STÖÐUSKIPTI Á UMBROTATÍMUM

Samkvæmt guðspekilegum kenningum er hinn uppstigni meistari Saint Germain forvígismaður komandi Vatnsberaaldar og kyndilberi frelsislogans næstu tvö þúsund árin. Hann leysir Jesú Krist af hólmi sem mannkynsfrelsari sem Jesús hefur gegnt síðustu tvö þúsund ár fiskatímabilsins. Þar með leiðir hann til lykta starfið sem Jesús hafði helgað sér með upprisu sinni. Saint Germain og Jesús Kristur starfa í náinni samvinnu við Stóra hvítbræðralagið sem myndar innra helgivald jarðarinnar og sólkerfisins samkvæmt guðlegri forsjá. Jesús hefur tekið við embætti heimsfræðarans ásamt meistaranum Kúthúmi sem var einkum þekktur í fyrri jarðvistum sem dýrlingurinn Francis af Assisi og gríski heimspekingurinn Pýtagóras. Kvenmeistarinn Nada tekur við meistaratign sem Jesú gegndi sem er helgað (guð)þjónustu, tilbeiðslu og sjálfsfórn. Fram til þessa hefur Sanat Kúmara verið leiðtogi Hvítbræðralagsins og mannkynsins. Hann er nefndur hinn aldni í Daníelsbók (7.9,13,22) í ritningunni. Mannkynið er að verða nógu þroskað til að halda við ljósmagni jarðarinnar svo að Sanat Kúmara getur brátt snúið sér aftur til fyrri heimkynna eftir að umbreytingarnar í þróun jarðarinnar til nýja tímans hafa gengið í garð. Gautama Búddha lætur af heimsfræðaraembættinu og tekur við embætti Sanat Kúmara sem innri konungur jarðar.

Hinn heilagi bróðir Saint Germain, eins og nafn hans þýðir, er leiðtogi nýja tímans, og handhafi fjólubláa logans sem er sjöundi og síðasti geislinn í litrófi heilags anda Guðs. Æðsta embætti fjólubláa geislans gegndi kvenmeistarinn og náðargyðja búddhamanna Quan Yin á undan St. Germain. St. Germain gegnir einnig stöðu erkiengils þar eð hann hefur herskara engla í þjónustu sinni.


EIGINLEIKAR FJÓLUBLÁA GEISLANS

Áraunir og önnur óáran eru áunnin karmísk höft sem eru tilkomin vegna misbeitingar á náttúrulögmálunum (lögmáli Guðs). Niðurrífandi hugsanir, langanir, tilfinningar, orð og gerðir orsaka misklíð og sundurlyndi, þjáningu, sársauka, slys, sjúkdóma og dauða. Fjólublái geislinn brennir upp, umbreytir og eyðir orsökum, afleiðingum, minningum og skrám “úr lífsins bók” sem bera vitni um þetta misferli.

Eiginleikar fjólubláa geislans eru frelsi, réttlæti, náð og fyrirgefning, umbreyting (alkemía) og helgiathafnir. Hann leysir upp niðurrífandi venjur og stöðnuð hegðunarmynstur sem sundra manninn frá guðdóminum. Þeir sem beita honum reglulega á réttan hátt losna úr læðingi og finna fyrir léttleika, frelsi, friði og fögnuði. Fjólublái geislinn getur einnig hreinsað úrgangsefni eftir eiturlyf sem safnast fyrir í líkamanum og önnur eiturefni sem draga úr hæfni hans.

Notkun fjólubláa geislans hefur verið kunn ýmsum leynireglum og dulspekiskólum en nú er kominn tími til að gera fjólubláa geislann, sem er náðargöf heilags anda, að almenningeign enda hefur St. Germain beitt sér fyrir útbreiðslu hans frá fyrri hluta þessarar aldar.


