Morgunblaðið
Sato meðal tekjuhæstu ökuþóra

Þrátt fyrir að hann aki fyrir lélegasta lið formúlu-1 er japanski ökuþórinn Takuma Sato einna tekjuhæstur þeirra 22 ökuþóra sem munu stilla bílum sínum upp á rásmarki fyrsta móts á næsta ári.

Samkvæmt fregnum spænska blaðsins Marca nema tekjur Sato hjá Super Aguri-liðinu, að meðtöldum auglýsingatekjum, um 7,7 milljónum dollara á ári.

Til samanburðar mun liðsfélagi hans Anthony Davidson hafa 250.000 dollara í kaup á næsta ári.

Staðhæft var fyrr á árinu að heimsmeistarinn Fernando Alonso myndi þéna um 7,2 milljónir dollara í ár. Hermt er að hann muni fá mun hærra kaup hjá McLaren á næsta ári.

Sé tekjur Sato eins og frá er skýrt mun hann „verðmætari“ en ökuþórar á borð við David Coulthard, Mark Webber, Jenson Button og Giancarlo Fisichella.