Þennan texta fékk ég á tarot.is
UPPRUNI TAROTSPILANNA
Tarotspilin geyma hulinn leyndardóm. Margir hafa reynt að leysa ráðgátuna um uppruna spilanna og margar kenningar eru á lofti. Sumir fræðimenn telja að þau eigi rætur að rekja m.a. til Indlands eða Kína, og aðrir til Egyptalands.

Hefðbundin Tarotspil eru 78 og hafa ýmis tákn. Spilin skiptast í 22 háspil (Major Arcana) og 56 lágspil (Minor Arcana). Ekki er ósennilegt að uppbygging og tákn spilanna komi frá fleiri en einu menningarsvæði. Algengasta kenning meðal fræðimanna er sú að spilin hafi verið hönnuð á Ítalíu á 14. öld þegar að myndir úr alfræðimyndabók voru prentaðar á númeruð spil að spænskri fyrirmynd.

Tákn háspilanna fela í sér visku og speki enda hafa þau verið kennd við launhelgisiði sem tíðkuðust í Egyptalandi til forna. Sumir álíta að tákn þeirra hafi að geyma goðsögnina um dauða og upprisu Osiris.

Lágspilin skiptast í fjóra flokka sem samsvara venjulegum spilum að hluta: þau hafa ás og hirðspil, en eru 14 talsins í hverjum flokki:

1. Bikar (eða kaleikur) samsvarar hjarta.
2. Vöndur (eða töfrasproti) samsvarar tígli.
3. Sverð samsvarar spaða.
4. Fimmarma stjarna innan í hring samsvarar laufi.


Þessi fjögur tákn tarotspilanna eru gömul og birtast í ýmsum myndum í þjóð- og goðsögnum og hafa fengið sérstaka merkingu hinna ýmsu menningarhópa.

Bikarinn og vöndurinn eru svokölluð líftákn sem hafa löngum verið tengd saman á táknrænan hátt: þau hafa verið frjósemis- og kyntákn í aldaraðir. Vöndurinn táknar karllegt eðli og bikarinn kvenlegt eðli. Í Tarotspilunum birtist Vöndurinn sem sterkur lifandi trjásproti með nýútsprottnum laufblöðum og er tákn um orku karlmannsins. Bikarinn sem er opið ílát og inniheldur lífgjafann (vatnið) táknar kvenorkuna. Tákn þessi tengjast hugmyndinni um frjósemi og endurnýjun lífsins. Ein kenningin er sú að spilin hafi upprunalega verið notuð til að spá fyrir um hækkun og lækkun vatnsborðs fljóta, sbr. að þegar Níl flæðir yfir bakka sína frjógvar vatnið jarðveginn.

Sverðið er almennt tákn um lífsorku, andlegan og líkamlegan styrk. Í kristinni trú er sverðið tákn um óbugandi kraft og guðdómlegan sannleika. Í Opinberun Jóhannesar birtist Kristur: … og af munni hans gekk út tvíeggjað sverð biturt (1:16). Í gömlum sögnum og þjóðsögum hafa sverð oft á tíðum mikla náttúru og eru göldrótt. Á gömlum kínverskum myndum má sjá galdramenn reka burtu illa anda með sverð á lofti.

Þar sem talan fimm var heilög meðal dulspekinga varð fimmarma stjarnan grundvallartákn þeirra með vísun í ljósið, loftið, vindinn, eldinn og vatnið. Pýþagóras og lærisveinar hans litu á stjörnuna sem heilagt tákn um samhæfingu hugar og líkama og varð stjarnan tákn fyrir góða heilsu. Stjarnan birtist oft á kristnum helgimyndum þar sem hún táknar fimm sár Krists. Stjarnan hefur sérstaka þýðingu meðal Frímúrara þar sem hún táknar sólina sem lýsir upp jörðina með geislum sínum og á að minna okkur á þá blessun að sólin gefur okkur ljósið og lífið á jörðinni. Stjarnan var oft greypt í dyrakarma eða þröskulda áður fyrr, til að fæla burtu illa anda.

Fræðimenn og aðrir áhugamenn eru ennþá að rannsaka sögu og merkingu spilanna: tarotspilin hafa mörg tákn sem eru leyndardómsfull og þau hafa mikinn mátt sem aldrei má misnota.