LITRÍK SAGA SAINT GERMAINS

Saint Germain stóð á ýmsum tímum leynt eða ljóst á bak við stofnun Rósakrossreglunnar, Musterisriddarareglunnar, Riddara ljóssins, reglu hinna Upplýstu (Illuminati) og Frímúrarareglunnar (Masonry). Allar þessar launhelgar eru undir áhrifum sjöunda geislans sem stendur fyrir helgisiði og töfravald.

St. Germain hefur starfað mörg þúsund ár á jörðinni við framgang réttlætis og frelsunar. Hann hefur stuðlað að þróun ýmissa menningaþjóða í samvinnu við kvenmeistarann Nödu. Starf St. Germains að frelsun mnnkynsins hófst fyrir 70.000 árum en þá mistókst honum að lyfta amerískri siðmenningu á hærra stig vegna tregðu innfæddra. Hann frestaði marga mannsalda að ganga í gegnum upprisuna til að geta starfað í nánari tengslum við mannkynið. Hann hefur verið sér meðvitaður um fjölmargar jarðvistir sínar.

Fyrir um 50.000 árum var St. Germain leiðtogi gullaldarmenningar þar sem nú er Sahara eyðimörkin. Fyrir um 13.000 árum var hann æðstiprestur á Atlantis. Hann þjónaði þá musterisreglu Sadkíels erkiengils þar sem nú er Kúba. Hann hlaut þjálfun í alkemíu (guðdómlegri gullgerðarlist, þ.e.andlegri ummyndun) þar til að hann hafði náð þeirri færni sem gerði honum kleift að verða meistari sjöunda geislans og handhafi fjólubláa logans.

St. Germain var spámaðurinn Samúel (um 1050 f.Kr.) sem var síðastur á meðal samnefndra dómara Gyðinga. Óopinber verndardýrlingur Bandaríkjamann, “Sámur frændi”, vísar til Samúels spámannns enda lagði St. Germain grunninn að stjórnkerfi Bandaríkjanna.

St. Germain var heilagur Jósef, sonur Jesse af ættstofni Davíðs konungs, útvalinn farvegur fyrir heilagan anda sem gat Jesú.

St. Germain veitti nýplatónska heimspekingnum Próklus (410-485) í Aþenu innblástur. Hann veitti forstöðu fræðasetrinu (Akademíunni) í Aþenu og gaf út merk rit um heimspeki, stærðfræði, stjörnufræði, málvísindi og málfræði. Hann reyndi að samrýma ólíkar heimspekistefnur og trúarbrögð.

St. Germain var seiðpresturinn og sjáandinn Merlín a 5. og 6. öld í Bretlandi sem var ráðgjafi við hirð Artúrs konungs. Hann var hvatamaðurinn að stofnun musterisreglu Riddara hringborðsins og stuðlaði að sameiningu Bretlands.

St. Germain var Roger Bacon á Englandi (1214-1294), fransiskanamunkur og guðfræðingur, heimspekingur og menningarfrömuður. Bacon var vísindafrömuður. Hann gerði tilraunir í gullgerðarlist og alkemíu sem táknaði leit dulspekinga að lífsveignum. Hann studaði stærðfræði, tungumál og stjarnfræði. Hann leiðrétti júlíanska tímatalið og fann upp byssupúður og linsur fyrir gleraugu og sjónauka. Hann skrifaði alfræðibók um vísindi, Opus Maju, sem hann var ofsóttur fyrir.

St. Germain var þýski munkurinn Christian Rosenkreuz á 15. öld. Í ferðum sínum komst hann í kynni við íslamska dulspekinga (súfista) og þýddi dulræn arbísk rit þeirra á latínu. Hann starfaði við leynireglu í Lúxor í Egyptalandi í nánum tengslum við Hvítbræðralagið sem var honum gamalkunnugt. Eftir margar vígslur sneri hann til Þýskalands og stofnaði Rósakrossregluna.

St. Germain var Kristófer Kólumbus (1451-1506) sem endurfann Ameríku árið 1492.

