Nei, en menn ættu engu að síður að fara varlega og spara stór orð. Það er einfaldlega ekkert í stefnuskrá FF, eða sambærilegum plöggum þar á bæ, sem gefur til kynna að þar sé um nasistaflokk að ræða. Þar er ekkert talað um kynþátt eða neitt slíkt, né heldur að innflytjendur frá löndum utan Evrópu séu óæskilegri. Hins vegar er t.d. talað um að allir íslenskir borgarar skuli njóta félagslegs og efnahagslegs öryggis. Íslenskir borgarar eru hins vegar af margvíslegum uppruna, lit og trú. Til íslensku þjóðarinnar teljast einnig fleiri en aðeins hvítir. Til dæmis eru Mariko, Dóra Takefusa, Amal Rún Quase og Venus (man ekki raunverulegt nafn, en þetta er sviðsnafn klæðskiptings sem ég held að flestir kannist við) öll íslensk, og þau teljast öll til íslensku þjóðarinnar (a.m.k. í mínum kokkabókum). Flokkurinn leggur einnig all-mikla áherslu á að bæta og styrkja lýðræði á Íslandi - en lýðræði er eitur í beinum nasista. Þetta er auðvitað allt sagt með þeim fyrirvara að menn séu að segja satt - en ég sé enga ástæðu til að tortryggja það.

Lítum svo aðeins á Ísland. Það kæmist enginn upp með að fleygja öllum útlendingum eða “óhvítum” úr landinu, jafnvel þótt þeir hefðu hreinan meirihluta á þingi. Jafnvel þótt slík lög væru samþykkt á þingi, þá yrði þeim (a.m.k. vonandi) hnekkt fyrir dómstólum (það á að vera hægt að láta dómstóla athuga lög og sjá hvort þau samræmist stjórnarskránni, og ef þau samræmast henni ekki eru þau ekki gild). Það er svo ansi mikið mál að breyta stjórnarskrá (en raunar alls ekki nógu mikið mál, að mínu mati). Auk þess myndi koma til ansi mikill þrýstingur að utan ef slík lög væru samþykkt. Að maður tali nú ekki um ef ofsóknir gegn fólki af ákveðnum uppruna myndu hefjast að undirlagi stjórnvalda.

Menn verða að athuga að íslenska lýðveldið, íslenskar lýðræðishefðir, og alþjóðasamfélagið standa á mun traustari fótum en Weimar-lýðveldið og lýðræðishefðir í Þýskalandi þriðja og fjórða áratugarins, hvað þá eitthvað sem hægt sé að kalla alþjóðasamfélag. Ef nasistar - raunverulegir nasistar - kæmust til valda einhvers staðar í dag, þá yrðu þeir stöðvaðir áður en þeim tækist að valda miklum skaða. En þá yrði eitthvað að hafa komið til - einhver lög samþykkt eða álíka. Það eitt, að flokkur vilji draga úr straumi innflytjenda er hins vegar ekki til marks um neinn nasisma, og einhver ummæli eru, ein og sér, engin sönnun fyrir því að ríkisstjórn muni taka upp stjórnarhætti nasista. Svo er auðvitað alls ekki nóg að vera kynþáttahatari eða á móti ákveðnum kynþáttum til að vera nasisti - t.d. eru svartir rasistar fæstir nasistar. Og enginn gyðingur gæti með góðu móti kallast nasisti, alveg sama hve mikill rasisti hann væri.<br><br>Þorsteinn.