Bandaríska söngstjarnan Britney Spears á í samningaviðræðum um að leika nútíma Sherlock Holmes í kvikmynd sem á að heita 221bCAUSE og vísar til Baker Street 221b, heimilisfangs Holmes í sögunum um þennan fræga spæjara. Gert er ráð fyrir að Spears leiki starfsmann ferðaskrifstofu sem er til húsa í þessu heimilisfangi, sem ekki er til þótt Baker Street sé raunveruleg gata í Lundúnum.
Söguþráðurinn er í stuttu máli sá að bréf, merkt Sherlock Holmes, fara að berast til ferðaskrifstofunnar. Aðalpersónan svarar bréfunum og þá hefst atburðarás sem leiðir hana til New York á slóð sonar Bandaríkjaforseta sem hefur verið rænt.

Fyrirtæki söngkonunnar, Britney Spears Productions, á í viðræðum við framleiðendur myndarinnar. Breskir fjölmiðlar hafa eftir heimildarmönnum að framleiðendurnir vilji að myndin verði frumsýnd á næsta ári á svipuðum tíma og forsetakosningarnar fara fram í Bandaríkjunum.

Fréttir herma að Jennifer Love Hewitt hafi verið boðið aðalhlutverkið en ráðgjafar hennar voru ekki ánægðir með að aðalpersóna myndarinnar átti að ganga til liðs við lögreglumann, sem rekinn hafði verið úr starfi vegna fíkniefnaneyslu.

Spears hefur þegar gert samning um að leika í kvikmynd um bandarískan kappakstur.