St. Germain var Paracelsus (1493-1506), svissneskur efna- og lyfjafræðingur, fær læknir og guðspekingur. Hann boðaði að alkemía væri til heilunar og andlegra umbreytinga en ekki til að breyta málmum í gull.

St. Germain var Francis Bacon (1561-1626) á Englandi. Verk hans Novum Organum er grundvallarrit í nútíma rökfræði og vísindalegri aðferðafræði sem lagði grunninn að nútíma vísindum. Hann var mikill rithöfundur og skáld. Talið er að Shakespeare hafi verið dulnefni hans. Einnig ritstýrði hann opinberri útgáfu James Biblíunnar. Rit hans höfðu mikil áhrif á þróun enskrar tungu. Í þeim kemur m.a. fram að leynimakk móður hans Elísabetar Englandsdrottningar hafi hindrað að hann yrði réttborinn erfingi krúnunnar sem olli að James I hlaut hnossið í hans stað. James misnotaði rískissjóðinn en Francis sem var ríkisféhirðir varð að taka á sig sökina. Fyrir honum lá að sameina Evrópu og koma í veg fyrir sundurlyndi og stríð sem hrjáði álfuna.

Árið 1626 setti hann dauða sinn á svið en hann yfirgaf ekki jarðsviðið fyrr en 1. maí, 1684 þegar hann reis upp í frelsisloganum frá athvarfi sínu í Rakoczy í Transylvaníu til móts við frelsisgyðjuna í New York. Eftir upprisuna hélt greifinn áfram að líkamnast og birtast á mörgum stöðum á 18. og 19. öld.

Frá 1710 til 1822 var hann þekktur sem greifinn Comte Saint Germain sem aldrei virtist eldast. Í Þýskalandi var hann nefndur undramaðurinn, í Feneyjum nefndist hann Comte Bellamarra og í Dresden kvaðst hann vera Rakoczy prins af Transylvaníu. Sumir álitu hann vera gyðing eða konungsson frá Portúgal. Hans er minnst í bréfum Voltaire, Friðriks mikla Prússakonungs og Madame Pompadours.

Enginn vissi hvaðan auður greifans kom og á hverju hann lifði. Menn óraði ekki fyrir að hann væri upprisinn meistari sem var óháður takmörkum efnislíkamans. Það gerði honum kleift að koma fram samtímis á fleiri stöðum, hann gat birst og látið sig hverfa í einum vettvangi, töfrað fram (efnisgert) gimsteina og gefið fólki lífsveigar sem endurvakti ungdóm þess. Hann gat samtímis skrifað sendibréf með annarri hendiog ort ljóð með hinni. Hann vissi hvað stóð í bréfum og dagblöðum án þess að hafa lesið efnið. Hnn sýndi mönnum undramátt sinn til að koma vitinu fyrir ráðamenn og sanna að andinn er ofar efninu til mótvægis við þá efnishyggjutíma sem voru í aðsigi.

St. Germian reyndi að létta undir með breytingunum frá einveldi til þingskipaðs fulltrúalýðveldis. Hann hafði áhrif á Rochambeau greifa sem var í forystu franskra erindreka sem hvöttu Bandaríkjamenn til að stofna lýðveldi. Hann var í tygjum við frönsku konungana Lúðvík XV og XVI og Maríu Antoníettu drottningu. Hefðu þau farið að ráðum hans hefði miklum blóðsúthellingum verið afstýrt í frönsku byltingunni og aftöku konungs og drottningar. Hann studdi Napóleon með ráðum og dáðum þar til að halla fór undan fæti fyrir Napóleon eftir að velgengnin á vígvellinum steig honum til höfuðs. Greifinn hafði vænst þess að Napoleon gæti gagnast honum við að sameina Evrópu löngu fyrir daga Evrópusambandsins. Greifinn var vinur Friðriks mikla og stuðlaði að því að koma Katrínu miklu til valda í Rússlandi.

