafi farið niður um ísinn í þremur vökum. 16 hross náðust lifandi en einn hestur drapst í vatninu.

Samkvæmt upplýsingum frá Ólafi Íshólm Jónssyni lögregluvarðstjóra á Selfossi, sem tók þátt í að bjarga hestunum, tóku menn úr nágrenni Traðarholts til við björgunarstörf og hófu að saga með vélsög, um það bil 10 sm þykkan ís, í átt að landi. Eftir að lögreglumenn komu á vettvang klukkan 18 tókst þeim að draga 6 hross upp á ísskörina og með hjálp félaga í Björgunarfélagi Árborgar og björgunarsveitinni Björg á Eyrarbakka náðust 10 á land.

Mörg hrossanna voru orðin köld og máttfarin eftir tæplega tveggja stunda sund í vatninu en þau náðu fljótt þreki svo hægt var að reka þau að bænum Grund þar sem þeim var komið í hús. Enginn ábúandi er í Traðarholti en þar eru rúmlega 30 hross í hagagöngu.