Ron Dennis yfirmaður keppnisliðs MacLaren er ekki búinn að gefa upp alla von um að Hakkinen nái að vinna heimsmeistaratitilinn þetta árið. Ron bendir á að það séu 20 stig eftir í pottinum og að allt sem Hakkinen þarf að gera sé að vinna báðar keppnirnar þ.e. í Japan og Malasíu. “Hann er sterkur og einbeittur einstaklingur, það mun ekki breytast. Það hljómar e.t.v. eins og að það sé óvinnandi vegur en við munum mæta á brautirnar ákveðnir í að vinna”,sagði Ron. Það er hins vegar eitt atriði sem Ron virðist hafa gleymt en það er sú staðreynd að Michael Schumacher hefur unnið 7 keppnir á þessu ári en Hakkinen einungis 4. Þannig að ef Hakkinen vinnur næstu tvær keppnir og MS verður í öðru sæti þá verða þeir jafnir að stigum en MS verður heimsmeistari á fleiri sigrum. Hakkinen þarf því góða hjálp frá DC ætli þetta að ganga eftir. “Formúla 1 er ekki sport fyrir viðkvæmar sálir, við erum í stöðugri rússibanaferð og við getum ekki vonað að mistök annara hjálpi okkur til að vinna titilinn.” Sagði Ron að lokum.