Ráðamönnum Evrópu var ekki viðbjargandi svo að St. Germain sneri sér þá að nýja heiminum. Þar átti hann erindi sem erfiði því að Bandaríkin urðu í fararbroddi í þeirri lýðræðisþróun og vísinda- og tæknibyltingu sem kennd er við Vatnsberaöldina sem greifinn er fulltrúi fyrir. Hann studdi tilkomu nútíma samgöngutækni. Hann aðstoðaði ýmsa merka vísindamenn eins og Mesmer sem varð þekktur fyrir dáleiðslurannsóknir. Ekki síst vakti það fyrir honum að losa menn undan erfiði brauðstritisins til að þeir gætu gefið sig meira að andlegri rækt. Hann var í vinfengi við fyrstu forseta Bandaríkjann, þá Georg Washington, sem hann studdi til valda, Benjamín Franklín og Abraham Líncoln. Hann hvatti landsfeðurna til sjálfstæðisyfirlýsingar og aðstoðaði við stjórnarskrárgerð Bandaríkjanna. Hann var einnig viðriðinn samningu frelsisskrár Englands. Áhrifa hans gætir jafnvel á helsta stolti Bandaríkjamanna, dollaraseðlinum, sem ber tákn frímúrarareglunnar.

St. Germain kunni öll tungumál reiprennandi og var vel að sér í myndlist. Hann var mikill tónlistarmaður og veitti tónskáldum eins og Chopin, Tchaikowsky og Jóhanni Strauss innblástur til að semja valsa. Einkennislög hans eru “Sögur úr Vínarskógi” eftir Strauss, og “Rakoczy Mars”. Einkennismerki hans er Möltukrossinn.

Þegar St. Germain ákvað að ganga í gegnum upprisuna sameinaðist hann kristsjálfi sínu. Meistarinn R, öðru nafni hinn guðdómlegi leiðtogi, var lærifaðir hans og umvafði greifann eða yfirskyggði hann líkt og drottinn Maitraya hafði gert fyrir Jesú.


SAINT GERMAIN OG GUÐSPEKIN

Um svipað leyti og Guðspekifélagið var stofnað árið 1875 hætti St. Germain að starfa í Evrópu í efnislegum líkama vegna undirbúnings fyrir viðtöku á meistaratign sjöunda geislans. Aftur á móti kom hann töluvert við sögu ‘ÉG ER’ hreyfinganna í Bandaríkjunum á fjórða áratugnum. Þá hafði hann starfað í 200 ár sem guðfaðir Bandaríkjanna áður en starf hans þar fór að bera umtalsverðan árangur. ‘ÉG ER’ hreyfingarnar ásamt öðrum guðspekisinnuðum félögum voru undarnfarar Heimskirkjunnar (Church Universal and Triumphant) og Ljósvitasamtakanna (Summit Lighthouse) sem Elizabeth Clare Prophet hefur veitt forstöðu undanfarna áratugi. St. Germain, ásamt öðrum fyrirliðum Hvítbræðralagsins, hefur síðustu áratugi birt mannkyninu boðskap sinn gegnum boðberana Mark og Elizabeth Prophet sem hafa haldið við lifandi arfleifð guðspekinnar inn í nýja tímann.


HEIMILDIR:

Hvíta Bræðralagið. Helgistjórn jarðarinnar. 3. útg. Ljósheimar, Hverfisgötu 105, 101 R.

Mark L. Prophet & Elizabeth Clare Prophet (1993). Saint Germain og Alchemy. Formulas for Self-Transformation. Summit University Press. Box 5000, Livingston, Montana 59047-5000

Mark L. Prophet & Elizabeth Clare Prophet (1986). Lords of the Seven Rays. Summit University Press. Box 5000, Livingston, Montana 59047-5000.

Mark L. Prophet & Elizabeth Clare Prophet. “The Lost Years of Jesus.” and the discoveries of Notovitch, Abhedananda, Roerich and Caspari. Summit University Press. Box A, Livingston, Mt 59047, 1984

Erlendu bækurnar er hægt að panta í gegnum <www.tsl.org