Skemmtilegar og góðar pælingar hjá þér. Síðasta málsgreinin er sérstaklega góð og þú hittir naglann á höfuðið.
Maður á alveg að geta haldið upp á hátíðir óháð trú og trú á vissulega ekki að skapa vandamál.

Sjálfur var ég frekar mikið trúaður í kringum fermingu, enda búinn að fara nokkrum sinnum í sumarbúðir KFUM og skemmti mér vel þar, en síðustu árin hefur dregið úr trúnni en ég vil þó ekki meina að ég sé trúlaus.
Frekar myndi ég segja að mín skoðun á trúnni hafi breyst, eða þróast, á þann veg að ég fylgi bókstafnum ekki það mikið eftir, heldur held ég meira í andlega hlutann. Vissulega finnst mér þægilegt að koma í kirkjur, enda alltaf viss ró sem kemur yfir mig þar, svo finnst mér lágmark að fara tvisvar í messu á ári, andans vegna.
Biblían er ágætis kver útaf fyrir sig, en mér finnst þó sem það megi alls ekki taka hana of alvarlega. Dæmisögurnar sem maður heyrði í barnæsku eru jú bara dæmisögur og góðar í þeim skilningi.

En aftur að hátíðarhöldum. Jólahátíðin hefur náð að breiðast út um heiminn aðallega vegna kristinnar trúar, en það þýðir samt ekki að það séu bara kristnir menn sem halda jólin hátíðleg.
Fyrir mitt leyti er ég mjög þakklátur fyrir þessa hátíð, hún lendir á hárréttum tíma hér á Íslandi.
Skreytingarnar og jólaljósin lýsa upp þessa styðstu daga ársins og létta manni lund á meðan jólaprófum stendur. Ekki sakar svo að hafa snjóföl yfir á sama tíma, sem veitir enn meiri birtu þegar sólin felur sig meirihluta dagsins.
Vissulega er trúin partur af jólahaldi margra, en það getur á sinn hátt aldrei átt við alla. Þó okkur finnist jólin vera sjálfsögð hátíð, gildir það ekki um alla. Sumir halda ekki uppá jólin (en fagna kannski fríinu sem fylgir), kannski vegna trúar sinnar (eða trúleysis) eða annarra ástæðna.

Svo má hugsa út í áhrif jólahátíðarinnar. Mannúðarstarf blómstrar á þessum árstíma, reynt er að höfða til samvisku manna og þeir beðnir um að taka þátt í hjálparstarfi um allan heim, hvort sem verið er að safna fyrir vatnsbóli í Afríku eða hjálpa börnum sem urðu fyrir missi í kjölfar jarðskjálftans og flóðbylgjunnar í Indlandshafi á annan í jólum fyrir tveimur árum.
Jólin hafa bæði góð og slæm áhrif á fólk, tími þar sem málshátturinn „Sælla er að gefa en þiggja" hljómar enn sterkari í hugum fólks en á öðrum árstímum.

Ég held að gott sé að stoppa núna… enda svarið held ég orðið lengra en upphafsinnleggið :)
Skoðanir fólks eru mismunandi og það hafa allir rétt á sinni skoðun, sama hvað okkur hinum finnst.

Ég vona að allir geti notið jólahátíðarinnar og eigi gleðileg jól :)