Frægðarsól Jóns Páls Sigmarssonar skaust hratt upp á stjörnuhimininn og skein skært. Nánast hvert einasta mannsbarn þekkti hann og dáðist að framkomu hans og líkamlegu atgervi. Þessi frækni víkingur var glæsilegur fulltrúi lands og þjóðar þar sem hann sigraði hverja þjóðina á fætur annarri í keppninni um titilinn “sterkasti maður heims”. Í áratug var hann fremstur meðal jafningja og nánast ósnertanleg lifandi goðsögn.

Æska Jóns Páls og uppruni er þó fæstum kunn. Þessi ungi drengur kemur í heiminn árið 1960 en foreldrar hans höfðu þá þegar slitið samvistum. Snemma fékk hann að kynnast hinni hörðu lífsbaráttu og hlífði hann sér hvergi við hefðbundin búskaparstörf þrátt fyrir ungan aldur.

Lífið við Breiðafjörð var í senn erfitt og skemmtilegt. Frá tveggja ára aldri býr hann í Stykkishólmi en lífsbaráttan yfir sumartímann er í Skáleyjum hjá foreldrum Sveins Guðmundssonar fósturföður Jóns Páls. Í Skáleyjum þurfti Jón snemma að nýta sér líkamlegt atgervi sitt og óx honum ásmegin með ári hverju, blóðgrautur, selshreyfar, hrá egg og annað sem náttúran bauð uppá í bland við mikla vinnu, veiðar og bústörf mótuðu vilja og líkama þessa dáða drengs.

Þegar Jón Páll er kominn á unglingsárin flyst fjölskyldan til borgarinnar og Jón verður virkur þátttakandi í íþróttum. Árið 1975 sér Jón Páll auglýst lyftinganámskeið í sænska frystihúsinu og þar með hafði hann fundið sér farveg.

Líf Jóns Páls var sveipað ævintýraljóma. Hann var mikið í fjölmiðlum enda var hann hnyttinn og skemmtilegur í tilsvörum. Frægt var þegar Ómar Ragnarsson fór með honum til Gísla á Uppsölum og Gísla varð að orði: “Þú ert eins og hrísla í höndunum á Gísla”. Frægust og eftirminnilegust er þó setningin hans “Ekkert mál fyrir Jón Pál” sem hann sagði í miðri réttstöðulyftu með 362,5 kg í lúkunum, búinn að slá gildandi Evrópumet í beinni sjónvarpsútsendingu í Ríkissjónvarpinu.


Jón Páll markaði djúp spor í sögu þjóðar okkar þann stutta tíma sem hann lifði og var m.a. kosinn íþróttamaður aldarinnar af þjóðinni í Gallup könnun ekki alls fyrir löngu.

Tekið af www.jonpall.is