Veistu, mér þykir bara mjög vænt um það að fólk pæli í heimspeki og ég geri alls ekki kröfur um það að fólk þurfi að leysa allar ráðgátur lífsins til þess að fá að pæla í sinni heimspeki í friði.

En mér fannst ég bara greina smá yfirlæti ("…er þetta ekki bara það heimspekilegasta sem þið hafið heirt [svo]? Er ég ekki gott dæmi um heimspeking“). Nei þetta er ekki það heimspekilegasta sem ég hef heyrt. Þetta var bara eins setning og það fremur óljós.

Það er allt of mikið um það að fólk haldi að hvaða bull sem er sé heimspeki. Ég er ekki að segja að fólk þurfi að hafa gráðu frá einhverjum skóla til að stunda heimspeki. Alls ekki. En það má samt gera kröfu um það að fólk sé ekki að bulla.

Fólkið sem bullar og svarar svo allri gagnrýni með ”Þú getur ekkert sagt mér að þetta sé ekki heimspeki. Heimspeki er allt. Ég þarf ekki gráðu til að vera heimspekingur. Þetta er alveg jafn mikil heimspeki og allt annað“ gerir lítið úr heimspekinni og grefur undan henni. Á endanum nýtur hún engrar virðingar sem skilar sér í því að æ færri leggja það á sig að læra heimspeki í skóla; þar með eru færri sem kynna sér heimspeki. Og það verður nær útilokað að koma henni inn í lægri stig skólakerfisins. Þess í stað myndast svona starfsmenntunarárátta eins og maður verður stundum var við á Íslandi. Menntun í hugvísindum telst lítils virði, enda telur fólk almennt að allir geti stundað heimspeki án þess að þurfa að kynna sér eitt eða neitt eða svo mikið sem hugsa í eina mínútu. Maður bullar bara upp einhverja setningu eins og ”sjálfið verður að leysa sig úr viðjum þess til þess að frelsið fái notið sín; þú finnur aldrei sjálfið og frelsið nema í eilífðinni… bla bla bla“. Hvað þýða svona setningar? Ég hef ekki hugmynd. Ég vil miklu frekar komast að einhverju heldur en að segja bara eitthvað sem lítur út fyrir að vera flókið. Hver sem er getur það.

En já, kannski var manninum bara alvara með þessu. Ef svo er hefur hann gott af því að glíma við spurningarnar sem ég spurði hann. Ef eitthvað er óljóst í ”kenningu" hans ætti hann að gleðjast yfir því að ég skyldi benda honum á það. Því góð kenning er ekki óljós hugsun.<br><br>__________________________
Aut tace aut loquere meliora silentio.