HK sigraði Val 25-23 í Essó-deild karla í kvöld. Þetta var fyrsti tapleikur Valsmanna í deildinni á þessu tímabili en síðustu leikirnir í 9. umferð í deildinni fóru fram í kvöld. Staðan í hálfleik var 11-11. Valsmenn eru engu að síður ennþá á toppnum í Essó-deild karla eftir leiki helgarinnar. Í Ásgarði í Garðabæ sigraði Stjarnan lið Víkings mjög örugglega 28-23 en þeir voru yfir í hálfleik 16-11.

Jaliesky Garcia og Ólafur Ólafsson skoruðu 6 mörk fyrir HK í kvöld en Snorri Steinn Guðjónsson var sprækur í liði Vals en hann gerði 8 mörk í kvöld. Valur hafði fyrir þennan leik sigrað í sjö leikjum í deildinni og gert eitt jafntefli.

Í sigurliði Stjörnunnar var David Kekelija markahæstur með 8 mörk en Hafsteinn Hafsteinsson var duglegastur í Víkings-liðinu að setja boltann í netið en hann gerði 6 mörk í kvöld.